ಶ್ರೀಸಿದ್ದೇಶ್ವರನ ನೂತನ ರಥೋತ್ಸವ HOLAGUNDI SIDDESHWARA

ದಿನಾಂಕ 28-01-2016ರಂದು 'ವಿಜಯವಾಣಿ'ಯಲ್ಲಿ ಪ್ರಕಟವಾದ ನನ್ನ ಲೇಖನ.

ಜನವರಿ 29 ಕ್ಕೆ ನೂತನ ರಥೋತ್ಸವದ ನಿಮಿತ್ತ ಲೇಖನ    

ನೋಡಬನ್ನಿ ಶ್ರೀಸಿದ್ದೇಶ್ವರನ ನೂತನ ರಥೋತ್ಸವ

ಸಂಸ್ಕøತಿ ಎನ್ನುವುದು ಸಮೂಹಸಮ್ಮತ ಜೀವನಪದ್ದತಿಯಾಗಿದೆ. ಇಂತಹ ಸಂಸ್ಕøತಿಯ ಪ್ರತೀಕವೇ ಆಗಿರುವ ದೇವಾಲಯಗಳು ಉತ್ಸವಗಳ ಹೆಸರಿನಲ್ಲಿ ಎಲ್ಲರನ್ನೂ ಒಂದೆಡೆ ಸೇರಿಸುವ ಮಹತ್ಕಾರ್ಯ ಮಾಡುತ್ತಿವೆ. ರಥಕ್ಕೂ ದೇವಾಲಯಕ್ಕೂ ತೀರಾ ಹತ್ತಿರದ ನಂಟು. ರಥವೆಂದರೆ ನಡೆದಾಡುವ ದೇಗುಲವಿದ್ದಂತೆ. ದೇವಾಲಯಗಳ ಉತ್ಸವದ ಪ್ರತೀಕವಾಗಿ ಬಳಸುವ ರಥ ದೇವರ ವಾಹನವೇ ಆಗಿರುತ್ತದೆ ಎನ್ನುವುದು ಪರಂಪರಾಗತ ನಂಬಿಕೆ. ಅದರಂತೆ ಬಳ್ಳಾರಿ ಜಿಲ್ಲಾ ಹೂವಿನಹಡಗಲಿ ತಾಲೂಕಿನ ಪ್ರಸಿದ್ದ ಪ್ರವಾಸಿ ಹಾಗೂ ಪೌರಾಣಿಕ ತಾಣಗಳಲ್ಲಿ ಒಂದಾದ ಹೊಳಗುಂದಿಯ ಶ್ರೀಸಿದ್ದೇಶ್ವರ ಸ್ವಾಮಿಯ ನೂತನ ರಥೋತ್ಸವದ ಸಕಲ ಸಿದ್ದತೆಗಳು ಪೂರ್ಣಗೊಂಡಿವೆ. ಇದೇ ಜನವರಿ 29ಕ್ಕೆ ಸಂಜೆ 5 ಗಂಟೆಗೆ ಸಕಲ ವಾದ್ಯಗಳಿಂದ ನೂತನ ರಥೋತ್ಸವ ನಡೆಯಲಿದೆ. ನೂರಾರು ವರ್ಷಗಳ ಹಿಂದೆ ನಿರ್ಮಾಣಗೊಂಡಿದ್ದ ರಥವು ಶಿಥಿಲಾವಸ್ಥೆಯಲ್ಲಿದ್ದ ಕಾರಣ ಈಗ ನೂತನ ರಥ ನಿರ್ಮಾಣವಾಗಿದೆ.

ನೂತನ ರಥದ ನಿರ್ಮಾತೃಗಳು: ರಥವು ಇದೇ ಗ್ರಾಮದ ಕಾಷ್ಠಶಿಲ್ಪಿಗಳಾದ ಮೌನೇಶ್‍ಆಚಾರ್, ಮಗ ವೀರೇಶ್‍ಆಚಾರ್ ಹಾಗೂ ಸಹೋದರರಿಂದ ನಿರ್ಮಾಣಗೊಂಡಿದ್ದು, ಕಲಾತ್ಮಕ ಕುಸುರಿ ಕೆತ್ತನೆಯಿಂದ ಕೂಡಿದೆ. 14 ಅಡಿ ಅಗಲ 14 ಅಡಿ ಉದ್ದ ಹಾಗೂ 15 ಅಡಿ ಎತ್ತರವುಳ್ಳ ಗಡ್ಡಿರಥವು ನವೀನ ಶೈಲಿಯಲ್ಲಿ ರೂಪುಗೊಂಡಿದೆ. 5 ಮಂಟಪ(ಅಂತಸ್ತು)ಗಳು ಹಾಗೂ ಕಳಸ ಸೇರಿ ಒಟ್ಟು 50 ಅಡಿ ಎತ್ತರದ ಸಾಲಂಕೃತ ರಥವನ್ನು ಎಳೆಯಲಾಗುತ್ತದೆ. 

ಕಲ್ಲಿನ ಗಾಲಿಗಳ ಮೇಲಿನ ಅದಿಷ್ಠಾನವು ಚೌಕಾಕಾರವಾಗಿದ್ದು, ಬಲಿಷ್ಠವಾದ, ಗಟ್ಟಿಮುಟ್ಟಾದ ಹಾಗೂ ಬೆಲೆಬಾಳುವ ಕಟ್ಟಿಗೆಯಲ್ಲಿ ನಿರ್ಮಾಣಗೊಂಡಿದೆ. ಅಧಿಷ್ಠಾನದ ತೊಲೆಗಳಲ್ಲಿ ಅತ್ಯಾಕರ್ಷಕವಾದ ಆನೆಯ ಚಿತ್ರಗಳನ್ನು ಕೆತ್ತಲಾಗಿದ್ದು, ನೋಡುಗರಿಗೆ ಆನೆಗಳು ರಥವನ್ನು ಎಳೆದೊಯ್ಯುತ್ತವೆ ಎಂಬಂತೆ ಭಾಸವಾಗುತ್ತದೆ. ಶಿಲ್ಪಿಗಳ ಹೃದಯಾಂತರಾಳದಿಂದ ನಿರ್ಮಾಣಗೊಂಡ ಈ ರಥವು ಅವರ  ಕಲ್ಪನೆ, ಪ್ರತಿಭಾಸಾಮಥ್ರ್ಯ ಹಾಗೂ ಸತತ ಪರಿಶ್ರಮಗಳ ದ್ಯೋತಕವಾಗಿದೆ.

ವೈವಿಧ್ಯಮಯ ಕೆತ್ತನೆ: ಅಧಿಷ್ಠಾನದ ಮೇಲಿನ ನಡುಪಟ್ಟಿ ಭಾಗದಲ್ಲಿ ಅನೇಕ ಚಿತ್ರಗಳನ್ನು ಕೆತ್ತಲಾಗಿದ್ದು, ಇಡೀ ರಥಕ್ಕೆ ಶೋಭೆಯನ್ನು ತಂದಿವೆ. ಇದರಲ್ಲಿ ಮೃದುವಾದ ಕಟ್ಟಿಗೆಯಿಂದ ವಿಘ್ನೇಶ್ವರ, ಆದಿಶಕ್ತಿ, ವೀರಭದ್ರ, ಬ್ರಹ್ಮ, ವಿಷ್ಣು, ಮಹೇಶ್ವರ, ಷಣ್ಮುಖ, ಶರಣಬಸವೇಶ್ವರರು, ಬಸವಣ್ಣ ಹೀಗೆ ವಿವಿಧ ದೇವತೆಗಳು, ವಚನಕಾರರು ಹಾಗೂ ಮೈಥುನಗಳ ಮೂರು ಆಯಾಮದ  ಚಿತ್ರಗಳನ್ನು ಕೆತ್ತಲಾಗಿದೆ. 9 ಇಂಚಿನಿಂದ 18 ಇಂಚಿನವರೆಗೆ ವಿವಿಧ ಗಾತ್ರಗಳ ಕೆತ್ತನೆ ಚಿತ್ರಗಳು ಕಲಾರಸಿಕರಿಗೆ ರಸದೌತಣ ನೀಡುತ್ತವೆ. ಇಲ್ಲಿ ಕಾಷ್ಠಕಲೆಯ ಪರಾಕಾಷ್ಠತೆಯನ್ನು ಕಾಣಬಹುದು. 

ಗಡ್ಡಿಯ ಮಧ್ಯಭಾಗದಲ್ಲಿ ಕಲಾತ್ಮಕ ಕಂಬಗಳನ್ನು ಹಾಗೂ ಕಮಾನುಗಳನ್ನು ಕೆತ್ತಲಾಗಿದೆ. ಅಲ್ಲಲ್ಲಿ ಹಿತ್ತಾಳೆಯ ಗಂಟೆಗಳನ್ನು ಸೌಂದರ್ಯ ಮತ್ತು ನಿನಾದಕ್ಕಾಗಿ ಬಳಸಲಾಗಿದೆ. ಗಡ್ಡಿಯು ಕೆಳಭಾಗವು ಚಿಕ್ಕದಾಗಿದ್ದು ಹಂತಹಂತವಾಗಿ ಮೇಲ್ಭಾಗಕ್ಕೆ ಹೋದಂತೆ ವಿಶಾಲವಾಗುತ್ತಾ ಹೋಗಿರುವುದು ರಥದ ಸೌಂದರ್ಯವನ್ನು ಇಮ್ಮಡಿಗೊಳಿಸಿದೆ. 

ಹಣೆಪಟ್ಟಿಯಲ್ಲಿ ಅಷ್ಟದಿಕ್ಪಾಲಕರು, ವಿವಿಧ ಧರ್ಮಗಳ ಹೆಗ್ಗುರುತುಗಳುಳ್ಳ ಚಿತ್ರಗಳನ್ನು ಕೆತ್ತಲಾಗಿದ್ದು ಸಮಾನತೆಯ ಮಂತ್ರ ಜಪಿಸಲಾಗಿದೆ. ಇಲ್ಲಿ ವಿವಿಧ ಪ್ರಾಣಿ ಪಕ್ಷಿಗಳ ಚಿತ್ರ, ಕೀರ್ತಿಮುಖ, ತರು ಲತೆ ಬಳ್ಳಿಗಳ ಕೆತ್ತನೆಗಳಿವೆ. ಕೆತ್ತನೆಗೆ ಅನುರೂಪವಾದ ವರ್ಣದ ಟಚಪ್ ನೀಡಲಾಗಿದೆ. ಇಲ್ಲಿನ ಕಲೆಯನ್ನು ಗಮನಿಸಿದರೆ ಶಿಲ್ಪಿಗಳು ಅತ್ಯಪೂರ್ವ ಅಲೌಕಿಕ ಕಲೆಯನ್ನು ಸಿದ್ದಿಸಿಕೊಂಡಿರುವುದು ವೇದ್ಯವಾಗುತ್ತದೆ. ಇಲ್ಲಿನ ಕೆತ್ತನೆಗಳಲ್ಲಿ ಪ್ರಸಿದ್ದ ದೇವಾಲಯಗಳ ವಾಸ್ತುಶಿಲ್ಪದ ಪ್ರಭಾವ ಇದ್ದರೂ ಸ್ವತಂತ್ರ ಕಲಾಕೃತಿಗಳಾದ್ದರಿಂದ ಸ್ವಂತಿಕೆಯೂ ಎದ್ದು ಕಾಣುತ್ತದೆ. ಒಟ್ಟಾರೆ ರಥವು ಶೃಂಗಾರ ವೈಭವದಿಂದ ಕೂಡಿದ್ದು ಸುಂದರಕಾವ್ಯವಾಗಿ ಹೊರಹೊಮ್ಮಿದೆ. 

ಕನ್ನಡನಾಡು ಅಸಂಖ್ಯ ರಥಗಳ ನಾಡಾದಂತೆ ಹೊಸ ಹೊಸ ರಥಶಿಲ್ಪಿಗಳನ್ನು ಸೃಷ್ಟಿಸುವ ನೆಲೆಬೀಡೂ ಆಗಿರುವುದು ಸಂತೋಷದ ಸಂಗತಿ. ಇಲ್ಲಿನ ಶಿಲ್ಪಿಗಳು ಈಗಾಗಲೇ ಆರೇಳು ರಥಗಳನ್ನು ನಿರ್ಮಿಸಿದ್ದು, ಒಂದಕ್ಕಿಂತ ಇನ್ನೊಂದು ರೂಪು, ಆಕಾರ, ವೈಭವಾತ್ಮಕ ಕೆತ್ತನೆಯಲ್ಲಿ ಭಿನ್ನವಾಗಿವೆ. ಕಷ್ಟದಲ್ಲೇ ಬೆಳದ ಇವರು ಪ್ರಸಿದ್ದ ಕಾಷ್ಠಶಿಲ್ಪಿಗಳಾಗಿ ಹೊರಹೊಮ್ಮುತ್ತಿದ್ದಾರೆ. 

ವಿಶೇಷ ಕಾರ್ಯಕ್ರಮಗಳು: ನೂತನ ರಥೋತ್ಸವದ ಅಂಗವಾಗಿ ಉಜ್ಜಯಿನಿ ಜಗದ್ಗುರುಗಳ ಅಡ್ಡಪಲ್ಲಕ್ಕಿ ಮಹೋತ್ಸವ, ವಿವಿಧ ಮಠಾಧಿಪತಿಗಳು ಹಾಗೂ ಖ್ಯಾತ ಉಪನ್ಯಾಸಕರಿಂದ  ಜೀವನ ದರ್ಶನ ಉಪನ್ಯಾಸ ಕಾರ್ಯಕ್ರಮಗಳು ನಡೆಯುತ್ತವೆ. ಜೊತೆಗೆ 30ರಂದು ಬೆಳಿಗ್ಗೆ 11 ಗಂಟೆಗೆ ಶ್ರೀಸಿದ್ದೇಶ್ವರನ ಅಗ್ನಿಯು ವಿಜೃಂಭಣೆಯಿಂದ ನಡೆಯಲಿದೆ. ನಂತರ ಮೂರು ದಿನಗಳ ಕಾಲ ಅದ್ದೂರಿ ಜಾತ್ರೆ ನಡೆಯುತ್ತದೆ. ರಥೋತ್ಸವ ಮತ್ತು ಅಗ್ನಿಗೆ ಆಗಮಿಸುವ ಅಪಾರ ಭಕ್ತಾದಿಗಳಿಗೆ ಪ್ರಸಾದ ವ್ಯವಸ್ಥೆ ಇರುತ್ತದೆ ಎಂದು ದೇವಸ್ಥಾನ ಸಮಿತಿಯವರು ಪ್ರಕಟಣೆ ನೀಡಿದ್ದಾರೆ. 

ಎಲ್ಲಿದೆ? ಹೋಗುವುದು ಹೇಗೆ?:   ಹೊಳಗುಂದಿಯು ಹೂವಿನಹಡಗಲಿ ತಾಲೂಕಿನ ಪ್ರಮುಖ ಗ್ರಾಮವಾಗಿದ್ದು ಹೂವಿನಹಡಗಲಿ, ಹಗರಿಬೊಮ್ಮನಹಳ್ಳಿ, ಕೊಟ್ಟೂರು ಹಾಗೂ ಹರಪನಹಳ್ಳಿಗಳಿಂದ ಸಂಚರಿಸಲು ಸೂಕ್ತ ರಸ್ತೆಗಳಿದ್ದು, ಸಾಕಷ್ಟು ಬಸ್‍ಗಳ ವ್ಯವಸ್ಥೆ ಇದೆ. 

ಕ್ಷೇತ್ರದ ವಿಶೇಷತೆ: ಶ್ರೀಕ್ಷೇತ್ರವು ಐತಿಹಾಸಿಕ ಗ್ರಾಮವಾಗಿದ್ದು, ‘ಪೊಳಲಗುಂದಿ’ ಎಂಬ ಹೆಸರಿನಿಂದ ಪ್ರಖ್ಯಾತಿಯಾಗಿತ್ತು ಎಂಬುದಕ್ಕೆ ಇಲ್ಲಿನ ಸೋಮೇಶ್ವರ ಹಾಗೂ ಬಳ್ಳೇಶ್ವರ ದೇವಾಲಯಗಳ ಶಾಸನದಿಂದ ತಿಳಿದು ಬರುತ್ತದೆ. ಸದ್ರಿ ಸಿದ್ದೇಶ್ವರ ದೇವಸ್ಥಾನವು ಗ್ರಾಮದ ಬಳಿಯ ಬೆಟ್ಟದ ಮೇಲಿದ್ದು, ಪ್ರಸಿದ್ದ ಪ್ರವಾಸಿ ತಾಣವಾಗಿದೆ. ಅಲ್ಲದೇ ಗ್ರಾಮದಲ್ಲಿ ಎರಡು ಕಲ್ಯಾಣಿ ಚಾಲುಕ್ಯರ ಕಾಲದ ದೇವಾಲಯಗಳಿದ್ದು ಐತಿಹಾಸಿಕತೆಯನ್ನು ಸಾರುತ್ತಿವೆ. ಜೊತೆಗೆ ತಾಲೂಕಿನ ಅತೀ ಹೆಚ್ಚು ಸರ್ಕಾರಿ ನೌಕರರು ಅದರಲ್ಲೂ ವಿಶೇಷವಾಗಿ ಶಿಕ್ಷಕರು ಇರುವ ಗ್ರಾಮ ಎಂಬ ಕಿರೀಟವೂ ಇದೆ.

ಆರ್.ಬಿ.ಗುರುಬಸವರಾಜ

ಕಷ್ಟದಲ್ಲೇ ಕಾಷ್ಠಶಿಲ್ಪಿಯಾದ ರಥವೀರ RATHAVEER VEERESHACHAR

ದಿನಾಂಕ 20-01-2016 ರ 'ವಿಜಯವಾಣಿ'ಯಲ್ಲಿ ಪ್ರಕಟವಾದ ನನ್ನ ಲೇಖನ.

ಕಷ್ಟದಲ್ಲೇ ಕಾಷ್ಠಶಿಲ್ಪಿಯಾದ ರಥವೀರ

ಕನ್ನಡನಾಡು ಅಸಂಖ್ಯ ದೇವಾಲಯಗಳ ಬೀಡಾದಂತೆ ಅಸಂಖ್ಯ ರಥಗಳ ನಾಡೂ ಆಗಿದೆ. ಇಲ್ಲಿ ಸಾವಿರಾರು ಕಲಾತ್ಮಕ ರಥಗಳು ಕಲಾರಸಿಕರ ಕಣ್ಮನ ಸೆಳೆದಿವೆ. ಈ ಕನ್ನಡ ನೆಲದಲ್ಲಿ ಜನಿಸಿದ ಅನೇಕ ಕನ್ನಡ ಕಲಿಗಳು ರಥ ನಿರ್ಮಾಣದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದ್ದಾರೆ. ಹಾಗೆ ಛಾಪು ಮೂಡಿಸಲು ಹೊರಟ 30 ರ ಹರೆಯದ ‘ರಥವೀರ’ ಎಂದೇ ಖ್ಯಾತಿಗೊಂಡ ವೀರೇಶ್‍ಆಚಾರ್. ಬಳ್ಳಾರಿ ಜಿಲ್ಲಾ ಹಡಗಲಿ ತಾಲೂಕಿನ ಹೊಳಗುಂದಿ ಗ್ರಾಮದ ಈ ಯುವಕನ ಕಾಷ್ಠಕಲೆಗೆ ತಲೆದೂಗದವರಿಲ್ಲ. 

ಬಾಲ್ಯದಲ್ಲಿ ತಾಯಿಯ ಮಾತುಗಳಿಂದ ಪ್ರೇರಣೆಗೊಂಡು 12ನೇ ವಯಸ್ಸಿನಲ್ಲಿಯೇ ಕಟ್ಟಿಗೆಯಲ್ಲಿ ಗಣೇಶನ ವಿಗ್ರಹ ಕೆತ್ತಿದ ವೀರನೀತ. ಪರಂಪರಾಗತವಾಗಿ ಬಂದ ಮರಕೆತ್ತನೆ ಕೆಲಸದ ಕೈಚಳಕಗಳನ್ನು ಮೈಗೂಡಿಸಿಕೊಂಡ ವೀರೇಶ್‍ಆಚಾರ್ ಭವಿಷ್ಯದಲ್ಲಿ ರಥಶಿಲ್ಪಿಯಾಗುತ್ತೇನೆ ಎಂಬ ಯಾವ ಕನಸನ್ನೂ ಕಂಡಿರಲಿಲ್ಲ. ಈತನಲ್ಲಿದ್ದ ಅಗಾಧ ಆಸಕ್ತಿ ಹಾಗೂ ಪರಿಶ್ರಮಗಳು ಈತನನ್ನು ಒಬ್ಬ ರಥಶಿಲ್ಪಯನ್ನಾಗಿಸಿದವು.  ಜೊತೆಗೆ ಅನಕ್ಷರಸ್ಥ ತಂದೆ ಮೌನೇಶ್‍ಆಚಾರ್ ಇವರ ಮಾರ್ಗದರ್ಶನದಲ್ಲಿ ಬೆಳೆದು ಈಗ ‘ರಥವೀರ’ನಾಗಿ ಹೊರಹೊಮ್ಮಿದ್ದಾನೆ. 

ಸವಾಲಾದ ಸಂಬಂಧ : ತಮ್ಮ ಕುಲಬಾಂಧವರೆಲ್ಲ ವಿವಿಧ ಕುಲಕಸಬುಗಳಲ್ಲಿ ತೊಡಗಿಕೊಂಡು ಉತ್ತಮ ಸ್ಥಿತಿಯಲ್ಲಿದ್ದರು. ಇದನ್ನು ಕಂಡ ತಂದೆಗೂ ತಾವೂ ಸಹ ಅವರಿಗಿಂತ ವಿಶೇಷವಾದುದನ್ನು ಸಾಧಿಸಿಬೇಕೆಂದು ಪಣ ತೊಟ್ಟರು. ಅದಕ್ಕೆ ಮಗ ವೀರೇಶ್‍ಆಚಾರ್ ತಂದೆಯ ಕನಸಿಗೆ ಕೈಜೋಡಿಸಿದರು. 

ಬಡತನದಿಂದಾಗಿ 10ನೇ ತರಗತಿ ಓದಿದ ವೀರೇಶ್‍ಆಚಾರ್ ವಿದ್ಯಾಭ್ಯಾಸ ನಿಲ್ಲಿಸಿ ದುಡಿಮೆಯಲ್ಲಿ ತೊಡಗಿಕೊಳ್ಳುವ ಮನಸ್ಸು ಮಾಡಿದ. ಆದರೆ ತಂದೆ ತಾಯಿಯರಿಗೆ ಇದು ಇಷ್ಟವಿರಲಿಲ್ಲ. ಇನ್ನೂ ಮುಂದೆ ಓದಿಸಬೇಕೆಂಬ ಆಸೆ ಇತ್ತು. ಆಗ ಸ್ನೇಹಿತರೊಬ್ಬರು ಸೃಜನಶೀಲ ಕಲೆಯನ್ನು ಬೆಳೆಸಿಕೊಳ್ಳುವ ವಿದ್ಯಾಭ್ಯಾಸದ ಬಗ್ಗೆ ಸಲಹೆ ನೀಡಿದರು. ಇದರಿಂದ ಪ್ರೇರಿತನಾದ ವೀರೇಶ್‍ಆಚಾರ್ ಗದಗ ನಗರದ ಶ್ರೀವಿಜಯ ಕಲಾಮಂದಿರದಲ್ಲಿ 5 ವರ್ಷಗಳ ಚಿತ್ರಕಲಾ ಪದವಿ ಪಡೆದರು. ಇದು ಅವರ ಜೀವನಕ್ಕೆ ಹೊಸ ಮಾರ್ಗವೊಂದನ್ನು ಪರಿಚಯಿಸಿತು. 

ಪದವಿಯ ನಂತರ ಕುಟುಂಬದಿಂದ ಹೊರ ಹೋಗಿ ದುಡಿಯುವ ಅನಿವಾರ್ಯತೆಯ ಜೊತೆಗೆ ಚಿಕ್ಕ ಸಹೋದರರಿಗೂ ಆಸರೆಯಾಗಿ ನಿಲ್ಲುವ ಮಹತ್ಕಾರ್ಯವೂ ಅನಿವಾರ್ಯವಾಗಿತ್ತು. ತಂದೆಯ ಮಾತಿನಂತೆ ಗ್ರಾಮದಲ್ಲೇ ವಾಸ್ತವ್ಯ ಹೂಡಿ ಮರಕೆತ್ತನೆಯನ್ನೇ ಮುಂದುವರೆಸಿದನು. 

ಹುಡುಕಿ ಬಂದ ಅವಕಾಶ : ಮರಕೆಲಸದಲ್ಲಿಯೇ ತನ್ನ ಕೌಶಲ್ಯತೆಯನ್ನು ಪ್ರದರ್ಶಿಸಿದ್ದ ವೀರೇಶ್‍ಆಚಾರ್‍ಗೆ ದೂರದೂರದಿಂದ ಕೆಲಸಗಳು ಅರಸಿ ಬಂದವು. ಸುಂದರವಾದ ಕದಗಳು. ಸೋಫಾ ಸೆಟ್‍ಗಳು, ಅಲಂಕಾರಿಕ ಡೈನಿಂಗ್ ಟೇಬಲ್ ಇತ್ಯಾದಿ ಕಾರ್ಯಗಳು ಭವಿಷ್ಯಕ್ಕೆ ಕೊಂಡಿಯಾಗಿದ್ದವು. ಕಳೆದ ಎಂಟು ವರ್ಷಗಳ ಹಿಂದೆ ಇವರ ಕೆಲಸವನ್ನು ಗಮನಿಸಿದ ಪಕ್ಕದ ಬಾವಿಹಳ್ಳಿ ಗ್ರಾಮಸ್ಥರು ರಥ ನಿರ್ಮಾಣಕ್ಕೆ ಪ್ರಸ್ಥಾವನೆ ಸಲ್ಲಿಸಿದರು. ಎಂದೂ ರಥ ನಿರ್ಮಾಣದ ಬಗ್ಗೆ ಕನಸು ಕಾಣದೇ ಇರುವಾಗ ದುತ್ತನೇ ಆಫರ್ ಕಣ್ಮುಂದೇ ಬಂದು ನಿಂತಾಗ ಇದು ಸಾಧ್ಯವೇ ಎನಿಸಿತು. ಆಗ ದೃಢಸಂಕಲ್ಪ ಮಾಡಿ ಆ ಕೆಲಸವನ್ನು ಒಪ್ಪಿಕೊಂಡರು. ಕ್ರಿಯಾಶೀಲತೆಯನ್ನು ಒರೆಗೆ ಹಚ್ಚಿ ಹದವರಿತು ಕಾಷ್ಠಕ್ಕೊಂದು ರೂಪು ನೀಡಿ ಸುಂದರವಾದ ರಥ ನಿರ್ಮಿಸಿಯೇ ಬಿಟ್ಟರು. 

ಅಲ್ಲಿಂದ ಪ್ರಾರಂಭವಾದ ರಥ ನಿರ್ಮಾಣ ಕೆಲಸಗಳು ಒಂದರ ಮೇಲೊಂದು ಆಫರ್‍ನಂತೆ ಬರತೊಡಗಿವೆ. ಈಗಾಗಲೇ ಆರು ರಥಗಳನ್ನು ನಿರ್ಮಿಸಿದ ವೀರೇಶ್‍ಆಚಾರ್‍ಗೆ ಇನ್ನೆರಡು ರಥ ನಿರ್ಮಾಣಗಳಲ್ಲಿ ತೊಡಗಿದ್ದಾನೆ. ನಿರ್ಮಿಸಿದ ಆರು ರಥಗಳಲ್ಲಿನ ಕುಸುರಿ ಕೆಲಸ, ಸೂಕ್ಷ್ಮ ಕೆತ್ತನೆಗಳ ಕೈಚಳಕ ಅಮೋಘವಾಗಿದೆ.  ಒಂದಕ್ಕಿಂತ ಇನ್ನೊಂದು ಭಿನ್ನವಾಗಿವೆ. ಪ್ರಸ್ತುತ ಇವರು ನಿರ್ಮಿಸಿದ ಸ್ವಗ್ರಾಮದ ಶ್ರೀಸಿದ್ದೇಶ್ವರ ಸ್ವಾಮಿಯ ನೂತನ ರಥೋತ್ಸವವು ಇದೇ ಜನವರಿ 29 ಕ್ಕೆ ವಿಜೃಂಭಣೆಯಿಂದ ಜರುಗಲಿದೆ. ಚಿತ್ರರಂಗದಲ್ಲಿನ ‘ರಥಾವರ’ ಚಿತ್ರವು ಶತದಿನೋತ್ಸವಗಳತ್ತ ದಾಪುಗಾಲು ಹಾಕುತ್ತಿದ್ದರೆ ವೀರೇಶ್‍ಆಚಾರ್ ಇವರ ರಥವು ಶತಮಾನಗಳವರೆಗೆ ಉರುಳಲು ಸಿದ್ದಗೊಂಡಿದೆ.

ಭವಿಷ್ಯದ ಕನಸು : ಅಂದು ರಥ ನಿರ್ಮಾಣದ ಕನಸು ಕಾಣದಿದ್ದರೂ ರಥ ನಿರ್ಮಾಣ ಕಾರ್ಯಕ್ಕೆ ಮುಂದಾದ ವೀರೇಶ್‍ಆಚಾರ್ ಭವಿಷ್ಯದಲ್ಲಿ ಉತ್ತಮ ಕಾಷ್ಠಶಿಲ್ಪಿಯಾಗುವ ಕನಸು ಹೊಂದಿದ್ದಾರೆ. ಜೊತೆಗೆ ಸಹೋದರರಿಗೂ ಉತ್ತಮ ವೃತ್ತಿ ಅವಕಾಶಗಳನ್ನು ಸೃಷ್ಟಿಸುವ ಜವಾಬ್ದಾರಿಯನ್ನೂ ಹೊತ್ತಿದ್ದಾರೆ. ಕಷ್ಟದಿಂದ ಬೆಳೆದು ಕಾಷ್ಠಶಿಲ್ಪಿಯಾಗಿದ್ದಕ್ಕೆ ತಂದೆ ಹಾಗೂ ಕುಟುಂಬದ ಸಹಕಾರವನ್ನು ನೆನೆಯುತ್ತಾರೆ. ಅಂತೆಯೇ ಗ್ರಾಮೀಣ ಪ್ರದೇಶದ ಅವಕಾಶ ವಂಚಿತ ಕ್ರಿಯಾಶೀಲ ಮನಸ್ಸುಗಳಿಗೆ ಉತ್ತಮ ದಾರಿ ತೋರುವ ಮಾರ್ಗದರ್ಶಿ ಆಗಬೇಕೆಂಬ ಮಹದಾಸೆ ಹೊಂದಿದ್ದಾರೆ. ಇವರ ಕನಸು ನನಸಾಗಲಿ, ಗ್ರಾಮೀಣ ಪ್ರತಿಭೆಗಳು ಎಲ್ಲೆಡೆ ಬೆಳಗಲಿ ಎಂದು ಆಶಿಸೋಣ.

ಆರ್.ಬಿ.ಗುರುಬಸವರಾಜ

ಅವಧಾನದ ವಿಜ್ಞಾನ SCIENCE OF ATTENTION

ಜನವರಿ 2016ರ 'ಗುರುಮಾರ್ಗ'ದಲ್ಲಿ ಪ್ರಕಟವಾದ ನನ್ನ ಲೇಖನ.

ಅವಧಾನದ ವಿಜ್ಞಾನ

ಬೋಧನೆ ಮಾಡುವಾಗ ವಿದ್ಯಾರ್ಥಿಗಳ ಅವಧಾನ/ಗಮನವನ್ನು ಎಷ್ಟು ಹೊತ್ತು ಕೇಂದ್ರೀಕರಿಸಬಹುದು? ಹೆಚ್ಚೆಂದರೆ 10-15 ನಿಮಿಷ.  40 ನಿಮಿಷಗಳ ಅವಧಿಯಲ್ಲಿ ಹೆಚ್ಚು ಹೊತ್ತು ವಿದ್ಯಾರ್ಥಿಗಳ ಗಮನ ಕೇಂದ್ರೀಕರಿಸುವುದು ನಿಜಕ್ಕೂ ಕಷ್ಟದ ಕೆಲಸ. 

ವಿದ್ಯಾರ್ಥಿಗಳ ಅವಧಾನದ ಮಟ್ಟವು ಪ್ರೇರಣೆ, ಭಾವನೆಗಳ ಹಂಚಿಕೆ, ಸಂತೋಷ ಮತ್ತು ಆ ದಿನದ ವಿಶೇಷಗಳನ್ನು ವ್ಯಾಪಕವಾಗಿ ಅವಲಂಬಿಸಿದೆ. ಪಾಠ ಬೋಧನೆಗೆ ತಕ್ಕಂತೆ ಕೆಲವು ದೃಶ್ಯಾವಳಿಗಳು, ಚಿತ್ರ ಪ್ರದರ್ಶನಗಳಂತಹ ಕೆಲವು ತಂತ್ರಗಳ ಅಳವಡಿಕೆಯಿಂದ ವಿದ್ಯಾರ್ಥಿಗಳ ಅವಧಾನವನ್ನು ಹೆಚ್ಚು ಹೊತ್ತು ಕೇಂದ್ರೀಕರಿಸಬಹುದೆಂಬುದು ಸಾಬೀತಾಗಿದೆ.  ವಿದ್ಯಾರ್ಥಿಗಳ ಆಸಕ್ತಿಯನ್ನು ಹೆಚ್ಚಿಸಿ ಅವರು ತರಗತಿಯ ಕಲಿಕೆಯಲ್ಲಿ ಉತ್ಸುಕರಾಗಿ ಪಾಲ್ಗೊಳ್ಳುವಂತೆ ಮಾಡಬೇಕಾದುದು ಪ್ರತಿಯೊಬ್ಬ ಶಿಕ್ಷಕರ ಆದ್ಯ ಕರ್ತವ್ಯವಾಗಿದೆ. ನಾವದನ್ನು ಮಾಡುತ್ತಿದ್ದೇವೆಯಾ? ಎಂದು ನಮ್ಮನ್ನೇ ನಾವು ಪ್ರಶ್ನಿಸಿಕೊಂಡರೆ ಉತ್ತರ ಕೆಳಗಿನ ಶ್ರೇಣಿಗಳಲ್ಲಿರುತ್ತದೆ. 

ವಿದ್ಯಾರ್ಥಿಗಳಲ್ಲಿ ಅವಧಾನವು ಕಡಿಮೆಯಾಗಲು ಹಲವಾರು ಕಾರಣಗಳಿವೆ. ಅವುಗಳೆಂದರೆ ಪಠ್ಯವಸ್ತು, ಹವಾಮಾನ ವೈಪರೀತ್ಯ, ಸ್ಥಳೀಯ ಹಬ್ಬಗಳು/ಆಚರಣೆಗಳು, ನೀರಸ ಬೋಧನೆ, ಕಠಿಣವಾದ ಪರಿಕಲ್ಪನೆಗಳು, ಅನಾರೋಗ್ಯ ಇತ್ಯಾದಿ ಅಂಶಗಳು ಕಾರಣವಾಗಿರಬಹುದು.

ಆದಾಗ್ಯೂ ಶಿಕ್ಷಕರಾದ ನಾವು ಬೋಧನಾ ವಿಷಯಕ್ಕೆ ಸಂಬಂಧಿಸಿದಂತೆ ಪರಿಕಲ್ಪನೆಗಳನ್ನು ಸುಲಭವಾಗಿ ಮಕ್ಕಳಿಗೆ ತಲುಪಿಸುವ ಸುಗಮಕಾರರಾಗುವ ಅಗತ್ಯವಿದೆ. ಕೇವಲ ವಿಷಯದ ಆಳ ಮತ್ತು ವ್ಯಾಪ್ತಿ ತಿಳಿದಿದ್ದರೆ ಸಾಲದು. ಅದನ್ನು ಮಕ್ಕಳಿಗೆ ಸುಲಭವಾಗಿ ತಲುಪಿಸುವ ತಂತ್ರಗಾರಿಕೆ ತಿಳಿದಿರಬೇಕು. ಅದು ನಮ್ಮ ವಿದ್ಯಾರ್ಥಿಗಳ ಕಲಿಕೆಯಲ್ಲಿ ನೀರೀಕ್ಷಿತ ಪ್ರತಿಫಲ ನೀಡುವಂತಿರಬೇಕು. 

ವಿಷಯಗಳನ್ನು ಮಕ್ಕಳಿಗೆ ತಲುಪಿಸುತ್ತಿರುವಾಗ ಕೆಲವು ಸಣ್ಣ ಪುಟ್ಟ ತಪ್ಪುಗಳಾಗುವುದು ಸಹಜ. ಈ ತಪ್ಪುಗಳು ಆಗದಂತೆ ಮುನ್ನೆಚ್ಚರಿಕೆ ವಹಿಸಿಕೊಂಡು ಅದಕ್ಕೆ ಪೂರಕವಾದ ಕಲಿಕಾ ಯೋಜನೆಗಳನ್ನು ರೂಪಿಸಿಕೊಳ್ಳಬೇಕಾಗುತ್ತದೆ. ಪಠ್ಯಕ್ಕೆ ಪೂರಕವಾದ ಸಂಯೋಜಿತ ಕಲಿಕಾ ವಿಧಾನಗಳನ್ನು ಬಳಸಬೇಕಾಗುತ್ತದೆ. 

ಬೋಧನೆಯಲ್ಲಿ ಮಕ್ಕಳ ಗಮನವನ್ನು ಕೇಂದ್ರೀಕರಿಸಿ ಕಲಿಕಾ ಮಟ್ಟವನ್ನು ಉನ್ನತಕ್ಕೇರಿಸಲು ಕೆಲವು ತಂತ್ರಗಳು ಅಗತ್ಯ. ಕೆಳಗಿನ ಕೆಲವು ತಂತ್ರಗಳು ಮಕ್ಕಳ ಗಮನವನ್ನು ಕೇಂದ್ರೀಕರಿಸಲು ಸಹಾಯಕವಾಗುತ್ತವೆ.

ಧ್ವನಿಯ ಮಟ್ಟ ಬದಲಿಸಿ : ವಿದ್ಯಾರ್ಥಿಗಳ ಗಮನ ಕೇಂದ್ರೀಕರಿಸುವಲ್ಲಿ ಶಿಕ್ಷಕರ ಧ್ವನಿಯ ಮಟ್ಟವು ಸೂಕ್ತ ರೀತಿಯಲ್ಲಿ ಬಳಕೆಯಾಗಬೇಕಾದುದು ಅಗತ್ಯ. ಅಂದರೆ ಕಲಿಕಾಂಶಕ್ಕೆ ಪೂರಕವಾದ ರೀತಿಯಲ್ಲಿ ಶಿಕ್ಷಕರು ಧ್ವನಿಯಲ್ಲಿ ಏರಿಳಿತ ಹಾಗೂ ಧ್ವನಿಯ ನಾದ(ತೀವ್ರತೆ)ದ ಮಟ್ಟವನ್ನು ಬದಲಾಯಿಸುತ್ತರಬೇಕು. ಇದರಿಂದ ಗಮನವನ್ನು ಪುನಃ ಕ್ರೂಡೀಕರಿಸಬಹುದು.

ಆಧಾರ ಮತ್ತು ಸಾದೃಶ್ಯಗಳನ್ನು ಬಳಸಿ : ಕಲಿಕಾಂಶಕ್ಕೆ ಪೂರಕವಾದ ಒಂದು ಚಿತ್ರ ಶಿಕ್ಷಕರ ಶ್ರಮವನ್ನು ಕಡಿಮೆ ಮಾಡುವುದಲ್ಲದೇ ವಿದ್ಯಾರ್ಥಿಗಳ ಗಮನವನ್ನು ಕಲಿಕೆಯಲ್ಲಿ ಕೇಂದ್ರೀಕರಿಸಲು ಸಹಾಯಕವಾಗುತ್ತದೆ. ಚಿತ್ರಗಳನ್ನು ಬಳಸುವಾಗ ಚಿತ್ರದ ಕುರಿತು ನಿಮ್ಮ ಅನಿಸಿಕೆ ತಿಳಿಸದೇ ವಿದ್ಯಾರ್ಥಿಗಳೇ ಮುಕ್ತವಾಗಿ ಮಾತನಾಡಲು ತಿಳಿಸಿ. ಆಗ ಪ್ರತಿಯೊಬ್ಬ ವಿದ್ಯಾರ್ಥಿಯೂ ಕಲಿಕೆಯಲ್ಲಿ ಭಾಗವಹಿಸುವರಲ್ಲದೇ ಅವರ ಗಮನ ಬೋಧನೆಯಲ್ಲಿ ನೆಲೆಯೂರುತ್ತದೆ.

ಚಕಿತ ವಾಕ್ಯ ಅಥವಾ ಹೇಳಿಕೆ ನೀಡಿ : ಕಲಿಕಾಂಶಕ್ಕೆ ಪೂರಕವಾದ ಒಂದು ಹೇಳಿಕೆ ಅಥವಾ ಒಂದು ವಾಕ್ಯವನ್ನು ಕಪ್ಪು ಹಲಗೆಯ ಮೇಲೆ ಬರೆಯುವುದೂ ಕೂಡಾ ಉತ್ತಮವಾದ ಪರಿಣಾಮ ಬೀರುತ್ತದೆ. ಹೀಗೆ ಬರೆಯುವಾಗ ಹೇಳಿಕೆ ಅಥವಾ ವಾಕ್ಯದ ಅರ್ದ ಭಾಗವನ್ನು ಮಾತ್ರ ಬರೆದು ಉಳಿದ ಭಾಗವನ್ನು ಪೂರ್ಣಗೊಳಿಸಲು ಮಕ್ಕಳಿಗೆ ತಿಳಿಸಿ. ಅಥವಾ ಕೆಲವು ಅಕ್ಷರಗಳನ್ನು ಬಿಟ್ಟು ಬರೆಯಿರಿ. ಅದಕ್ಕೆ ಸರಿಯಾದ ಅಕ್ಷರಗಳನ್ನು ಸೇರಿಸಿ ಅರ್ಥವತ್ತಾದ ಹೇಳಿಕೆಯನ್ನಾಗಿಸಲು ತಿಳಿಸಿ. ಉದಾ: ಗುರುಗಳನ್ನು ಕಡಿಯಬಾರದು, ಕತ್ತರಿಸಬೇಕು.(ಸರಿಯಾದ ರೂಪ : ಉಗುರುಗಳನ್ನು ಕಡಿಯಬಾರದು, ಕತ್ತರಿಸಬೇಕು). ಆಗ ಇಡೀ ತರಗತಿಯೇ ಈ ಚಟುವಟಿಕೆಯಲ್ಲಿ ಪಾಲ್ಗೊಳ್ಳುತ್ತದೆ. 

ಸವಾಲಿನ ಪ್ರಶ್ನೆ ಹಾಕಿ : ವಿಷಯಕ್ಕೆ ಸಂಬಂಧಿಸಿದಂತೆ ಮೂಲಭೂತ ಗ್ರಹಿಕೆಯನ್ನು ತಿಳಿಯಲು ಒಂದು ಸವಾಲಿನ ಪ್ರಶ್ನೆಯನ್ನು ಬರೆಯಿರಿ. ವಿದ್ಯಾರ್ಥಿಗಳು ತುಂಡು ಹಾಳೆಯಲ್ಲಿ ಉತ್ತರ ಬರೆದು ಕೊಡಲು ತಿಳಿಸಿ. ಇದರಿಂದ ವಿದ್ಯಾರ್ಥಿಗಳು ಪಠ್ಯವಸ್ತುವಿನತ್ತ ಗಮನ ಹರಿಸುತ್ತಾರೆ. ಉತ್ತರ ಕ್ರೂಡೀಕರಣದ ನಂತರ ಪ್ರಶ್ನೆ ಕುರಿತು ಚರ್ಚೆ ನಡೆಸಬಹುದು.

ಸೂಕ್ತ ಉದಾಹರಣೆಗಳನ್ನು ಆಯ್ಕೆ ಮಾಡಿ : ವಿದ್ಯಾರ್ಥಿಗಳ ಮನೋಭಾವವನ್ನು ಅರಿತು ವಿಷಯವನ್ನು ಅವರಿಗೆ ತಲುಪಿಸಿ. ವೈಯಕ್ತಿಕವಾಗಿ ಪ್ರತಿಯೊಬ್ಬ ವಿದ್ಯಾರ್ಥಿಯ ಮನೋಭಾವವನ್ನು ಅರಿತು ವಿಷಯ ತಲುಪಿಸುವುದು ಅಸಾಧ್ಯವಾದರೂ ನಿಯಮಿತವಾಗಿ ಉದಾಹರಣೆ ಮತ್ತು ಸನ್ನಿವೇಶಗಳನ್ನು ಬಳಸಿಕೊಂಡು ಪ್ರಯತ್ನಿಸಬೇಕು.

ಕಾಠಿಣ್ಯತೆಯ ಮಟ್ಟದಲ್ಲಿ ಕಲಿಸಿ : ಕೆಲವು ವಿಷಯಗಳು ಮಕ್ಕಳ ಮಾನಸಿಕ ಮತ್ತು ಬೌಧ್ದಿಕ ಮಟ್ಟಕ್ಕೆ ಕಠಿಣವೆನಿಸಬಹುದು. ಹಾಗೆ ನೋಡಿದರೆ ಯಾವ ವಿಷಯವೂ ಕಠಿಣವಲ್ಲ. ಅದನ್ನು ತಲುಪಿಸುವ ಮಾರ್ಗದಲ್ಲಿ ಉಂಟಾದ ಲೋಪದಿಂದಾಗಿ ಅದು ಕಠಿಣವೆನಿಸುತ್ತದೆ. ವಿಷಯವನ್ನು ಸುಲಭವಾಗಿ ಕಲಿಸುವ  ಮಾರ್ಗಗಳನ್ನು ತಂತ್ರಗಾರಿಕೆಯನ್ನು ತಿಳಿದಿರಬೇಕು. ಇದನ್ನು ವಿಷಯ ಪರಿಣಿತರು ಅಥವಾ ಸಹುದ್ಯೋಗಿಗಳಿಂದಲೂ ಕಲಿಯಬಹುದು.

ಮಕ್ಕಳನ್ನು ಕಲಿಕೆಯಲ್ಲಿ ತೊಡಗಿಸಿಕೊಳ್ಳಿ : ಮಕ್ಕಳನ್ನು ಬೋಧನೆ-ಕಲಿಕೆಯಲ್ಲಿ ತೊಡಗಿಸಿಕೊಳ್ಳುವುದು ಉತ್ತಮ ತಂತ್ರವಾಗಿದೆ. ಕಲಿಕಾಂಶಗಳನ್ನು ಮಕ್ಕಳೇ ವಿವರಿಸಲು ತಿಳಿಸುವುದು. ಚಿತ್ರ, ನಕ್ಷೆ, ಗಣಿತದ ಕೆಲವು ಸಮಸ್ಯೆಗಳನ್ನು ಕಪ್ಪು ಹಲಗೆಯ ಮೇಲೆ ಮಕ್ಕಳಿಂದ ಬಿಡಿಸುವುದು ಮಕ್ಕಳ ಗಮನವನ್ನು ಕೇಂದ್ರೀಕರಿಸುವ ಮತ್ತೊಂದು ತಂತ್ರವಾಗಿದೆ.

ಹಾಸ್ಯ ಬಳಸಿ : ಗಮನ ಕೇಂದ್ರೀಕರಿಸಲು ನಗೆಹನಿಗಿಂತ ಮಿಗಿಲಾದ ಮತ್ತೊಂದು ತಂತ್ರ ಇರಲಾರದು. ಪಾಠ ಬೋಧನೆಯಲ್ಲಿ ಶಿಕ್ಷಕರು ಹಾಸ್ಯ ಸೇರಿಸುವುದನ್ನು ವಿದ್ಯಾರ್ಥಿಗಳು ಇಷ್ಟಪಡುತ್ತಾರೆ. ಹೀಗಾಗಿ ತರಗತಿಯಲ್ಲಿನ ವಸ್ತು, ವಿಷಯ, ವ್ಯಕ್ತಿಗಳ ಕುರಿತಾದ ಒಂದು ಲಘು ವ್ಯಂಗ್ಯ ಇಡೀ ತರಗತಿಯನ್ನು ನಗೆಗಡಲಲ್ಲಿ ತೇಲಿಸುತ್ತದೆ. ಜೊತೆಗೆ ಮಕ್ಕಳ ಗಮನವನ್ನು ನಿಸ್ಸಂದೇಹವಾಗಿ ಕೇಂದ್ರೀಕರಿಸುತ್ತದೆ.

ನಿಯಮಿತ ಕಾರ್ಯದ ಕಾಲಮಿತಿ ಸ್ಥಾಪಿಸಿ : ಗುಂಪು ಕಾರ್ಯಗಳನ್ನು ನೀಡುವ ಮೊದಲು ಕಾರ್ಯಕ್ಕೆ ತಕ್ಕಂತೆ ಕಾಲಮಿತಿ ನೀಡಿ. ಇದು ಅವರು ಗುರಿಯತ್ತ ಮನ್ನುಗಲು ಅವರನ್ನು ಸದಾ ಎಚ್ಚರಿಸುತ್ತದೆ.

ಯೋಜನೆ ಸ್ಪಷ್ಟವಾಗಿರಲಿ : ಕಲಿಕಾಂಶದ ಉದ್ದೇಶ ಮತ್ತು ಯೋಜನೆ ಮಕ್ಕಳಿಗೆ ಸ್ಪಷ್ಟವಾಗಿಲ್ಲದಿದ್ದರೆ ಅವರು ಗಮನ ಕಳೆದುಕೊಳ್ಳುತ್ತಾರೆ. ಕಾರಣ ಪಾಠದ ಉದ್ದೇಶ ಮತ್ತು ಯೋಜನೆಯನ್ನು ಮಕ್ಕಳಿಗೆ ಸ್ಪಷ್ಟಪಡಿಸಿ. ಕಲಿಕೆಯ ಪ್ರಮುಖಾಂಶಗಳನ್ನು ಕಪ್ಪು ಹಲಗೆಯ ಮೇಲೆ ಬರೆಯಿರಿ. ಇದು ಮಕ್ಕಳ ಗಮನವನ್ನು ಕೇಂದ್ರೀಕರಿಸಲು ಸಹಕಾರಿ.

ಕೌಶಲ್ಯಗಳನ್ನು ಬಳಸಿಕೊಳ್ಳಿ : ಮಕ್ಕಳಲ್ಲಿ ಉತ್ತಮವಾದ ಕೌಶಲ್ಯಗಳಿರುತ್ತವೆ. ಅವುಗಳನ್ನು ಸೂಕ್ತ ರೀತಿಯಲ್ಲಿ ಗುರುತಿಸಿ ಬೆಳೆಯಲು ಅವಕಾಶ ಮಾಡಿಕೊಡಬೇಕು. ಕೆಲವು ವಿಷಯಗಳನ್ನು ಚರ್ಚೆ/ಸಂವಾದದ ಮೂಲಕ ಕಲಿಯಲು ಅವಕಾಶ ಒದಗಿಸಬೇಕು. ಆಗ ಎಲ್ಲರೂ ಅದರಲ್ಲಿ ಪಾಲ್ಗೊಳ್ಳಲು ಅವಕಾಶ ಮಾಡಿಕೊಡಬೇಕು.

ಪಾತ್ರಗಳನ್ನು ಸ್ಪಷ್ಟಪಡಿಸಿ : ಚರ್ಚೆ ಮತ್ತು ಸಂವಾದಗಳು ಯಶಸ್ವಿಯಾಗಲು ಪ್ರತಿ ಗುಂಪಿನ ಸದಸ್ಯರ ಪಾತ್ರದ ಸ್ಪಷ್ಟತೆ ಇರಬೇಕು. ಗುಂಪಿನಲ್ಲಿ ಯಾರು ಹೇಗೆ ಭಾಗವಹಿಸಬೇಕು?, ವಿಷಯವನ್ನು ಯಾರು, ಹೇಗೆ ಮಂಡಿಸಬೇಕು? ಪ್ರಶ್ನೆಗಳನ್ನು ಯಾರು ಕೇಳಬೇಕು? ಇತ್ಯಾದಿಗಳ ಬಗ್ಗೆ ಸ್ಪಷ್ಟತೆ ಇರಬೇಕು. ಹೀಗೆ ಪ್ರತಿಯೊಬ್ಬರ ಪಾತ್ರಗಳನ್ನು ಸ್ಪಷ್ಟಪಡಿಸುವುದರಿಂದ ಜವಾಬ್ದಾರಿ ಹೆಚ್ಚುತ್ತದೆ. ಕಲಿಕೆಯಲ್ಲಿ ಉತ್ಸುಕರಾಗಿ ಭಾಗವಹಿಸುತ್ತಾರೆ.

ಬದಲಾವಣೆ ಮತ್ತು ಅಚ್ಚರಿಯನ್ನು ಪರಿಚಯಿಸಿ : ‘ಬದಲಾವಣೆಯೊಂದೇ ಶಾಶ್ವತ’ ಎಂಬುದನ್ನು ಮಕ್ಕಳಿಗೆ ಪರಿಚಯಿಸಿ. ನಮ್ಮ ಪರಿಸರದಲ್ಲಿ ಏನೇನು ಬದಲಾವಣೆಗಳು ಆಗುತ್ತಿವೆ ಎಂಬುದನ್ನು ಗಮನಿಸಲು ತಿಳಿಸಿ. ಆಗ ಪರಿಸರದ ಬಗ್ಗೆ ಕಾಳಜಿ ಸಹಜವಾಗಿ ಮೂಡುತ್ತದೆ. ಪ್ರತಿ 10-15 ನಿಮಿಷಗಳಿಗೊಮ್ಮೆ ಅಚ್ಚರಿಯ ಕೆಲವು ಅಂಶಗಳನ್ನು ತಿಳಿಸಿ, ಅಥವಾ ಒಂದು ನಗೆಹನಿಯನ್ನಾದರೂ ಹೇಳಿ. ಇದು ಮಕ್ಕಳ ಗಮನವನ್ನು ಕೇಂದ್ರೀಕರಿಸಲು ಸಹಕಾರಿಯಾಗುತ್ತದೆ.

ಒತ್ತಡ ನಿವಾರಿಸಿ : ಅಮೂರ್ತ ಮನಸ್ಸಿನ ನಿರ್ವಹಣೆ ಅಸಾದ್ಯ. ನೋಟ, ಧ್ವನಿ, ರುಚಿ, ಅಭಿಪ್ರಾಯಗಳ ಮೂಲಕ ಸಂಪರ್ಕ ಮತ್ತು ಸಂವೇದನಾ ವಿವರಗಳನ್ನು ವಾಸ್ತವಕ್ಕೆ ತನ್ನಿ. ಮಕ್ಕಳು ಆಲೋಚಿಸಲು ಹಾಗೂ ಸೂಕ್ತ ನಿರ್ಧಾರ ಕೈಗೊಳ್ಳಲು ಅವಕಾಶ ನೀಡಿ. ಒತ್ತಾಯ ಪೂರ್ವಕ ಕಲಿಕೆ ಬೇಡ.

ಕಥೆ ಹೇಳಿ : ಮನಸ್ಸು ಪ್ರಫುಲ್ಲವಾಗಿರಲು ಕಥೆಗಳು ಸಹಾಯಕ. ಕಥೆಗಳು ಮಕ್ಕಳ ಗಮನವನ್ನು ಕೇಂದ್ರೀಕರಿಸುವುದಲ್ಲದೇ ಕಲಿಕೆಯನ್ನು ಸುಗಮ ಹಾಗೂ ಸುಮನೋಹರಗೊಳಿಸುತ್ತವೆ. ಜೊತೆಗೆ ಮಾನವೀಯ ಮೌಲ್ಯಗಳು ಬೆಳೆಯಲು ಸಹಕಾರಿಯಾಗಿವೆ.

ಈ ಮೇಲಿನ ಅಂಶಗಳಲ್ಲದೇ ನಿಮ್ಮದೇ ಆದ ತಂತ್ರಗಳನ್ನೂ ಬಳಸಿ ತರಗತಿಯಲ್ಲಿ ಮಕ್ಕಳ ಅವಧಾನವನ್ನು ಕೇಂದ್ರೀಕರಿಸಬಹುದು. ಒಟ್ಟಾರೆ ಕಲಿಕೆ ಸಂತಸವಾಗಿರಬೇಕು ಹಾಗೂ ಶಾಶ್ವತವಾಗಿರಬೇಕು.

ಆರ್.ಬಿ.ಗುರುಬಸವರಾಜ 

ಬದಲಾಗಲಿ ನಮ್ಮ ವರ್ತನೆಗಳು

ಜನವರಿ 2016 ರ 'ಟೀಚರ್' ಮಾಸಪತ್ರಿಕೆಯಲ್ಲಿ ಪ್ರಕಟವಾದ ನನ್ನ ಲೇಖನ.

ಬದಲಾಗಲಿ ನಮ್ಮ ವರ್ತನೆಗಳು

“ನಮ್ಮ ಮೋಹನನಿಗೆ ತುಂಬಾ ಹಠ. ಕೇಳಿದ್ದನ್ನೆಲ್ಲಾ ಕೊಡಿಸಲೇಕು. ಇಲ್ಲಾಂದ್ರೆ ಮನೆಯ ಸಾಮಾನುಗಳನ್ನೆಲ್ಲಾ ಚೆಲ್ಲಾಪಿಲ್ಲಿ ಮಾಡಿ ಬಿಡ್ತಾನೆ” ಎನ್ನುತ್ತಾರೆ ತಾಯಿ ಸುಶೀಲಮ್ಮ.

“ಅಯ್ಯೋ ನಮ್ಮ ಸೌಮ್ಯನೂ ಹಾಗೇ ಕಣ್ರೀ. ಅವಳು ಯಾವಾಗ್ಲೂ ಟಿ.ವಿ. ನೋಡ್ತಾನೆ ಇರ್ತಾಳೆ. ಈ ಬಾರಿ ದ್ವಿತೀಯ ಪಿ.ಯು.ಸಿ ಪರೀಕ್ಷೆಯಲ್ಲಿ ಹೇಗೆ ಬರೀತಾಳೋ” ಎಂದು ಅಲವತ್ತುಕೊಂಡ್ರು ಸೌಮ್ಯಳ ತಾಯಿ ವಿಶಾಲಮ್ಮ.

“ಈಗಿನ ಮಕ್ಕಳಂತೂ ತಂದೆ ತಾಯಿ ಮಾತು ಕೇಳೋದೇ ಇಲ್ಲ. ಯಾವಾಗ್ಲೂ ಮೊಬೈಲ್‍ನಲ್ಲೇ ಕಳೆದು ಹೋಗ್ತಾರೆ” ಎನ್ನುತ್ತಾರೆ ಮುನಿವೆಂಕಟಪ್ಪ.

ಇಂತಹ ಅದೆಷ್ಟೋ ಮಾತುಗಳು ದಿನನಿತ್ಯವೂ ನಮ್ಮ ಕಿವಿಮೇಲೆ ಬೀಳುತ್ತಲೇ ಇರುತ್ತವೆ ಅಥವಾ ಇಂತಹ ಸಮಸ್ಯೆಯನ್ನು ಪ್ರತಿ ಪೋಷಕರೂ ಅನುಭವಿಸಿಯೇ ಇರುತ್ತಾರೆ. ಇದಕ್ಕೆಲ್ಲಾ ಕಾರಣ ಏನು ಹುಡುಕಿ ಹೊರಟರೆ ಅದು ಸುತ್ತಿ ಬಂದು ನಿಲ್ಲುವುದೇ ನಮ್ಮಲ್ಲಿ. ಆಶ್ಚರ್ಯವಾಗುತ್ತಿದೆಯೇ? ಹೌದು. ನಾವು ನಮ್ಮ ಮಕ್ಕಳನ್ನು ಬೆಳೆಸುವ ರೀತಿ ಸರಿ ಇದೆಯೇ? ಒಮ್ಮೆ ಪ್ರಶ್ನಿಸಿಕೊಳ್ಳೊಣ. ಮಕ್ಕಳನ್ನು ಬೆಳೆಸುವ ವಿಚಾರದಲ್ಲಿ ಖಂಡಿತವಾಗಿ ನಾವು ಅನೇಕ ತಪ್ಪುಗಳನ್ನು ಮಾಡುತ್ತಿದ್ದೇವೆ. 

ಇಂದಿನ ಜಂಜಡದ ಜೀವನದಲ್ಲಿ ಮಕ್ಕಳ ಪಾಲನೆಯನ್ನು ಕಡೆಗಣಿಸಿದ್ದೇವೆ. ವೃತ್ತಿ ಜೀವನ ಹಾಗೂ ವೈಯಕ್ತಿಕ ಜೀವನದ ಮಧ್ಯ ಅಂತರ ಹೆಚ್ಚುತ್ತಿದೆ. ಮಕ್ಕಳೊಂದಿಗೆ ಕಾಲ ಕಳೆಯಲು ಪುರುಸೊತ್ತು ಇಲ್ಲದಾಗಿದೆ. ಹಾಗಾಗಿ ನಮ್ಮ ಮಕ್ಕಳು ನಮ್ಮ ಮಾತು ಕೇಳದ ಸ್ಥಿತಿ ಬಂದೊದಗಿದೆ. 

ಪೋಷಕರಾದ ನಾವು ಮಕ್ಕಳ ವರ್ತನೆಗಳನ್ನು ಬದಲಾಯಿಸುವ ಮೊದಲು ನಮ್ಮ ವರ್ತನೆಗಳನ್ನು ಪರಿಶೀಲಿಸುವ ಅಗತ್ಯವಿದೆ. ಏಕೆಂದರೆ ನಮ್ಮ ವರ್ತನೆಗಳು ಮಕ್ಕಳಲ್ಲಿ ಪ್ರತಿಫಲಿಸುತ್ತವೆ ಅಲ್ಲವೇ? ನಮ್ಮ ಪ್ರತಿ ನಡವಳಿಕೆಗಳನ್ನು ಸದಾ ಅವರು ಗಮನಿಸುತ್ತಿರುತ್ತಾರೆ ಮತ್ತು ಅನುಸರಿಸುತ್ತಾರೆ. ಜ್ಞಾನದ ಕೊರತೆಯಿಂದಲೋ ಅಥವಾ ನಮ್ಮ ನಿರ್ಲಕ್ಷತನದಿಂದಲೋ ಮಕ್ಕಳು ಸ್ವೀಕಾರಾರ್ಹವಲ್ಲದ ವರ್ತನೆಗಳನ್ನು ತೋರುತ್ತೇವೆ. ಮಕ್ಕಳ ಭಾವನೆಗಳಿಗೆ ಆಧ್ಯತೆ ನೀಡಲು ವಿಫಲರಾಗುತ್ತೇವೆ. ನಮ್ಮ ಮಕ್ಕಳನ್ನು ಸುಧಾರಿಸುತ್ತೇವೆ ಎಂಬ ಅಂಧವಿಶ್ವಾಸದಿಂದ ಮಕ್ಕಳ ಪ್ರತಿಭೆಯನ್ನು ಹಾಳು ಮಾಡುತ್ತೇವೆ. 

ಕೆಲವು ವೇಳೆ ನಮ್ಮಲ್ಲಿನ ಮಾನಸಿಕ ಒತ್ತಡವನ್ನು ಅನಾವಶ್ಯಕವಾಗಿ ಮಕ್ಕಳ ಮೇಲೆ ಪ್ರದರ್ಶಿಸುತ್ತೇವೆ. ಮಕ್ಕಳೊಂದಿಗೆ ಸಂವಾದ ನಡೆಸುವ ಪರಿಪಾಠವನ್ನು ನಾವಿನ್ನೂ ಬೆಳೆಸಿಕೊಂಡಿಲ್ಲ. ಮಕ್ಕಳ ಕನಸಿಗೆ ಬಣ್ಣ ಹಚ್ಚುವ ಬದಲು ನಮ್ಮ ನಿರೀಕ್ಷೆಗಳಿಗೆ ಬೃಹದಾಕಾರ ನೀಡುತ್ತೇವೆ. ಆ ನಿರೀಕ್ಷೆಗಳನ್ನು ಒತ್ತಾಯಪೂರ್ವಕವಾಗಿ ಮಕ್ಕಳ ಮೇಲೆ ಹೇರುತ್ತೇವೆ. ಮಕ್ಕಳ ಬೇಕು ಬೇಡಗಳನ್ನು ಆಲಿಸುವ ಕನಿಷ್ಟ ಶಿಷ್ಟಾಚಾರ ನಮ್ಮಲ್ಲಿ ಬೆಳೆದಿಲ್ಲ. ಹೀಗೆ ನಮ್ಮೆಲ್ಲ ತಪ್ಪುಗಳಿಂದಾಗಿ ಭವಿಷ್ಯದಲ್ಲಿ ನಮ್ಮ ಮಕ್ಕಳಿಗೆ ನಾವೇ ಶತೃಗಳಾಗುವ ಸಾಧ್ಯತೆ ಹೆಚ್ಚು. ಮಕ್ಕಳ ಉತ್ತಮ ಭವಿಷ್ಯಕ್ಕಾಗಿ ಶ್ರಮಿಸುತ್ತಿರುವ ಪ್ರತಿಯೊಬ್ಬ ಪಾಲಕರೂ ಪರ್ಯಾಯ ವರ್ತನಾ ತಂತ್ರಗಳನ್ನು ಅಳವಡಿಸಿಕೊಳ್ಳಲೇಬೇಕು. 

ಅನುಸರಿಸಬೇಕಾದ ವರ್ತನಾ ತಂತ್ರಗಳು

ಭಾಗೀದಾರರಾಗಿ : ಮಗುವಿನ ಪ್ರತಿದಿನದ ಕಲಿಕೆ, ಆಟ, ಪಾಠ ಇತ್ಯಾದಿ ಚಟುವಟಿಕೆಗಳಲ್ಲಿ ಭಾಗೀದಾರರಾಗಿ. ಮಕ್ಕಳು ತಮ್ಮ ಅನುಭವಗಳನ್ನು ಹಂಚಿಕೊಳ್ಳಲು ಅವಕಾಶ ನೀಡಿ. ಕ್ಲಿಷ್ಟತೆ ನಿವಾರಣೆಗೆÉ ಸಹಾಯ ಮಾಡಿ. 

ಸಮಯ ಹೊಂದಿಸಿಕೊಳ್ಳಿ : ಮಕ್ಕಳ ಪಠ್ಯ ಮತ್ತು ಪಠ್ಯೇತರ ಚಟುವಟಿಕೆಗಳಿಗೆ ಸಮಯ ನಿಗದಿಗೊಳಿಸುವಂತೆ ಮಕ್ಕಳೊಂದಿಗೆ ಕಾಲ ಕಳೆಯಲು ಸಮಯ ಹೊಂದಿಸಿಕೊಳ್ಳಿ. ಹೊಂವರ್ಕ್ ಮಾಡಲು, ಪ್ರೋಜೆಕ್ಟ್ ತಯಾರಿಸಲು ಸಹಾಯಮಾಡಿ. ರಾತ್ರಿ ಊಟದ ವೇಳೆ ಅವರೊಂದಿಗೆ ಊಟ ಮಾಡುತ್ತಾ ಉತ್ತಮ ಆಹಾರ ಸೇವನಾ ವಿಧಾನಗಳನ್ನು ತಿಳಿಸಿಕೊಡಿ. 

ದ್ವಂದ್ವ ಬೇಡ : ಮಗುವಿಗೆ ಹೇಳುವ ಬೋಧನೆ ನಿಖರವಾಗಿರಲಿ. ದ್ವಂದ್ವ ಅಥವಾ ಅನುಮಾನಾಸ್ಪದ ಹೇಳಿಕೆಗಳು ಬೇಡ. ನಮ್ಮ ಬೋಧನೆಗೂ ಮತ್ತು ವರ್ತನೆಗೂ ಸಾಮ್ಯತೆ ಇರಲಿ. ‘ಹೇಳುವುದು ಒಂದು ಮಾಡುವುದು ಇನ್ನೊಂದು’ ಎನ್ನುವಂತಾಗಬಾರದು. ನಮ್ಮ ವರ್ತನೆಯಲ್ಲಿ ನಿಖರತೆ ಇರಲಿ ಮತ್ತು ಅನುಸರಿಸುವ ಕ್ರಮದ ಸರಿಯಾದ ವಿವರಣೆ ಇರಲಿ.

ಸ್ನೇಹ ಬಳಗದ ಮೇಲೆ ಗಮನ ಇರಲಿ : ಬಹುತೇಕ ಪಾಲಕರು ತಮ್ಮ ಮಗುವಿನ ಸ್ನೇಹ ಬಳಗವನ್ನು ಸಂಪೂರ್ಣವಾಗಿ ಕಡೆಗಣಿಸಿರುತ್ತಾರೆ. ಇದು ತಪ್ಪು. ಉತ್ತಮ ಸ್ನೇಹಿತರನ್ನು ಆಯ್ಕೆ ಮಾಡಿಕೊಳ್ಳುವಲ್ಲಿ ಪಾಲಕರು ಸಹಾಯ ಮಾಡಬೇಕು. ಮಕ್ಕಳು ಸ್ನೇಹಿತರನ್ನು ಎಲ್ಲಿ, ಯಾವಾಗ, ಏತಕ್ಕಾಗಿ ಭೇಟಿಯಾದರು ಎಂಬ ಬಗ್ಗೆ ಮಾಹಿತಿ ಇರಬೇಕು. ತಪ್ಪಿದಾಗ ಬುದ್ದಿ ಹೇಳಬೇಕು.

ಗೌರವಿಸುವುದನ್ನು ಕಲಿಯೋಣ : ಮಕ್ಕಳ ಭಾವನೆಗಳು ಮತ್ತು ಅನಿಸಿಕೆಗಳಿಗೆ ಗೌರವ ಕೊಡುವುದು ಮುಖ್ಯ. ಅವರಿನ್ನೂ ಚಿಕ್ಕವರು, ಕೇವಲ ಮಾರ್ಗದರ್ಶನ ಪಡೆಯುವವರು ಎಂದು ನಿರ್ಲಕ್ಷಿಸುವುದು ಬೇಡ. ನಿರ್ಧಾರ ಮತ್ತು ಆಯ್ಕೆಯ ವಿಧಾನಗಳನ್ನು ಮಾತ್ರ ಅವರಿಗೆ ತಿಳಿಸೋಣ. ನಿರ್ಧಾರ ಮತ್ತು ಆಯ್ಕೆಯನ್ನು ಅವರಿಗೇ ಬಿಡೋಣ. 

ಹೋಲಿಕೆ ಬೇಡ : ವಿನಾಕಾರಣ ಮಗುವನ್ನು ಇನ್ನೊಂದು ಮಗುವಿನೊಂದಿಗೆ ಹೋಲಿಸುವುದು ಸರಿಯಲ್ಲ. ಪ್ರತೀ ಮಗುವಿನ ಆಸಕ್ತಿ, ಸಾಮಥ್ರ್ಯ ಮತ್ತು ಪ್ರತಿಭೆಗಳು ವಿಭಿನ್ನವಾಗಿರುತ್ತವೆ. ಕೌಟುಂಬಿಕ ಮತ್ತು ಸಾಮಾಜಿಕ ಪರಿಸರ, ಅನುಭವ, ಸಂಸ್ಕøತಿ, ಆಚಾರ ವಿಚಾರಗಳು ಪ್ರತೀ ಮಗುವಿನಲ್ಲೂ ವಿಭಿನ್ನವಾಗಿರುತ್ತವೆ. ಒಂದು ಮಗು ತರಗತಿ ಕಲಿಕೆಯಲ್ಲಿ ಮುಂದಿದ್ದರೆ ಇನ್ನೊಂದು ಮಗು ತರಗತಿ ಹೊರಗಿನ ಕಲಿಕೆಯಲ್ಲಿ ಮುಂದಿರುತ್ತದೆ. ಹಾಗಾಗಿ ಒಂದು ಮಗುವಿನೊಂದಿಗೆ ಇನ್ನೊಂದು ಮಗುವಿನ ಹೋಲಿಕೆ ಸರಿಯಲ್ಲ.

ಅವಾಸ್ತವಿಕ ನಿರೀಕ್ಷೆ ಬೇಡ : ಮಗುವಿಗೆ ಸಮಯ ಮತ್ತು ಅಧ್ಯಯನ ವಾತಾವರಣ ಮಾತ್ರ ನಿರ್ಮಿಸಿಕೊಡಿ. ಅವರ ಮೇಲೆ ಅತಿಯಾದ ಅನಗತ್ಯವಾದ ನಿರೀಕ್ಷೆ ಮತ್ತು ಒತ್ತಡ ಬೇಡ. ಇದು ಮಗುವಿನ ಮಾನಸಿಕ ಸ್ಥಿತಿಯ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ. 

ವಿವರಿಸಿ ಸರಿಪಡಿಸಿ : ಮಕ್ಕಳಲ್ಲಿ ಅಹಿತಕರ ವರ್ತನೆ ಕಂಡು ಬಂದಲ್ಲಿ ಅದರ ಬಗ್ಗೆ ವಿವರಿಸಿ ಸರಿಪಡಿಸಿ. ಅಧಿಕಾರಯುತವಾಗಿ ಪಾಲಕರ ಶೈಲಿಯಲ್ಲಿ ಸರಿಪಡಿಸದೇ ಸ್ನೇಹಿತರ ಶೈಲಿಯಲ್ಲಿ ಸರಿಪಡಿಸಿ. ಇದು ಸ್ವಾಭಾವಿಕವಾಗಿ ಮುಂದಿನ ತಪ್ಪುಗಳನ್ನು ಕಡಿಮೆ ಮಾಡುತ್ತದೆ. 

ಶಿಕ್ಷೆ ಮತ್ತು ನಿಯಂತ್ರಣ : ಮಕ್ಕಳಿಗೆ ಕಠೋರ ಶಿಕ್ಷೆಯಾಗಲಿ ಅಥವಾ ಕಟ್ಟುನಿಟ್ಟಿನ ನಿಯಂತ್ರಣವಾಗಲೀ ಬೇಡ. ಇವು ಮಕ್ಕಳಲ್ಲಿ ಆಕ್ರಮಣಕಾರಿ  ಮತ್ತು ಕ್ರಾಂತಕಾರಕ ವರ್ತನೆಗೆ ಕಾರಣವಾಗುತ್ತವೆ. ಶಿಕ್ಷೆ ಮತ್ತು ನಿಯಂತ್ರಣ ಹಾಕುವಾಗ ಅವರೂ ಕೂಡಾ ನಮ್ಮಂತೆ ಮನುಷ್ಯರು ಎಂಬ ಭಾವನೆಯಿರಲಿ. 

ಪ್ರಜಾಸತ್ತಾತ್ಮಕ ವಾತಾವರಣ ನಿರ್ಮಿಸಿ : ಪ್ರಜಾಸತ್ತಾತ್ಮಕ ತತ್ವಗಳಾದ ಸ್ವಾತಂತ್ರ, ಸಮಾನತೆ, ಭ್ರಾತೃತ್ವ, ಇತ್ಯಾದಿಗಳನ್ನು ಕುಟುಂಬದ ಸದಸ್ಯರು ಕಡ್ಡಾಯವಾಗಿ ಅನುಸರಿಸುವ ಮೂಲಕ ಉತ್ತಮ ನಾಗರಿಕರನ್ನು ಬೆಳೆಸೋಣ. ದೇಶದ ಏಳಿಗೆ ಕುಟುಂಬದಿಂದಲೇ ಪ್ರಾರಂಭವಾಗಲು ಕೈಜೋಡಿಸೋಣ.

ಮೇಲಿನ ಅಂಶಗಳಿಂದ ನಮಗೊಂದು ಸ್ಪಷ್ಟ ಚಿತ್ರಣ ದೊರೆತಿದೆ. ನಮ್ಮಿಂದ ಆಗಬಹುದಾದ ತಪ್ಪುಗಳನ್ನು ನಿಲ್ಲಿಸಿ ಮಗುವಿನ ಸರ್ವಾಂಗೀಣ ಬೆಳವಣಿಗೆಗೆ ನಮ್ಮದೇ ಆದ ಕೊಡುಗೆ ನೀಡೋಣ. ಏಕೆಂದರೆ ನಮ್ಮ ಭವಿಷ್ಯ ನಮ್ಮ ಮಕ್ಕಳ ಕೈಯಲ್ಲಿದೆ. ಆದ್ದರಿಂದ ನಮ್ಮ ವರ್ತನೆಗಳು ಬದಲಾಗಬೇಕು. ಅವು ನಮ್ಮ ಮಕ್ಕಳ ವ್ಯಕ್ತಿತ್ವವನ್ನು ಉತ್ತಮ ಪಡಿಸುವಂತಾಗಬೇಕು.

ಆರ್.ಬಿ.ಗುರುಬಸವರಾಜ

ಪಿ.ಎಚ್.ಡಿ. PHD

 ದಿನಾಂಕ 16-12-2015 ರ ವಿಜಯವಾಣಿಯಲ್ಲಿ ಪ್ರಕಟವಾದ ಲೇಖನ.

ಪಿ.ಎಚ್.ಡಿ. ಪಡೆಯೋಕೆ ರೆಡಿ ಆಗಿ

    ಪ್ರತಿಯೊಬ್ಬ ಪದವೀಧರರಿಗೂ ಡಾಕ್ಟರ್ ಆಗಬೇಕೆಂಬ ಹಂಬಲ ಸಹಜ. ಆದರೆ ಬಹುತೇಕರು ಪದವಿ ಮುಗಿಸುವುದೇ ಒಂದು ಮಹತ್ಸಾಧನೆ ಎಂದು ಭಾವಿಸಿ ಅಲ್ಲಿಗೆ ತಮ್ಮ  ವ್ಯಾಸಂಗವನ್ನು ಸ್ಥಗಿತಗೊಳಿಸುತ್ತಾರೆ. ಆದರೆ ನಿಜವಾದ ಪದವಿಯ ಸೌಭಾಗ್ಯ ಮತ್ತು ಹೆಮ್ಮೆ ಇರುವುದು ಮುಂದಿನ ಅಧ್ಯಯನದಲ್ಲಿ ಎಂಬುದನ್ನು ಮರೆಯುತ್ತಾರೆ. ಅಂತಹ ಪದವಿ ಎಂದರೆ ಪಿ.ಎಚ್.ಡಿ ಪದವಿ. ಪಿ.ಎಚ್.ಡಿ ಪದವಿ ಹೊಂದುವ ಮೂಲಕ ನೀವೂ ಡಾಕ್ಟರೇಟ್ ಆಗಬಹುದು.
    ಪಿ.ಎಚ್.ಡಿ ಅಥವಾ ಡಾಕ್ಟರೇಟ್ ಎನ್ನುವುದು ಒಂದು ಉನ್ನತ ಮತ್ತು ಮಹತ್ವದ ಶೈಕ್ಷಣಿಕ ಅರ್ಹತೆಯಾಗಿದೆ. ಪಿ.ಎಚ್.ಡಿ ಪದವಿಯು ಉದ್ಯೋಗ ಮತ್ತು ವೃತ್ತಿ ಪರಿಣತಿಯಲ್ಲಿ ಉತ್ತಮ ಹೆಸರು ಗಳಿಸಲು ಅತ್ಯುತ್ತಮ ಪದವಿಯಾಗಿದೆ.
    ವೃತ್ತಿಪರ ಕೌಶಲ್ಯತೆಗಳು ಸೇವಾ ಅನುಭವದಿಂದ ಬೆಳೆಯುತ್ತವೆಯೇ ಹೊರತು ಕ್ರಮಾಗತ ಸಂಶೋಧನೆಯಿಂದಲ್ಲ. ಆದರೆ ಪಿ.ಎಚ್.ಡಿ ಪದವಿ ಪಡೆಯುವುದರಿಂದ ಅಧ್ಯಯನ ಮತ್ತು ಸಂಶೋಧನಾ ಪ್ರವೃತ್ತಿ ಬೆಳೆಯುತ್ತದೆ ಹಾಗೂ ಪ್ರತಿಯೊಂದು ಸಮಸ್ಯೆಗಳನ್ನೂ ವೈಜ್ಞಾನಿಕ ತತ್ವಗಳ ಆಧಾರದ ಮೇಲೆ ಪರಿಹರಿಸಿಕೊಳ್ಳುವ ಗುಣಗಳು ಮೂಡುತ್ತವೆ. ಆದ್ದರಿಂದ ಪಿ.ಎಚ್.ಡಿ ಪದವಿಧರರಿಗೆ ಪ್ರತಿ ಕ್ಷೇತ್ರದಲ್ಲೂ ಸಾಕಷ್ಟು ಬೇಡಿಕೆ ಇದೆ.

ಪಿ.ಎಚ್.ಡಿ. ಏಕೆ?

ಗಮನಾರ್ಹವಾದುದನ್ನು ಸಾಧಿಸಲು : ಕೆಲವರು ಹಣ ಗಳಿಸಿ ಹೆಸರು ಗಳಿಸಬಹುದು. ಆದರೆ ಅದು ಕೇವಲ ಹಣ ಇರುವವರೆಗೆ ಮಾತ್ರ. ಪಿ.ಎಚ್.ಡಿ ಪದವಿಯು ಹಣ ಗಳಿಕೆಯ ಮಾರ್ಗವಲ್ಲ. ಬದಲಾಗಿ ಉನ್ನತ ಹೆಸರು ಮತ್ತು ಸಾಮಾಜಿಕ ಗೌರವ, ಸ್ಥಾನಮಾನ ಗಳಿಕೆಯ ಸಾಧನವಾಗಿದೆ. ಇತರರಿಗಿಂತ ಭಿನ್ನವಾದ ಸಾಧನೆಯ ಮಾರ್ಗವಾಗಿದೆ. ಗಮನಾರ್ಹವಾದುದನ್ನು ಸಾಧಿಸಬಯಸುವವರಿಗೆ ಪಿ.ಎಚ್.ಡಿ ಉತ್ತಮ ಪದವಿಯಾಗಿದೆ.

ಹೊಸದನ್ನು ಕಲಿಯಲು : ಮಗುವಿನಂತಹ ಕುತೂಹಲ ಇಲ್ಲದೇ ಯಾರೂ ಮಹಾನ್ ಸಂಶೋಧಕರಾಗಲು ಸಾಧ್ಯವಿಲ್ಲ. ಅಂತಹ ಕುತೂಹಲಗಳ ಹಾದಿಯಲ್ಲಿ ಪಯಣಿಸಿ ವಿಶೇಷವಾದುದನ್ನು ಸಂಶೋಧಿಸಿಲು ಪಿ.ಎಚ್.ಡಿ ಪದವಿಯೊಂದೇ ಮಾರ್ಗ. ಅಂತಹ ಅನ್ವೇಷಕ ಶಕ್ತಿಗೆ ಕುತೂಹಲದ ಕಲಿಕೆ ಮುಖ್ಯ. ಪರಿಪೂರ್ಣ ಕಲಿಕಾರ್ಥಿ ಆಗದ ಹೊರತು ಸಂಶೋಧಕನಾಗಲು ಸಾಧ್ಯವಿಲ್ಲ.
ವೈಯಕ್ತಿಕ ಹಾಗೂ ವೃತ್ತಿ ಜೀವನ ಸುಧಾರಿಸಲು : ಪಿ.ಎಚ್.ಡಿ ಪದವಿಯಿಂದ ಕೇವಲ ಉನ್ನತ ಹೆಸರು ಮಾತ್ರವಲ್ಲ ಬದಲಾಗಿ ವೃತ್ತಿ ಸಾಮಥ್ರ್ಯಗಳ ಅಭಿವೃದ್ದಿ ಆಗುತ್ತದೆ. ಈ ಸಾಮಥ್ರ್ಯಗಳು ವೃತ್ತಿ ಜೀವನವನ್ನು ಸುಂದರವಾಗಿಸುತ್ತದೆ ಜೊತೆಗೆ ವೈಯಕ್ತಿಕ ಜೀವನವನ್ನೂ ಸಹ ಸುಧಾರಿಸುತ್ತದೆ.
ಸಮಸ್ಯೆಗಳಿಗೆ ಪರಿಹಾರ : ಸಂಶೋಧನಾ ಅಭ್ಯರ್ಥಿಗೆ ಸಮಸ್ಯೆಗಳೇ ಇರುವುದಿಲ್ಲ. ಬಂದರೂ ಅದನ್ನು ಸುಲಭವಾಗಿ ಪರಿಹರಿಸಿಕೊಳ್ಳುವ ವೈಜ್ಞಾನಿಕ ಮಾರ್ಗಗಳು ಸಿದ್ದಿಸಿರುತ್ತವೆ. ಇದರಿಂದಾಗಿ ಡಾಕ್ಟರೇಟ್ ಪಡೆದವರು ವೃತ್ತಿಯಲ್ಲಿ ಎಂದಿಗೂ ಸೋಲನ್ನು ಅನುಭವಿಸುವುದಿಲ್ಲ. ಅವರಲ್ಲಿನ ಆತ್ಮವಿಶ್ವಾಸ ಹಾಗೂ ಉತ್ತಮ ಸಂವಹನ ಕೌಶಲ್ಯಗಳಿಂದ ಸಂತೋಷದಾಯಕ ಜೀವನ ಕಳೆಯುತ್ತಾರೆ.
ವಿಷಯದ ಆಳ ಅರಿಯಲು : ಪಿ.ಎಚ್.ಡಿ.ಯಲ್ಲಿ ಕೈಗೊಳ್ಳುವ ಚಿಕ್ಕ ಚಿಕ್ಕ ಸಂಶೋಧನೆಗಳು ನಿಮ್ಮನ್ನು ಉನ್ನತ ಹಂತಕ್ಕೆ ಬೆಳೆಸುತ್ತವೆ. ಜೊತೆಗೆ ವಿಷಯದ ಕುರಿತ ಆಳವಾದ ಜ್ಞಾನವನ್ನು ಮೂಡಿಸುತ್ತವೆ. ವಿಷಯದ ಪರಿಣತೆಯಿಂದಾಗಿ ನೀವೊಬ್ಬ ಆತ್ಯಾಕರ್ಷಕ ವ್ಯಕ್ತಿಯಾಗಿ ಹೊರಹೊಮ್ಮುತ್ತೀರಿ.
ನೈಜ ಜಗತ್ತಿನ ಅನಾವರಣ : ಸಂಶೋಧನೆಗಳನ್ನು ಕೈಗೊಳ್ಳಲು ಸಾಕಷ್ಟು ಅಧ್ಯಯನ ಹಾಗೂ ವಿವಿಧ ವ್ಯಕ್ತಿಗಳ ಭೇಟಿಯಿಂದಾಗಿ ನೈಜ ಜಗತ್ತಿನ ಅರಿವಾಗುತ್ತದೆ.


ವಿದ್ಯಾರ್ಹತೆ : ಪಿ.ಎಚ್.ಡಿ. ಪದವಿ ಪಡೆಯಲು ಯಾವುದಾದರೂ ವಿಶ್ವವಿದ್ಯಾಲಯದಿಂದ ಸ್ನಾತಕ ಪದವಿ ಪಡೆದಿರಬೇಕು. ಸಾಮಾನ್ಯ ಅಭ್ಯರ್ಥಿಗಳು ಶೇಕಡಾ 55 ಹಾಗೂ ಪ.ಜಾ, ಪ.ಪಂ, ಪ್ರ ವರ್ಗ-1 ಹಾಗೂ ಅಂಗವಿಕಲ ಅಭ್ಯರ್ಥಿಗಳು ಶೇಕಡಾ 50 ಅಂಕಗಳೊಂದಿಗೆ ಸ್ನಾತಕ ಪದವಿ ಪಡೆದಿರಬೇಕು.
    ಪ್ರವೇಶ ಪರೀಕ್ಷೆ : ಪಿ.ಎಚ್.ಡಿ ಪದವಿಗಾಗಿ ಅವಶ್ಯಕ ವಿದ್ಯಾರ್ಹತೆ ಹೊಂದಿದ ಅಭ್ಯರ್ಥಿಗಳನ್ನು ಪ್ರವೇಶ ಪರೀಕ್ಷೆ ಮೂಲಕ ಆಯ್ಕೆ ಮಾಡಲಾಗುತ್ತದೆ. ಈಗಾಗಲೇ ಯು.ಜಿ.ಸಿ, ನೆಟ್, ಸ್ಲೆಟ್, ಗೇಟ್, ಎಂ.ಫಿಲ್ ಪ್ರವೇಶ ಪರೀಕ್ಷೆಗಳಲ್ಲಿ ಉತ್ತೀರ್ಣರಾದ ಅಭ್ಯರ್ಥಿಗಳು ಪಿ.ಎಚ್.ಡಿ. ಪದವಿಗೆ ಪ್ರವೇಶ ಪರೀಕ್ಷೆ ಬರೆಯುವ ಅಗತ್ಯವಿಲ್ಲ. ಪ್ರವೇಶ ಪರೀಕ್ಷೆಯ ಪ್ರಶ್ನೆಗಳು ಬಹು ಆಯ್ಕೆಯ ಸ್ವರೂಪದಲ್ಲಿದ್ದು, 100 ಪ್ರಶ್ನೆಗಳಿಗೆ 100 ಅಂಕಗಳು ನಿಗದಿಯಾಗಿರುತ್ತದೆ. ಇದರಲ್ಲಿ 50 ಅಂಕಗಳು ವಿಷಯದ ಅಧ್ಯಯನ ವಿಧಾನ ಹಾಗೂ 50 ಅಂಕಗಳು ಆಯ್ಕೆ ಮಾಡಿಕೊಂಡ ವಿಷಯದ ಜ್ಞಾನಕ್ಕೆ ಸಂಬಂಧಿಸಿರುತ್ತವೆ.
    ಪ್ರವೇಶ ಪರೀಕ್ಷಾ ಶುಲ್ಕ : ಆಯಾ ವಿಶ್ವವಿದ್ಯಾಲಯದ ನಿಯಮಾವಳಿಗೆ ತಕ್ಕಂತೆ ಶುಲ್ಕದಲ್ಲಿ ಬದಲಾವಣೆ ಇರುತ್ತದೆ. ಆದಗ್ಯೂ 500 ರೂ.ಗಳಿಂದ 750 ರೂ.ಗಳವರೆಗೆ ಶುಲ್ಕ ಇರುತ್ತದೆ.

   

ಹೀಗಿರಲಿ ಪಿ.ಎಚ್.ಡಿ!

    ಪಿ.ಎಚ್.ಡಿ ಎಂಬುದು ಕೇವಲ ಪದವಿಯಲ್ಲ. ಇದೊಂದು ಸಂಶೋಧನಾ ವಿಧಾನ. ಭವಿಷ್ಯದ ಮಾರ್ಗದರ್ಶಿ. ನಿಮ್ಮ ವೃತ್ತಿ ಹಾಗೂ ಪ್ರವೃತ್ತಿಯ ಪ್ರತೀಕ. ಹಾಗಾಗಿ ಪಿ.ಎಚ್.ಡಿ ಮಾಡುವಾಗ ಕೆಲವು ಕಟ್ಟುನಿಟ್ಟಿನ ಕ್ರಮಗಳು ಅಗತ್ಯ.
ಸಕ್ರಿಯತೆ ಇರಲಿ : ಪಿ.ಎಚ್.ಡಿ.ಯಲ್ಲಿ ಸಂಶೋಧನೆಗೆ ಪ್ರಮುಖ ಪ್ರಾಧಾನ್ಯತೆ ಇದ್ದು, ಸಂಶೋಧನೆಗೆ ವಿಷಯ ಆಯ್ಕೆ ಮಾಡುವಾಗ ಜಾಗ್ರತೆ ಇರಲಿ. ವಿಷಯದ ಕುರಿತ ಸಕ್ರಿಯವಾಗಿ ಸಂಶೋಧನೆ ಕೈಗೊಳ್ಳಿ. ವಿಷಯದ ಮಾಹಿತಿಗಾಗಿ ಪುಸ್ತಕಗಳು, ಸ್ಥಳಗಳು, ವ್ಯಕ್ತಿಗಳು, ಸಂಸ್ಥೆಗಳು ಹೀಗೆ ಎಲ್ಲೆಲ್ಲಿ ಮಾಹಿತಿ ಪಡೆಯಲು ಸಾಧ್ಯವೋ ಅವುಗಳಲ್ಲೆಲ್ಲಾ ಸಕ್ರಿಯವಾಗಿ ಭಾಗವಹಿಸಿ ಮಾಹಿತಿ ಸಂಗ್ರಹಿಸಿ.
ನಿರ್ದಿಷ್ಟತೆ ಇರಲಿ : ಬಹುತೇಕ ವಿದ್ಯಾರ್ಥಿಗಳಿಗೆ ಪಿ.ಎಚ್.ಡಿ ಸೇರುವವರೆಗೂ ತಾವೇನು ಸಂಶೋಧಿಸಬೇಕೆಂಬ ಬಗ್ಗೆ ನಿಖರ  ಕಲ್ಪನೆ ಇರುವುದಿಲ್ಲ. ಗೊತ್ತು ಗುರಿ ಇಲ್ಲದ ಪದವಿಯು  ಪರಿಪೂರ್ಣ ಶಿಕ್ಷಣ ಅಲ್ಲ. ಹಾಗಾಗಿ ಪದವಿ ಹಂತದಲ್ಲಿಯೇ ಮುಂದಿನ ಗುರಿಯ ಬಗ್ಗೆ ಕನಸು ಕಾಣಬೇಕು ಹಾಗೂ ಅದನ್ನು ಸಾಕಾರಗೊಳಿಸುವ ಮಾರ್ಗಗಳ ಕುರಿತು ಮಾಹಿತಿ ಸಂಗ್ರಹಿಸಬೇಕು. ಏಕೆಂದರೆ ಅದೊಂದು ನೈಪುಣ್ಯದ ಸಂಶೋಧನೆ. ಪಿ.ಎಚ್.ಡಿ ಕಾರ್ಯಕ್ರಮದ ಕೊನೆಗೆ ನಿಮ್ಮ ನೈಪುಣ್ಯಕ್ಕೆ ಅಭೂತಪೂರ್ವ ಬೆಲೆ, ಗೌರವ, ಮನ್ನಣೆ ಸಿಗಲಿದೆ. ಆದ್ದರಿಂದ ಪದವಿ ಹಂತದಲ್ಲಿರುವಾಗಲೇ ಸಂಶೋಧನೆಯ ತಂತ್ರ ಮತ್ತು ಸತ್ಯಶೋಧನೆಯ ಮಾರ್ಗಗಳನ್ನು ವಿನ್ಯಾಸಗೊಳಿಸಿಕೊಳ್ಳಿ.
ಕನಸಿಗೆ ಬಣ್ಣಕೊಡಿ : ಸಂಶೋಧನೆಗೆ ನಿರ್ದಿಷ್ಟ ವಿಷಯಗಳಿಲ್ಲ. ನಿಮ್ಮ ಆಸಕ್ತಿಯ ಯಾವುದೇ ಕ್ಷೇತ್ರದಲ್ಲಿ ಸಂಶೋಧನೆ ಕೈಗೊಳ್ಳಬಹುದು. ಆರೋಗ್ಯ, ಕೃಷಿ, ಶಿಕ್ಷಣ, ಕಲೆ, ಸಾಹಿತ್ಯ, ರಂಗಭೂಮಿ, ಸಿನೆಮಾ, ಜನಜೀವನ, ಆರ್ಥಿಕತೆ, ಸಂಸ್ಕøತಿ, ಇತಿಹಾಸ, ವಿಜ್ಞಾನ ಮತ್ತು ತಂತ್ರಜ್ಞಾನ ಹೀಗೆ ಯಾವುದೇ ವಿಷಯದ ಮೇಲೆ ಸಂಶೋಧನೆ ಕೈಗೊಳ್ಳಲು ಸಾಕಷ್ಟು ಅವಕಾಶಗಳಿವೆ. ಆದರೆ ನಿಮ್ಮ ಕನಸಿನ ಸಂಶೋಧನೆಗೆ ಶ್ರಮದ ಬಣ್ಣ ಕೊಟ್ಟು ಆಕರ್ಷಕವಾಗಿ ಸತ್ಯ ಶೋಧಿಸುವುದು ಮುಖ್ಯ.
ಸಂಪೂರ್ಣ ಮಾಹಿತಿ ಇರಲಿ : ಸಂಶೋಧನೆ ಕೈಗೊಳ್ಳುವ ವಿಷಯದ ಮೇಲೆ ಪ್ರಭುತ್ವ, ಹಿಡಿತ ಅಗತ್ಯ. ಗೊತ್ತಿರುವ ಕ್ಷೇತ್ರದಲ್ಲಿ ಗೊತ್ತಿಲ್ಲದ ಅಂಶಗಳನ್ನು ಹುಡುಕುವುದೇ ಪಿ.ಎಚ್.ಡಿ.ಯ ಮುಖ್ಯ ಉದ್ದೇಶ. ಆದ್ದರಿಂದ ಸಂಶೋಧನೆಗೆ ಆಯ್ಕೆ ಮಾಡಿಕೊಂಡ ಕ್ಷೇತ್ರದ ಸಂಪೂರ್ಣ ಮಾಹಿತಿ ಇರಲಿ. ಸಂಶೋಧನೆ ನೈಜ ಜಗತ್ತಿಗೆ ಸಂಬಂಧಿಸಿರಬೇಕು ಮತ್ತು ವೃತ್ತಿಪರರು ಬಳಸಲು ಮಾರ್ಗಸೂಚಿಯಾಗಬೇಕು. ಸಂಶೋಧನೆಯಲ್ಲಿ ಅಗತ್ಯವಾದ ಅಂಕಿ ಅಂಶಗಳಿರಲಿ ಮತ್ತು ವಿಶ್ಲೇಷಣಾತ್ಮಕ ಅಂಶಗಳಿರಲಿ.
ವೈವಿಧ್ಯಮಯ ಸಂಪರ್ಕ ಇರಲಿ : ಸಂಶೋಧನಾ ವಿಷಯಕ್ಕೆ ಸಂಬಂಧಿಸಿದ ಮುಖ್ಯ ವ್ಯಕ್ತಿಗಳು, ಸಂಘ-ಸಂಸ್ಥೆಗಳ ಸಂಪರ್ಕ ಅಗತ್ಯ. ಅಲ್ಲದೇ ಸಂಶೋಧನಾ ವರದಿ ಸಿದ್ದಪಡಿಸುವಲ್ಲಿ ಈ ಹಿಂದೆ ಸಂಶೋಧನೆ ಕೈಗೊಂಡ ಹಿರಿಯ ಮಾರ್ಗದರ್ಶಕರ ಸಂಪರ್ಕವೂ ಅಗತ್ಯ.
ಯೋಜಿತ ಯೋಜನೆ ಇರಲಿ : ಸಂಶೋಧನೆಗೆ ಸುವ್ಯವಸ್ಥಿತ ಯೋಜನೆ ಅತೀ ಮುಖ್ಯ. ಸಂಶೋಧನೆ ಪ್ರಾರಂಭದಿಂದ ವರದಿ ಸಲ್ಲಿಕೆವರೆಗಿನ ಕಾಲಾವಧಿಯಲ್ಲಿ ಕೈಗೊಳ್ಳಬೇಕಾದ ಕಾರ್ಯ ಚಟುವಟಿಕೆಗಳ ಯೋಜನೆ ಮತ್ತು ವೇಳಾಪಟ್ಟಿ ಪ್ರಮುಖವಾದದ್ದು. ಸಂಪರ್ಕಿಸಬೇಕಾದ ವ್ಯಕ್ತಿ, ಸ್ಥಳಗಳ ಕುರಿತ ಪಟ್ಟಿ, ನಮೂನೆಗಳು ಮಾಹಿತಿ ಸಂಗ್ರಹಣೆಯ ಆಕರಗಳು ಎಲ್ಲವನ್ನೂ ಯೋಜನೆಯಲ್ಲಿ ದಾಖಲಿಸಬೇಕು. ಯೋಜನೆಯ ವೇಳಾಪಟ್ಟಿಯಂತೆ ಕಾರ್ಯನಿರ್ವಹಿಸುವುದು ಅತೀಮುಖ್ಯ. ಏಕೆಂದರೆ ಸಂಶೋಧನೆಯನ್ನು ನಿರ್ದಿಷ್ಟ ಸಮಯದಲ್ಲಿ ಮುಕ್ತಾಯಗೊಳಿಸಿ ವರದಿ ಸಿದ್ದಪಡಿಸಿ ವಿಶ್ವವಿದ್ಯಾಲಯಕ್ಕೆ ಸಲ್ಲಿಸಬೇಕಾದ್ದರಿಂದ ಯೋಜಿತ ವೇಳಾಪಟ್ಟಿಯಂತೆ ಕಾರ್ಯನಿರ್ವಹಿಸುವುದು ಅಗತ್ಯ.
ವಿಶೇಷತೆ ಇರಲಿ : ಈಗಾಗಲೇ ಕೈಗೊಂಡ ಅನೇಕ ಸಂಶೋಧನಾ ಪ್ರಬಂಧಗಳ ಜೊತೆ ನಿಮ್ಮದೂ ಒಂದು ಆಗಬಾರದು. ಇತರರಿಗಿಂತ ಭಿನ್ನವಾದ ಆಕರ್ಷಕವಾದ ಸಂಶೋಧನಾ ಪ್ರಬಂಧ ನಿಮ್ಮದಾಗಬೇಕು. ಅದು ನಿಮ್ಮ ಶ್ರಮ, ಕೌಶಲ್ಯಗಳು, ಸೃಜನಾತ್ಮಕತೆ ಮತ್ತು ನಿಮ್ಮ ಸಮಯ ಪ್ರಜ್ಞೆಗಳನ್ನು ಅವಲಂಬಿಸಿರುತ್ತದೆ. ಸಾಧ್ಯವಾದಷ್ಟೂ ಭವಿಷ್ಯದಲ್ಲಿ ಎಲ್ಲರೂ ಉಪಯೋಗಿಸಲು ಸಾಧ್ಯವಾಗುವ ಸಂಶೋಧನಾ ವರದಿ ನಿಮ್ಮದಾಗಲಿ.

       ಸಂಶೋಧನೆಯು ಸಂಶೋಧಕನ  ಸೃಜನಾತ್ಮಕ ಆಸಕ್ತ ಅಧ್ಯಯನ ಕ್ಷೇತ್ರವಾಗಿರಬೇಕು. ಕೈಗೊಳ್ಳುವ ಸಂಶೋಧನೆಯ ಫಲಿತವು ಆಯಾ ಕ್ಷೇತ್ರದಲ್ಲಿ ಬಳಕೆಯಾಗಿ ಬದಲಾವಣೆಗೆ ಕಾರಣವಾಗಬೇಕು. ಹೊಸ ಹೊಳಹುಗಳಿಗೆ ನಾಂದಿಯಾಗಬೇಕು. ಹಿರಿಯ ಸಂಶೋಧಕ ಡಾ.ಎಂ. ಎಂ. ಕಲಬುರ್ಗಿಯವರು “ಸಂಶೋಧನೆಯೆಂಬುದು ಒಂದು ಸೃಜನಕ್ರಿಯೆಯಾಗಿದ್ದು ಅದು ಅಲ್ಪ ವಿರಾಮದಿಂದ ಅರ್ಧ ವಿರಾಮದವರೆಗೆ ನಡೆಯುತ್ತದೆ” ಎಂದಿದ್ದಾರೆ. ಹಾಗಾಗಿ ಆಯಾ ಕ್ಷೇತ್ರದಲ್ಲಿ ನಿರತವಾದ ಸಂಶೋಧನೆಯು ಪದವಿಯ ನಂತರವೂ ಮುಂದುವರಿಸಬೇಕು. ಮಕ್ಕಳಕ್ಷೇತ್ರ ಹಾಗೂ ಮಕ್ಕಳ ಶಿಕ್ಷಣ ಕ್ಷೇತ್ರದಲ್ಲಿ ಹೆಚ್ಚು ಸಂಶೋಧನೆಗಳು ನಡೆಯಬೇಕು. ಬಂದ ಸಂಶೋಧನೆಗಳನ್ನು ಸಂಶೋಧಕರನ್ನು ಈ ಕ್ಷೇತ್ರದಲ್ಲಿ ಸಮರ್ಪಕವಾಗಿ ಬಳಸಿಕೊಳ್ಳಬೇಕು.
ಡಾ. ನಿಂಗು ಸೊಲಗಿ
ರಾಷ್ಟ್ರ ಪ್ರಶಸ್ತಿ ಪುರಸ್ಕøತ ಶಿಕ್ಷಕರು
ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕೋಟೆ. ಮುಂಡರಗಿ
ಗದಗ(ಜಿ)   
9448640213
(ಸದ್ರಿ ಶಿಕ್ಷಕರ ‘ಮಕ್ಕಳ ರಂಗಭೂಮಿ ಪ್ರದರ್ಶನ-ಪ್ರಕ್ರಿಯೆ’ ಎಂಬ ಸಂಶೋಧನಾ ಪ್ರಬಂಧಕ್ಕೆ ಕನ್ನಡ ವಿ.ವಿ.ಹಂಪಿಯಿಂದ ಡಾಕ್ಟರೇಟ್ ಪುರಸ್ಕಾರ ಲಭಿಸಿದೆ.)


ಆರ್.ಬಿ.ಗುರುಬಸವರಾಜ

ವಿಜ್ಞಾನೋತ್ಸವ-2015

 ದಿನಾಂಕ 02-11-2015ರ  ಪ್ರಜಾವಾಣಿಯಲ್ಲಿ ಪ್ರಕಟವಾದ ಲೇಖನ

ಅಂತರಾಷ್ಟ್ರೀಯ ವಿಜ್ಞಾನೋತ್ಸವ-2015

    ಸಂಶೋಧನೆಗಳಿಗೆ ವೈಜ್ಞಾನಿಕ ಮನೋಭಾವವು ಮೂಲಭೂತ ಅಂಶ. ವೈಜ್ಞಾನಿಕ ಮನೋಭಾವವು ನಮ್ಮ ಆಲೋಚನಾ ರೀತಿ ಮತ್ತು ಸಮಸ್ಯಾ ಪರಿಹಾರ ವಿಧಾನಗಳಿಗೆ ಮಾನಸಿಕ ಪರಿವರ್ತನೆಯಾಗಿದೆ. ಈ ವರ್ತನೆಯು ದೇಶದ ಜನತೆಯನ್ನು ಉನ್ನತ ಹಂತಕ್ಕೆ ಬೆಳೆಸುತ್ತದೆ.
    ಭಾರತವು ಉತ್ಪಾದನೆ ಮತ್ತು ವಿತರಣೆಯಲ್ಲಿ ಅಮೂಲ್ಯ ಕೊಡುಗೆ ನೀಡಿದೆ. ಜೊತೆಗೆ ಅನೇಕ ವೈಜ್ಞಾನಿಕ ಸಾಧನೆಗಳ ಹೆಗ್ಗುರುತು ಮೂಡಿಸಿದೆ. ಪ್ರಸ್ತುತ ಸನ್ನಿವೇಶದಲ್ಲಿ ಭಾರತವು ತಾಂತ್ರಿಕವಾಗಿ ಅರ್ಹರಾದ ಅನೇಕ ವೃತ್ತಿಪರರ ದೊಡ್ಡ ಗುಂಪನ್ನು ಹೊಂದಿದ್ದರೂ ದೇಶದಾದ್ಯಂತ ವೈಜ್ಞಾನಿಕ ಮನೋಭಾವ ಸಂಪೂರ್ಣವಾಗಿ ಬೆಳೆದುಬಂದಿಲ್ಲ. ಆದ್ದರಿಂದ ವೈಜ್ಞಾನಿಕ ಮನೋಭಾವದ ಮಂತ್ರ ಜಪಿಸುವುದು ಹಿಂದೆಂದಿಗಿಂತಲೂ ಈಗಿನ ತುರ್ತು ಅಗತ್ಯವಾಗಿದೆ. ಇಡೀ ಸಮಾಜದುದ್ದಕ್ಕೂ ವಿಜ್ಞಾನ ಮತ್ತು ತಂತ್ರಜ್ಞಾನದ ಸಹಾಯದಿಂದ ವೈಜ್ಞಾನಿಕ ಮನೋಭಾವನೆ ಬಲಪಡಿಸುವ ಅಗತ್ಯವಿದೆ. ಈ ಹಿನ್ನಲೆಯಲ್ಲಿ ಭಾರತ ಸರಕಾರದ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವಾಲಯ ಹಾಗೂ ಭೂವಿಜ್ಞಾನ ಸಚಿವಾಲಯಗಳು ಜಂಟಿಯಾಗಿ ‘ಅಂತರಾಷ್ಟ್ರೀಯ ವಿಜ್ಞಾನೋತ್ಸವ-2015’ನ್ನು ಸಂಘಟಿಸಿವೆ.
    ದೇಶದಾದ್ಯಂತ ಇರುವ ಯುವ ವಿಜ್ಞಾನಿಗಳಿಗೆ ವೈಜ್ಞಾನಿಕ ವಿಷಯದಲ್ಲಿನ ಹೊಸ ಐಡಿಯಾ, ಸಂಶೋಧನೆ, ಅನುಭವ, ಸಾಧನೆಗಳನ್ನು ಹಂಚಿಕೊಳ್ಳಲು ಮತ್ತು ಪ್ರಸಾರ ಮಾಡಲು ವೇದಿಕೆ ಒದಗಿಸುವ ಮೂಲಕ ಜನಸಾಮಾನ್ಯರಲ್ಲಿ ವೈಜ್ಞಾನಿಕ ಮನೋಭಾವನೆ ಬೆಳೆಸುವ ಉದ್ದೇಶ ಹೊಂದಿದೆ. ಇದರಲ್ಲಿ ಜನಸಾಮಾನ್ಯರು, ಶಾಲಾ ಕಾಲೇಜು ಶಿಕ್ಷಕರು, ವಿದ್ಯಾರ್ಥಿಗಳು, ಉದ್ದಿಮೆದಾರರು, ವಿಜ್ಞಾನಿಗಳು ಹೀಗೆ ಒಟ್ಟು 3500 ಜನ ಭಾಗವಹಿಸುವ ನೀರೀಕ್ಷೆಯಿದೆ. ಜನಸಾಮಾನ್ಯರು, ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು ವಿಜ್ಞಾನಿಗಳೊಂದಿಗೆ ಸಂವಾದ ನಡೆಸುವ ಮೂಲಕ ವೈಜ್ಞಾನಿಕ ಮನೋಭಾವನೆ ಮೂಡಿಸುವ ಆಶಯ ಹೊಂದಲಾಗಿದೆ.
ಯಾವಾಗ? ಎಲ್ಲಿ?: ಈ ಕಾರ್ಯಕ್ರಮವು 2015ರ ಡಿಸೆಂಬರ್ 4 ರಿಂದ 8ರವರೆಗೆ 5 ದಿನಗಳ ಕಾಲ ದೆಹಲಿಯ ಭಾರತೀಯ ತಂತ್ರಜ್ಞಾನ ಸಂಸ್ಥೆಯ ಆವರಣದಲ್ಲಿ ನಡೆಯಲಿದೆ.

ಉದ್ದೇಶಗಳು :

•    ವಿಜ್ಞಾನ ಮತ್ತು ತಂತ್ರಜ್ಞಾನದ ಫಲವನ್ನು ಜನಸಾಮಾನ್ಯರ ಗಮನಕ್ಕೆ ತರುವುದು.
•    ಜನಸಾಮಾನ್ಯರಲ್ಲಿ ವೈಜ್ಞಾನಿಕ ಮನೋಭಾವನೆ ಮೂಡಿಸಲು ಕಾರ್ಯತಂತ್ರ ರೂಪಿಸುವುದು.
•    ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಬಾರತೀಯರ ಕೊಡುಗೆಗಳನ್ನು ಪ್ರದರ್ಶಿಸುವುದು.
•    ಯುವ ವಿಜ್ಞಾನಿಗಳಿಗೆ ತಮ್ಮ ಹೊಸ ಐಡಿಯಾಗಳ ಪ್ರದರ್ಶನ ಮತ್ತು ಪ್ರಸಾರಕ್ಕೆ ವೇದಿಕೆ ಒದಗಿಸುವುದು.
•    ಗೌರವಾನ್ವಿತ ಪ್ರಧಾನಮಂತ್ರಿಗಳ ಪ್ರಮುಖ ಕಾರ್ಯಕ್ರಮಗಳಾದ ಮೇಕ್ ಇನ್ ಇಂಡಿಯಾ, ಡಿಜಿಟಲ್ ಇಂಡಿಯಾ, ಸ್ಮಾರ್ಟ್ ಸಿಟಿ, ಸ್ಮಾರ್ಟ್ ವಿಲೇಜ್ ಮುಂತಾದವುಗಳನ್ನು ಪೋಷಿಸುವುದು.

ಕಾರ್ಯ ಚಟುವಟಿಕೆಗಳು:

•    ವಿಜ್ಞಾನ ಪ್ರಯೋಗಾಲಯ ಪ್ರದರ್ಶನ : ದೆಹಲಿ ಸೇರಿದಂತೆ ಸುತ್ತಮುತ್ತಲ ಶಾಲಾ ಮಕ್ಕಳಿಗಾಗಿ ಸಂಚಾರಿ ವಿಜ್ಞಾನ ಪ್ರಯೋಗಾಲಯ ಪ್ರದರ್ಶನ ನಡೆಯಲಿದೆ. ಇದರಲ್ಲಿ ಪ್ರಾಥಮಿಕ ಶಾಲಾ ಹಂತದಿಂದ ಪ್ರೌಢಶಾಲಾ ಹಂತದವರೆಗೆಗಿನ ಸಾವಿರಾರು ಮಕ್ಕಳು ಬಾಗವಹಿಸಲಿದ್ದು, ಕೈಗಳಿಂದ ಮಾಡಬಹುದಾದ ಅನೇಕ ವಿಜ್ಞಾನ ಪ್ರಯೋಗಗಳನ್ನು ಪ್ರಾಯೋಗಿವಾಗಿ ಮಾಡಿ ಅನುಭವ ಪಡೆಯುವರು.

•    ಯುವ ವಿಜ್ಞಾನಿಗಳ ಸಮಾವೇಶ : ಭಾರತದಲ್ಲಿನ ಯುವವಿಜ್ಞಾನಿಗಳ ಹೊಸ ಐಡಿಯಾಗಳ ಪ್ರಸಾರ ಮತ್ತು ಪ್ರಚಾರ ಮಾಡುವ ವೇದಿಕೆ ಇದಾಗಿದೆ. ಇದರಲ್ಲಿ ಪ್ರಮುಖವಾಗಿ ನವೀನ ಕೃಷಿ ಪದ್ದತಿಗಳು, ರಿಮೋಟ್ ತಂತ್ರಜ್ಞಾನದ ಅನ್ವಯಿಕಗಳು, ಮೇಕ್ ಇನ್ ಇಂಡಿಯಾಗಾಗಿ ನವೀನ ವಿನ್ಯಾಸಗಳು, ಹಸಿರು ಶಕ್ತಿ, ತಾಜ್ಯ ನಿರ್ವಹಣೆ, ಪರಿಸರ ನಿರ್ವಹಣೆ ಹೀಗೆ ಹಲವಾರು ವಿಷಯಗಳ ಕುರಿತು ಯುವ ವಿಜ್ಞಾನಿಗಳ ಉಪನ್ಯಾಸ ಮತ್ತು ಸಂವಾದ ನಡೆಯುತ್ತದೆ.

•    ಶೈಕ್ಷಣಿಕ ಮತ್ತು ಔಧ್ಯಮಿಕ ಸಮಾಗಮ : ವಿದ್ಯಾರ್ಥಿಗಳಲ್ಲಿ ಉಧ್ಯಮ ಜ್ಞಾನದ ಬಲವರ್ಧನೆಗಾಗಿ ಶೈಕ್ಷಣಿಕ ಔಧ್ಯಮಿಕ ಸಮಾಗಮ ನಡೆಯಲಿದೆ. ವಿದ್ಯಾರ್ಥಿಗಳಿಗೆ ಶೈಕ್ಷಣಿಕ ಜ್ಞಾನದ ಜೊತೆಗೆ ಪರಿಸರ ಜ್ಞಾನ ಮತ್ತು ಉಧ್ಯಮ ಜ್ಞಾನ ನೀಡುವುದು ಇದರ ಆಶಯ.

•    ಚಲನಚಿತ್ರ ಪ್ರದರ್ಶನ : ಶೈಕ್ಷಣಿಕ ಹಾಗೂ ವೈಜ್ಞಾನಿಕ ಮನೋಭಾವದ ಹಿನ್ನಲೆಯಲ್ಲಿ ರಚನೆಯಾದ ಯಶಸ್ವಿ ಚಲನಚಿತ್ರಗಳ ಪ್ರದರ್ಶನ ವಿಜ್ಞಾನೋತ್ಸವದ ಮತ್ತೊಂದು ಆಕರ್ಷಣೆ. ಸಮಕಾಲೀನ ಮತ್ತು ಜಾಗತಿಕ ಮೆಚ್ಚುಗೆ ಪಡೆದ ಹಲವಾರು ಚಲನಚಿತ್ರಗಳು ಇಲ್ಲಿ ಪ್ರದರ್ಶನಗೊಳ್ಳಲಿವೆ. ಗ್ರಾಮೀಣ ಪ್ರದೇಶಗಳಿಗೆ ಡಿಜಿಟಲ್ ತಂತ್ರಜ್ಞಾನವನ್ನು ತಲುಪಿಸುವ ಹಾಗೂ ವಿದ್ಯಾರ್ಥಿಗಳಿಗೆ ವೈಜ್ಞಾನಿಕ ಮತ್ತು ಶೈಕ್ಷಣಿಕ ಘಟನಾಧಾರಿತ ಚಲನಚಿತ್ರ ತರಬೇತಿ ನೀಡುವುದು ಈ ಕಾರ್ಯಕ್ರಮದ ಉದ್ದೇಶ.

•    ತಾಂತ್ರಿಕ ಉಧ್ಯಮ ಎಕ್ಸ್‍ಪೊ : ತಂತ್ರಜ್ಞಾನಕ್ಕೆ ಸಂಬಂಧಿಸಿದ ನಾವಿನ್ಯತೆಗಳು, ಸಾಧನೆಗಳು, ಆಧುನಿಕ ಮತ್ತು ಭವಿಷ್ಯದ ಮಾದರಿಗಳ ಪ್ರದರ್ಶನ ನಡೆಯಲಿದೆ. ಕಲಾವಿದರು, ತಂತ್ರಜ್ಞರು, ವಿನ್ಯಾಸಕಾರರು, ಹಾಗೂ ವಿಜ್ಞಾನಿಗಳ ಸಂವೇದನಾತ್ಮಕ ವೇದಿಕೆ ಇದಾಗಿದೆ. ವಿಜ್ಞಾನ ಮತ್ತು ತಂತ್ರಜ್ಞಾನದ ಸಹಾಯದಿಂದ ಸಂಸ್ಕøತಿ ಹಾಗೂ ಸಂಪ್ರದಾಯ ಉಳಿಸುವ ಚಿತ್ರಣ ಕಲೆಯ ಪ್ರದರ್ಶನ ನಡೆಯಲಿದೆ.

•    ವಿಜ್ಞಾನ ವಸ್ತು ಪ್ರದರ್ಶನ : ಎಲ್ಲಾ ರಾಜ್ಯಗಳಿಂದ ರಾಷ್ಟ್ರ ಮಟ್ಟಕ್ಕೆ ಆಯ್ಕೆಯಾದ ಇನ್‍ಸ್ಪೈರ್ ಅವಾರ್ಡ್‍ನ ವಿಜ್ಞಾನ ಮಾದರಿಗಳ ವಸ್ತು ಪ್ರದರ್ಶನ ನಡೆಯಲಿದೆ. ಇದರಲ್ಲಿ 800ಕ್ಕೂ ಹೆಚ್ಚು ಶಾಲಾ ವಿದ್ಯಾರ್ಥಿಗಳು ತಮ್ಮ ವಿಜ್ಞಾನ ಮಾದರಿಗಳನ್ನು ಪ್ರದರ್ಶಿಸಲಿದ್ದಾರೆ. ಅಂತಿಮವಾಗಿ 3 ಮಾದರಿಗಳನ್ನು ಆಯ್ಕೆ ಮಾಡಿ ಸೂಕ್ತ ಬಹುಮಾನದೊಂದಗೆ ಪ್ರಶಸ್ತಿ ನೀಡಲಾಗುತ್ತದೆ.

  

ಆರ್.ಬಿ.ಗುರುಬಸವರಾಜ

ಮೌಲ್ಯವಂತರಾಗಿ VALUES IN YOUTHS

ದಿನಾಂಕ 28-10-2015ರ ವಿಜಯವಾಣಿಯಲ್ಲಿ ಪ್ರಕಟವಾದ ಲೇಖನ.

 

ಮೌಲ್ಯವಂತರಾಗಿ

    “ನೋಡಪ್ಪಾ, ಆ ಕೆಲ್ಸ ಮಾಡು ಈ ಕೆಲ್ಸ ಮಾಡು ಅಂತ ನೀನು ನನ್ಗೆ ಹೇಳ್ಬೇಡ. ನಾನು ಯಾವ ಕೆಲ್ಸನೂ ಮಾಡಲ್ಲ. ಇರು ಅಂದ್ರೆ ಮನೇಲಿ ಇರ್ತೀನಿ, ಇಲ್ಲಾಂದ್ರೆ ಮನೆ ಬಿಟ್ಟು ಹೊಂಟುಹೋಗ್ತೀನಿ” ಎಂದು ಪದೇ ಪದೇ ತಂದೆಯನ್ನು ಹೆದರಿಸ್ತಾನೆ ಪ್ರವೀಣ.
    ಬಿ.ಎ ಓದುತ್ತಿರುವ ಚೇತನ ಬಡಕುಟುಂಬದ ಹುಡುಗಿ. ಕೂಲಿ ಮಾಡಿದರೂ ಮಗಳನ್ನು ಓದಿಸಬೇಕೆಂಬ ಮಹದಾಸೆ ತಂದೆ-ತಾಯಿಯರದು. ಆದರೆ ಮಗಳು ತುಂಬಾ ಹಠಮಾರಿ. ದುಬಾರಿ ಬೆಲೆಯ ಮೊಬೈಲ್ ಬೇಕೆಂದು ನಾಲ್ಕಾರು ದಿನಗಳಿಂದ ಹಠಹಿಡಿದಿದ್ದಾಳೆ. ಊಟ, ತಿಂಡಿ, ಕಾಲೇಜು ಎಲ್ಲವನ್ನೂ ತ್ಯಜಿಸಿದ್ದಾಳೆ. ಅಷ್ಟೊಂದು ಬೆಲೆಯ ಮೊಬೈಲ್ ಕೊಡಿಸಲು ಹಣವಿಲ್ಲ. ಕೊಡಿಸದಿದ್ದರೆ ಮಗಳು ಏನು ಮಾಡಿಕೊಳ್ಳುತ್ತಾಳೋ ಎಂಬ ಭಯ. ಅವರಿಗೆ ಏನು ಮಾಡಬೇಕೋ ತೋಚುತ್ತಿಲ್ಲ.
    ದ್ವಿತೀಯ ಪಿ.ಯು.ಸಿ ಓದುತ್ತಿರುವ ಮಗ ಆಕಾಶನ ಫೋನು ಬಂತೆಂದರೆ ತಂದೆ ಬೆಚ್ಚಿ ಬೀಳ್ತಾರೆ. ಎಷ್ಟು ಹಣ ಕೇಳ್ತಾನೋ, ಹೇಗೆ ಹೊಂದಿಸಬೇಕು ಎಂಬುದೇ ಅವರ ಭಯಕ್ಕೆ ಕಾರಣ. ಅವರು ಅಂದುಕೊಂಡಂತೆ ‘ಅಪ್ಪಾ ನನಗೆ ಅರ್ಜಂಟಾಗಿ ದುಡ್ಡು ಬೇಕು’ ಎಂಬ ಮಗನ ಧ್ವನಿ ಕೇಳಿ ಬೆಚ್ಚಿದರು. ಅಳುಕುತ್ತಲೇ ‘ಈಗ್ಯಾಕೋ ದುಡ್ಡು’ ಎಂದರು. ‘ಕಾಲೇಜಿನಲ್ಲಿ ಟೂರ್ ಫಿಕ್ಸ್ ಆಗಿದೆ. ಅದ್ಕೆ ದುಡ್ಡು ಬೇಕು’ ಎಂದ ಆಕಾಶ. ‘ಎಷ್ಟು ಬೇಕಿತಪ್ಪ’ ಎಂದು ನಿಧಾನವಾಗಿ ಕೇಳಿದರು. ‘ಇಪ್ಪತ್ತು ಸಾವಿರ ಬೇಕು. ಇವತ್ತೇ ನನ್ನ ಅಕೌಂಟ್‍ಗೆ ಹಾಕ್ಬಿಡಿ. ಇಲ್ಲಾಂದ್ರೆ ನಾನು ಓದೋದು ಬಿಟ್ಟು ಮನೆಗೆ ಬಂದ್ಬೀಡ್ತೀನಿ’ ಎಂಬ ಆಕಾಶನ ಮಾತಿಗೆ ಹೃದಯವೇ ಬಾಯಿಗೆ ಬಂದಂತಾಯ್ತು. ಅವರ ಎರಡು ತಿಂಗಳ ಸಂಬಳ ಸೇರಿಸಿದರೂ ಇಪ್ಪತ್ತು ಸಾವಿರ ಆಗೋಲ್ಲ. ಬೇಸತ್ತ ತಂದೆ ಕಾಲೇಜಿಗೆ ಫೋನಾಯಿಸಿದರು. ಅಲ್ಲಿಂದ ಮತ್ತೊಂದು ತಗಾದೆ. ಕಾಲೇಜಿನಲ್ಲಿ ಟೂರು ಫಿಕ್ಸ್ ಆಗೇ ಇಲ್ಲ ಎಂಬುದು. ಅಲ್ಲದೇ ಮಗ ಸರಿಯಾಗಿ ಕಾಲೇಜಿಗೆ ಹಾಜರಾಗುತ್ತಿಲ್ಲ, ವಿದ್ಯಾರ್ಥಿಗಳಿಗೆ ಚುಡಾಯಿಸ್ತಾನೆ, ಕೇಳಿದರೆ ಸಿಬ್ಬಂದಿಯನ್ನೇ ಹೊಡೆಯಲು ಮುಂದಾಗುತ್ತಾನೆ, ಇತ್ತೀಚೆಗೆ ಕುಡಿಯುವುದು, ಮೋಜು ಮಸ್ತಿ ಹೆಚ್ಚಾಗಿದ್ದು, ಇತರೆ ಹುಡುಗರು ಇವನಿಂದಾಗಿ ಹಾಳಾಗುತ್ತಿದ್ದಾರೆ’ ಎಂಬ ಆರೋಪ ಪಟ್ಟಿ. ಇದು ತಂದೆಗೆ ಮತ್ತೊಂದು ಆಘಾತ. ಆಕಾಶವೇ ತಲೆ ಮೇಲೆ ಬಿದ್ದಂತಾಯ್ತು.
    ಹೀಗೆ ಇಂತಹ ಅನೇಕ ಆರೋಪಗಳು ಯುವ ಪೀಳಿಗೆಯ ಮೇಲೆ ಕೇಳಿಬರುತ್ತಲೇ ಇದೆ. ‘ಯಾರಿಗ್ಹೇಳೋಣಾ ನಮ್ಮ ಪ್ರಾಬ್ಲಮ್ಮು’ ಎಂದು ತಂದೆ ತಾಯಿ ಗೊಣಗಿದರೆ ‘ಯಾಕ್ಹಿಂಗಾಡ್ತಾರೋ’ ಎನ್ನುತ್ತಾರೆ ಯುವಕರು. ಇಂದಿನ ಯುವಕರಲ್ಲಿ ಜವಾಬ್ದಾರಿ ಹಾಗೂ ಮೌಲ್ಯಗಳ ಬಳಕೆ ತೀರಾ ಕಡಿಮೆ ಎಂಬ ಮಾತು ಕೇಳಿ ಬರುತ್ತಿರುವುದು ಸಹಜ. ಪಾಲಕರಿಗೆ ಎದುರು ಮಾತನಾಡುವುದು, ಗುರು-ಹಿರಿಯರಿಗೆ ಗೌರವ ನೀಡದಿರುವುದು, ಅಸಹಾಯಕರಿಗೆ ಸಹಾಯ ಹಸ್ತ ಚಾಚದೇ ಇರುವುದು, ಕಿರಿಯರನ್ನು ಪ್ರೀತ್ಯಾದರಗಳಿಂದ ಕಾಣದೇ ಇರುವುದು, ವಸ್ತುಗಳ ಮತ್ತು ಸಂಬಂಧಗಳ ಮೌಲ್ಯ ಅರಿಯದೇ ಇರುವುದು, ಹೀಗೆ ಪಟ್ಟಿ ಬೆಳೆಯುತ್ತಾ ಹೋಗುತ್ತದೆ. ಈ ರೀತಿ ಎಲ್ಲಾ ಅಪಾದನೆಗಳು ಯುವಕರನ್ನೇ ಕೇಂದ್ರವಾಗಿಟ್ಟುಕೊಂಡಿವೆ. ಏಕೆಂದರೆ ಇಂದಿನ ಯುವಕರೇ ಭವಿಷ್ಯದ ರಾಷ್ಟ್ರ ನಿರ್ಮಾತೃಗಳು. ಹಾಗಾಗಿ ಯುವ ಪೀಳಿಗೆ ಮತ್ತು ನೈತಿಕ ಮೌಲ್ಯಗಳ ನಡುವೆ ಆಳವಾದ ಸಂಬಂಧವಿದೆ.
ನೈತಿಕ ಮೌಲ್ಯಗಳೆಂದರೇನು?
    ಸಮಾಜ ಒಪ್ಪಿತ ಮಾನವ ವರ್ತನೆಗಳೇ ನೈತಿಕ ಮೌಲ್ಯಗಳು. ಇವು ಸ್ವಯಂ ಪ್ರಜ್ಞೆ ಮತ್ತು ವ್ಯವಹಾರಿಕ ಅಲಿಖಿತ ಕಾನೂನುಗಳಿದ್ದಂತೆ. ನೈತಿಕತೆ ಎನ್ನುವುದು ಬೇರೊಬ್ಬರ ಒತ್ತಾಯ ಇಲ್ಲದೇ ಆಂತರಿಕವಾಗಿ ಬೆಳೆಯಬಲ್ಲ ವ್ಯಕ್ತಿತ್ವ ನಿರ್ಮಾಣದ ಕಾರ್ಯತಂತ್ರಗಳು. ನೈತಿಕತೆ ಅಥವಾ ‘ಒoಡಿಚಿಟiಣಥಿ’ ಎನ್ನುವ ಪದ ‘ಒoಡಿes’ ಎನ್ನುವ ಲ್ಯಾಟಿನ್ ಪದದಿಂದ ಬಂದಿದ್ದು, ‘ನೀತಿ’ ಅಥವಾ ‘ನಡವಳಿಕೆ’ ಎಂಬಂರ್ಥ ಕೊಡುತ್ತದೆ.
    ಉಪಯುಕ್ತವಾದ ಮತ್ತು ಅಪೇಕ್ಷಣೀಯವಾದ ಹಾಗೂ ನಿತ್ಯವೂ ಅನುಸರಿಸಬಹುದಾದ ವರ್ತನಾ ಅಂಶಗಳೇ ನೀತಿಗಳು. ಇವು ಮಾನವನ ಅಭ್ಯುದಯಕ್ಕಾಗಿ ಅವಶ್ಯಕ. ಸತ್ಯಸಂಧತೆ, ತಾಳ್ಮೆ, ವಿಧೇಯತೆ, ಪ್ರಾಮಾಣಿಕತೆ, ಕಠಿಣ ಪರಿಶ್ರಮ, ಜವ್ದಾದಾರಿ ನಿರ್ವಹಣೆ, ಗೌರವ, ಸಹನೆ, ಸಹಕಾರ, ನಿಷ್ಠೆ, ಸಾರ್ವಜನಿಕ ಹಿತಾಸಕ್ತಿ, ಸ್ವಾತಂತ್ರ ರಕ್ಷಣೆ ಇವೆಲ್ಲವೂ ನೈತಿಕ ಮೌಲ್ಯಗಳಾಗಿದ್ದು ವ್ಯಕ್ತಿತ್ವದ ಘನತೆಗೆ ಪೂರಕವಾಗಿವೆ.
   
    ನೀತಿಶಿಕ್ಷಣ/ಮೌಲ್ಯಶಿಕ್ಷಣ ಪ್ರಾಥಮಿಕ ಶಿಕ್ಷಣದಿಂದ ಪ್ರೌಢಶಿಕ್ಷಣದವರೆಗೆ ಮಾತ್ರ ಶಿಕ್ಷಣದ ಒಂದು ಭಾಗವಾಗಿ ಮುಂದುವರೆಯುತ್ತವೆ. ಕಾಲೇಜು ಶಿಕ್ಷಣದಲ್ಲಿ ಇದನ್ನು ಪ್ರತ್ಯೇಕ ವಿಷಯವಾಗಿ ಅಳವಡಿಸದೇ ಇರುವುದು ಮೌಲ್ಯಗಳು ಅಧಃಪತನಕ್ಕೆ ಇಳಿಯಲು ಕಾರಣ ಎಂಬುದು ಅನೇಕರ ಆರೋಪ. ಆದರೆ ಕೇವಲ ಶಿಕ್ಷಣದ ಕೊರತೆಯೊಂದೇ ಮೌಲ್ಯಗಳು ಕುಸಿಯಲು ಕಾರಣವಲ್ಲ. ಇದರಲ್ಲಿ ಪಾಲಕರು, ಸಮುದಾಯ, ಒಡನಾಡಿಗಳ ಪಾತ್ರವೂ ಇದೆ.

ಮೌಲ್ಯಗಳ ಕುಸಿತಕ್ಕೆ ಕಾರಣಗಳು
    ಇಂದಿನ ಯುವಕರಲ್ಲಿ ಅನೈತಿಕತೆ ಮತ್ತು ಸಮಾಜ ವಿರೋಧಿ ನಡವಳಿಕೆಗಳು ಹೆಚ್ಚಲು ಅನೇಕ ಅಂಶಗಳು ಪ್ರಭಾವ ಬೀರುತ್ತವೆ. ಅವುಗಳೆಂದರೆ,
ಒಡನಾಡಿಗಳು/ಸಮವಯಸ್ಕರ ಒತ್ತಡ : ನೈತಿಕತೆ ಕುಸಿಯುವಲ್ಲಿ ಒಡನಾಡಿಗಳ ಪ್ರಭಾವ ಅಧಿಕವಾಗಿದೆ.  ಸಮವಯಸ್ಕರ ಮನಸ್ಸನ್ನು ಗೆಲ್ಲಲು ಅಥವಾ ಒಡನಾಡಿಗಳ ಒತ್ತಡದಿಂದ ನೈತಿಕತೆಯನ್ನು ಮುರಿದುಹಾಕಿ ಅವಿವೇಕತನದಿಂದ ವರ್ತಿಸುವುದು ಮೌಲ್ಯಗಳ ಕುಸಿತಕ್ಕೆ ಕಾರಣವಾಗಿದೆ.
ಸ್ವಯಂ ನೀತಿ ನಿರೂಪಣೆ : ಹದಿಹರೆಯಕ್ಕೆ ಕಾಲಿಡುತ್ತಿದ್ದಂತೆ ತಮಗೆ ಅನುಕೂಲವಾಗುವಂತಹ ತಮ್ಮದೇ ಆದ ನೀತಿಗಳನ್ನು ರೂಪಿಸಿಕೊಳ್ಳುವುದು ಹಾಗೂ ಅದು ಸಮಂಜಸವಲ್ಲದಿದ್ದರೂ ಅದನ್ನು ಸಮರ್ಥಿಸಿಕೊಳ್ಳುವುದು.
ವಿವೇಚನೆ ಇಲ್ಲದಿರುವುದು : ಸರಿ-ತಪ್ಪು, ಒಳ್ಳೆಯದು-ಕೆಟ್ಟದ್ದು, ಕಾಲ್ಪನಿಕತೆ-ವಾಸ್ತವಿಕತೆ, ಮುಂತಾದವುಗಳಲ್ಲಿ ವಿವೇಚನೆ ಇಲ್ಲದೇ ತಮ್ಮನ್ನು ತೊಡಗಿಸಿಕೊಳ್ಳುವುದು ಕೂಡಾ ಮೌಲ್ಯಗಳ ಕುಸಿತಕ್ಕೆ ಕಾರಣವಾಗಿವೆ. ಇದರಿಂದ ಅವಮಾನ ಮತ್ತು ಪಶ್ಚಾತ್ತಾಪ ಪ್ರಜ್ಞೆ ಮಾಯವಾಗಿದೆ.
ಸ್ವ ಅಭಿವ್ಯಕ್ತಿ ಕೊರತೆ : ತಮ್ಮಲ್ಲಿನ ಅಗಾಧ ಜ್ಞಾನ ಮತ್ತು ಪ್ರತಿಭೆಯನ್ನು ಸಮಾಜೋಪಯೋಗಿ ಕಾರ್ಯಗಳಿಗೆ ಧನಾತ್ಮಕವಾಗಿ ಬಳಸದೇ ನಕಾರಾತ್ಮಕ ಕಾರ್ಯಗಳಾದ ಅಪರಾಧ, ಅನೈತಿಕ ವರ್ತನೆ, ಧೂಮಪಾನ, ಮಧ್ಯಪಾನ, ಅಶ್ಲೀಲ-ಅವ್ಯಾಚ್ಯ ಪದಗಳ ಬಳಕೆ, ಪರಸ್ಪರ ಜಗಳ, ಇತ್ಯಾದಿ ಕುಕೃತ್ಯಗಳಿಗೆ ಬಳಸುವುದುರಿಂದ ಮೌಲ್ಯಗಳು ಕುಸಿಯುತ್ತವೆ.
ಅವಿಭಕ್ತ ಮತ್ತು ಐಹಿಕ ಜೀವನ : ಇಂದಿನ ಬಹುತೇಕ ಅವಿಭಕ್ತ ಕುಟುಂಬಗಳಲ್ಲಿ ತಂದೆ-ತಾಯಿಗಳಿಬ್ಬರೂ ದುಡಿಯುವುದು ಅನಿವಾರ್ಯವಾಗಿದೆ. ಹಾಗಾಗಿ ಅವರು ತಮ್ಮ ಮಕ್ಕಳೊಂದಿಗೆ ಕಾಲ ಕಳೆಯಲು ಸಮಯ ದೊರೆಯದೇ ಇರುವುದು, ಮಕ್ಕಳ ಬೇಕು ಬೇಡಗಳಿಗೆ ಸ್ಪಂದಿಸದಿರುವುದು, ಮಕ್ಕಳ ವರ್ತನೆ ಹವ್ಯಾಸಗಳನ್ನು ಗಮನಿಸಲು ಬಿಡುವಿಲ್ಲದಿರುವುದು, ಎಲ್ಲದಕ್ಕೂ ಹಣವನ್ನೇ ಪ್ರಧಾನವಾಗಿಸುವುದು, ಐಭೋಗ ಜೀವನ ನಡೆಸಲು ಹಾತೊರೆಯುವುದು ಇವೆಲ್ಲವೂ ಮೌಲ್ಯಗಳ ಕುಸಿತಕ್ಕೆ ಕಾರಣಗಳಾಗಿವೆ.
ಕಟ್ಟುನಿಟ್ಟಿನ ನಿಯಂತ್ರ್ರಣ ಮತ್ತು ಕಠೋರ ಶಿಕ್ಷೆ : ಬಾಲ್ಯದಲ್ಲಿನ ಕಟ್ಟುನಿಟ್ಟಿನ ನಿಯಂತ್ರಣ ಮತ್ತು ಕಠೋರ ಶಿಕ್ಷೆಗಳು ಮಗುವಿನಲ್ಲಿ ಆಕ್ರಮಣಕಾರಿ ವರ್ತನೆ ಮತ್ತು ಕ್ರಾಂತೀಯ ಭಾವನೆ ಉಂಟಾಗಲು ಕಾರಣವಾಗುತ್ತವೆ. ಇದು ಅತ್ಯಂತ ಅಪಾಯಕಾರಿ.
ಮಾಧ್ಯಮಗಳು ಮತ್ತು ತಂತ್ರಜ್ಞಾನದ ಹಾವಳಿ : ಮೌಲ್ಯಗಳು ಕುಸಿಯಲು ಇರುವ ಎಲ್ಲಾ ಕಾರಣಗಳಿಗಿಂತಲೂ ಅತೀ ಮುಖ್ಯ ಕಾರಣವೆಂದರೆ ಮಾಧ್ಯಮಗಳು. ಯುವಕರ ಮನಸ್ಸನ್ನು ವಿಕೃತಗೊಳಿಸಿ ಸಮಾಜ ಘಾತುಕ ಕೆಲಸಗಳಲ್ಲಿ ತೊಡಗಲು ಹೆಚ್ಚು ಪ್ರೇರೇಪಣೆ ನೀಡುವಲ್ಲಿ ಮಾಧ್ಯಮಗಳೇ ಮುಂಚೂಣಿಯಲ್ಲಿವೆ ಎಂದರೆ ತಪ್ಪಲ್ಲ. ಅದರಲ್ಲೂ ಟಿ.ವಿ ಮತ್ತು ಸಿನೆಮಾಗಳು ಯುವ ಮನಸ್ಸುಗಳನ್ನು ಉದ್ರೇಕಗೊಳಿಸಿ ಅಹಿತಕರ ಘಟನೆಗಳಿಗೆ ಪ್ರಚೋದಿಸುತ್ತವೆ.
ಇತರೆ ಉತ್ತೇಜಕಗಳು : ಅತೃಪ್ತಿ ಜೀವನ, ಮನೋರಂಜನೆಯ ಪ್ರಭಾವ, ಅನಪೇಕ್ಷಿತ ಚಿತ್ರಗಳ ವೀಕ್ಷಣೆ, ಅಂತರಜಾಲದ ಅಶ್ಲೀಲ ತಾಣಗಳ ಹುಡುಕಾಟ, ಲೈಂಗಿಕ ಪ್ರಚೋದನೆಯ ಅಶ್ಲೀಲ ಕಾದಂಬರಿಗಳು, ದಿಢೀರ್ ಶ್ರೀಮಂತರಾಗುವ ಹಗಲುಗನಸು, ಮಾದಕ ವ್ಯಸನ ಮುಂತಾದವುಗಳೂ ಕೂಡಾ ನೈತಿಕ ಅವನತಿಯ ಕಾರಣಗಳಾಗಿವೆ.
ನೈತಿಕ ಮೌಲ್ಯಗಳೇಕೆ ಬೇಕು?
    ಮೌಲ್ಯಗಳು ಪ್ರತಿ ನಿಮಿಷವೂ ನಿಮ್ಮ ಉದಾತ್ತ ಜೀವನದ ಗುರಿಗಳ ಮಾರ್ಗದರ್ಶನ ಮಾಡುತ್ತವೆ. ಕೇವಲ ಮಾರ್ಗದರ್ಶನ ಅಲ್ಲದೇ ನಿಮಗೆ ಸ್ಪೂರ್ತಿ ಮತ್ತು ಪ್ರೇರಣೆ ನೀಡುತ್ತವೆ. ಜೊತೆಗೆ ಆತ್ಮಸ್ಥೈರ್ಯ ಮತ್ತು ಅಭಿಮಾನ ಬೆಳೆಸುತ್ತವೆ.  ಆಕಸ್ಮಿಕ ಘಟನೆಗಳು, ಪ್ರಚೋದಕಗಳಿಂದ, ಅಹಿತಕಾರಿ ಭಾವನೆಗಳಿಂದ ನಿಮ್ಮನ್ನು ಸ್ವಯಂ ನಿಯಂತ್ರಿಸುತ್ತವೆ. ಮೌಲ್ಯಗಳು ನಿಮ್ಮನ್ನು ಸರಿದಾರಿಯಲ್ಲಿ ನಡೆಸಿ ಜೀವನವನ್ನು ಅರ್ಥಪೂರ್ಣಗೊಳಿಸುತ್ತವೆ.
    ಮೌಲ್ಯಗಳು ವೈಫಲ್ಯಕ್ಕೆ ಸೂಕ್ಷ್ಮತೆಯ ಸ್ಪರ್ಶ ನೀಡುತ್ತವೆ ಮತ್ತು ಅನುತ್ಪಾದಕ ತಪ್ಪನ್ನು ಸರಿಪಡಿಸಿ ರಚನಾತ್ಮಕ ಕಾರ್ಯಗಳತ್ತ ನಿಮ್ಮನ್ನು ಕೊಂಡೊಯ್ಯತ್ತವೆ. ನೈತಿಕತೆ ನಿಮ್ಮಲ್ಲಿನ ನಿಷ್ಪ್ರಯೋಜಕ ಅಥವಾ ಅಹಿತಕರ ವರ್ತನೆಗಳನ್ನು ಬದಲಾಯಿಸಿ ಸುವಿಚಾರ ಮತ್ತು ವಿವೇಚನಾಯುತ ಸ್ವಭಾವ ಬೆಳೆಸುತ್ತವೆ. ನಾಟಕೀಯತೆ ಮತ್ತು ವಾಸ್ತವಿಕ ಕಾರ್ಯಾಚರಣೆಯ ನಡುವಿನ ವ್ಯತ್ಯಾಸ ಗುರುತಿಸಿ ಪ್ರಾಮಾಣಿಕತೆಯ ಮಟ್ಟವನ್ನು ಹೆಚ್ಚಿಸುತ್ತವೆ. ಆದರ್ಶ ಮತ್ತು ಮೌಲ್ಯಗಳೊಂದಿಗೆ ಜೀವಿಸುವುದರಿಂದ ನೀವು ಇನ್ನೊಬ್ಬರ ಮೇಲೆ ಪ್ರಭಾವ ಬೀರಬಹುದು ಅಥವಾ ನಿಮ್ಮ ತತ್ವಾದರ್ಶಗಳನ್ನು ಇತರರು ಅನುಸರಿಸಬಹುದು.
    ಮೂಲತಃ ಮಾನವ ಸಂಘಜೀವಿ ಹಾಗೂ ಸಮಾಜಜೀವಿ. ತಾನು ವಾಸಿಸುವ ಸಮಾಜದೊಂದಿಗೆ ಪ್ರತಿಕ್ರಿಯಿಸುವುದು ಅವಶ್ಯ. ಅದಕ್ಕಾಗಿ ವಿಭಿನ್ನವಾದ ಸಾಮಾಜಿಕ ಅಭ್ಯಾಸಗಳಿಂದ ಇತರರಿಗೆ ಸಹಾಯ ಮಾಡುವುದು, ಗುರು-ಹಿರಿಯರನ್ನು ಗೌರವಿಸುವುದು, ಸೌಜನ್ಯದೊಂದಿಗೆ ವರ್ತಿಸುವುದು, ಇತ್ಯಾದಿಗಳನ್ನು ಅಳವಡಿಸಿಕೊಳ್ಳಬೇಕು. ಉತ್ತಮ ಅಭ್ಯಾಸಗಳು ಇತರರಿಗೆ ಒಳಿತನ್ನು ಮಾಡುವುದರ ಜೊತೆಗೆ ಸಮಾಜದಲ್ಲಿ ನೀವೊಬ್ಬ ಸತ್ಪ್ರಜೆಯಾಗಿ ಗುರುತಿಸಲ್ಪಡುತ್ತೀರಿ.
    ಯುವಕರು ನೈತಿಕ ಮೌಲ್ಯಗಳನ್ನು ಎತ್ತಿ ಹಿಡಿಯುವುದರಿಂದ ಉತ್ಸಾಹ ಹುಮ್ಮಸ್ಸು ಹೆಚ್ಚುತ್ತದೆ. ಯುವಕರು ‘ಕತ್ತಲೆಯ ದಾರಿದೀಪ’ಗಳಾಗಿ ದೇಶದ ಭವಿಷ್ಯವನ್ನು ಉಜ್ವಲಗೊಳಸಬೇಕು.
ಬೆಳೆಸಿಕೊಳ್ಳುವ ಬಗೆ
    ಸಾಮಾನ್ಯವಾಗಿ ಕಾಲೇಜು ಶಿಕ್ಷಣದಲ್ಲಿ ನೀತಿ/ಮೌಲ್ಯಶಿಕ್ಷಣವನ್ನು ಪ್ರತ್ಯೇಕವಾಗಿ ಬೋಧಿಸುವುದಿಲ್ಲ. ಬದಲಾಗಿ ಅದು ಕಲಿಯುವ ವಿಷಯಗಳಲ್ಲೇ ಆಂತರಿಕವಾಗಿ ಅಡಗಿರುತ್ತವೆ. ಪ್ರತಿಯೊಂದು ಪರಿಕಲ್ಪನೆಯ ಕಲಿಕೆಯಲ್ಲಿ ಮೌಲ್ಯ ಅಡಗಿರುತ್ತದೆ. ಉದಾತ್ತ ವ್ಯಕ್ತಿಗಳ ಜೀವನ ಚರಿತ್ರೆ, ಸಾಹಿತ್ಯ, ವಿಮರ್ಶೆ, ಕಥೆ, ಕಾದಂಬರಿ, ತತ್ವ, ಆದರ್ಶ ಮುಂತಾದ ಅಂಶಗಳ ಕಲಿಕೆಯಿಂದ ಮೌಲ್ಯಗಳನ್ನು ಆಂತರಿಕವಾಗಿ ಅಳವಡಿಸಿಕೊಳ್ಳಬೇಕು.
    ವಿವಿಧ ಸಂಸ್ಕತಿ ಮತ್ತು ವಿವಿಧ ದೇಶಗಳ ಜನಜೀವನ ಅಧ್ಯಯನ, ಸಾಂಸ್ಕøತಿಕ ಚಟುವಟಿಕೆ ಮತ್ತು ಆಟೋಟಗಳಲ್ಲಿ ಪಾಲ್ಗೊಳ್ಳುವಿಕೆ, ಚರ್ಚೆ, ವಿಚಾರ ಸಂಕಿರಣ, ಉಪನ್ಯಾಸಗಳಲ್ಲಿ ಭಾಗವಹಿಸುವಿಕೆ, ವಿವಿಧ ಸೇವಾ ಸಂಘಗಳ ಸದಸ್ಯತ್ವ ಹೊಂದುವುದರಿಂದಲೂ ಮೌಲ್ಯಗಳು ಬೆಳೆಯುತ್ತವೆ. ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಹಬ್ಬಗಳು, ವಿಶೇಷ ದಿನಾಚರಣೆಗಳು, ನಾಟಕ, ಗೀತಗಾಯನ, ನೃತ್ಯ, ಸಂಗೀತೋತ್ಸವ, ಮುಂತಾದ ಕಾರ್ಯಕ್ರಮಗಳನ್ನು ಆಯೋಜಿಸುವಿಕೆ ಮತ್ತು ಭಾಗವಹಿಸುವಿಕೆಯಿಂದಲೂ ಮೌಲ್ಯಗಳು ಬೆಳೆಯುತ್ತವೆ. ಆದಾಗ್ಯೂ ಕೆಲವು ವಿಶೇಷ ತಂತ್ರಗಳನ್ನು ಅಳವಡಿಸಿಕೊಳ್ಳುವುದರಿಂದಲೂ ಮೌಲ್ಯಗಳನ್ನು ಬೆಳೆಸಿಕೊಳ್ಳಬಹುದು.
•    ಬೂಟಾಟಿಕೆ ಅಥವಾ ಡಾಂಭಿಕ ಮೌಲ್ಯಗಳನ್ನು ಬಿಟ್ಟು ವಾಸ್ತವಿಕ ನೆಲೆಗಟ್ಟಿನ ಆದರ್ಶಗಳನ್ನು ಬೆಳೆಸಿಕೊಳ್ಳಿ.
•    ಸ್ವಸಹಾಯ ಎಂಬುದು ಕೇವಲ ಸಮಸ್ಯೆಗಳಿಂದ ಹೊರಬರುವುದಲ್ಲ. ಆ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಂಡ  ಮಾರ್ಗದ ಪುನರ್ ವಿಮರ್ಶೆಯ ಮೌಲ್ಯ. ನಿಮ್ಮಲ್ಲಿನ ಆಂತರಿಕ ಸಾಮಥ್ರ್ಯಗಳ ವೃದ್ದಿಯ ಮೌಲ್ಯವಾಗಿ ಪರಿವರ್ತಿಸಿ.
•    ಪ್ರತಿ ತಪ್ಪು ಅಥವಾ ದೌರ್ಬಲ್ಯಗಳಿಂದ ಕೆಲವನ್ನು ಕಳೆದುಕೊಂಡರೂ ಪುನಃ ಅದಕ್ಕೂ ಹೆಚ್ಚಿನದನ್ನು ಗಳಿಸುವ ಶಕ್ತಿ ನಿಮ್ಮಲ್ಲಿದೆ ಎಂಬುದನ್ನು ಮರೆಯಬಾರದು.
•    ಪ್ರತಿ ಎಡವಟ್ಟೂ ಸಹ ಹೊಸ ಕೌಶಲ್ಯ ಪಡೆಯಲು ಸಹಾಯಕವಾಗಬೇಕು. ಅಂತಯೇ ಪ್ರತೀ ನಿರಾಕರಣೆಯೂ ಸತ್ಯ ಶೋಧಕ ಮಾರ್ಗವಾಗಬೇಕು.
•    ಅಪವಾದ, ಹಿಂಸೆ, ಅನೈತಿಕತೆಗಳಿಂದ ದೂರವಿದ್ದು ಅವುಗಳ ವಿರುದ್ದದ ಕಾರ್ಯತಂತ್ರಗಳನ್ನು ರೂಪಿಸಿಕೊಳ್ಳಬೇಕು.
•    ಗೊಂದಲ ಮತ್ತು ಅಂಧ ನಂಬಿಕೆಗಳಿಂದ ಹೊರಬಂದು ನಂಬಿಕೆ ಮತ್ತು ಧೃಢವಿಶ್ವಾದಿಂದ ಮುನ್ನಡೆಯಿರಿ.
•    ಒಡನಾಡಿಗಳಿಂದ ಧಾರ್ಮಿಕ ಪ್ರಭಾವಕ್ಕೆ ಒಳಗಾಗುವುದಕ್ಕಿಂತ ಶಿಕ್ಷಣದಿಂದ ಸಾಮಾಜಿಕರಣ ಹೊಂದುವುದು ಅತೀಮುಖ್ಯ.
•    ತಂದೆ-ತಾಯಿ, ಬಂಧು-ಬಳಗ, ಸ್ನೇಹಿತರು, ಒಡನಾಡಿಗಳ ಸಂಬಂಧವನ್ನು ಪ್ರತೀಕಾರದಿಂದ ಹಾಳು ಮಾಡಿಕೊಳ್ಳುವ ಬದಲು ಪ್ರೀತಿ ವಿಶ್ವಾಸಗಳಿಂದ ಗಟ್ಟಿಗೊಳಿಸಿಕೊಳ್ಳಿ.
•    ಅನ್ಯಾಯ ಅಕ್ರಮಗಳ ವಿರುದ್ದ ಧ್ವನಿ ಎತ್ತಬೇಕೇ ಹೊರತು ಸೇಡು ಪ್ರತೀಕಾರಗಳಿಗಾಗಿ ಅಲ್ಲ.
•    ವಾಹನದ ವೇಗ ಹೆಚ್ಚಳ ಮತ್ತು ನಿಯಂತ್ರಣಕ್ಕೆ ಆಕ್ಸಿಲೇಟರ್ ಮತ್ತು ಬ್ರೇಕ್ ಇರುವಂತೆ ಪ್ರತಿ ವಿಷಯದ ಮೇಲೆ ಪ್ರಭುತ್ವ ಮತ್ತು ನಿಯಂತ್ರಣ ಅಗತ್ಯ. ಇದು ಮೌಲ್ಯಗಳನ್ನು ಅಳವಡಿಸಿಕೊಳ್ಳುವದರಿಂದ ಮಾತ್ರ ಸಾಧ್ಯ.
•    ನೈತಿಕ ಮೌಲ್ಯಗಳ ಜ್ಞಾನ ಅಳವಡಿಸಿಕೊಳ್ಳದ ಹೊರತು ವ್ಯಕ್ತಿಯ ವ್ಯಕ್ತಿತ್ವ ಪರಿಪೂರ್ಣವಲ್ಲ. ನೈತಿಕ ಮೌಲ್ಯಗಳು ವ್ಯಕ್ತಿತ್ವ ನಿರ್ಮಾಣದಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ.
•    ಸಮಾಜದ ಸಂತ್ರಸ್ತರಿಗೆ ಕಾಲೂರಿ ಮುನ್ನಡೆಯಲು ಸಹಾಯ ಹಸ್ತ ನೀಡಿ. ಆಗ ನಿಮ್ಮ ವೈಶಿಷ್ಟ್ಯತೆಯನ್ನು ಜಗಕೆ ತೋರಿಸಲು ಸಾಧ್ಯ.
ಕೊನೆ ಹನಿ
    ಸಮಾಜ ಯಾವಾಗಲೂ ಚಲನಶೀಲವಾದುದೇ ಹೊರತು ಸ್ಥಿರವಾದುದು ಅಲ್ಲ. ಜನರ ಮೌಲ್ಯಗಳು, ಪ್ರವೃತ್ತಿಗಳು, ಚಟುವಟಿಕೆಗಳು ಬದಲಾಗುವ ಮೂಲಕ ಸರಳ ಸಂಪ್ರಾದಾಯಿಕ ಸಮಾಜವು ಪರಿಪೂರ್ಣ ಸಮಾಜವಾಗಿ ಪರಿವರ್ತನೆಗೊಳ್ಳುತ್ತದೆ.
    ಯಾವುದೇ ಸಮಾಜದ ಅಭಿವೃದ್ದಿಯಲ್ಲಿ ಯುವಕರ ಪಾತ್ರ ಮಹತ್ವದ್ದು. ಯುವಕರ ಸಹಭಾಗಿತ್ವ ಇಲ್ಲದೇ ಸಮಾಜ ಸ್ವಾವಲಬಿಯಾಗಿ ಅಭಿವೃದ್ದಿ ಹೊಂದಲು ಸಾಧ್ಯವಿಲ್ಲ. ಪ್ರತೀ ಸಮಾಜದ ಉನ್ನತಿಗೆ ಯುವಕರ ಪ್ರಾಮಾಣಿಕ ಮತ್ತು ಸನ್ನಡತೆಯ ವರ್ತನೆಗಳೇ ಮೂಲಾಂಶಗಳು. ಯುವಕರು ಇದನ್ನರಿತು ಸಮಾಜದ ಪ್ರಗತಿಗೆ ತಮ್ಮದೇ ಆದ ಕಾಣಿಕೆಯನ್ನು ನೀಡುವ ಮೂಲಕ ಸ್ವಾಸ್ಥ ಸಮಾಜ ನಿರ್ಮಾಣಕ್ಕೆ ಮುಂದಾಗಬೇಕು.
ಶಿಫಾರಸ್ಸುಗಳು
•    ಸಮಾಜದ ಮೂಲಘಟಕವಾದ ಕುಟುಂಬವು ತನ್ನ ತಪ್ಪುಗಳನ್ನು ಅಂದರೆ ಮೌಲ್ಯಗಳನ್ನು ಪುನರ್ ರಚಿಸಿಕೊಳ್ಳುವ ಮೂಲಕ ಸಮಾಜದ ಧನಾತ್ಮಕ ಬದಲಾವಣೆಗೆ ಮುಂದಾಗಬೇಕು. ಕುಟುಂಬ ಸಮಾಜೀಕರಣದ  ದಲ್ಲಾಲಿಯಾಗಿ ಪ್ರಮುಖ ಪಾತ್ರ ವಹಿಸಬೇಕು.
•    ವಿಶೇಷವಾಗಿ ಯುವಕರಲ್ಲಿ ನಾಯಕತ್ವದ ಗುಣಗಳನ್ನು ಬೆಳೆಸುವಲ್ಲಿ ಸರ್ಕಾರ ಮತ್ತು ಸರ್ಕಾರೇತರ ಸಂಸ್ಥೆಗಳು ಜವಾಬ್ದಾರಿ ವಹಿಸಬೇಕು. ಏಕೆಂದರೆ ನಾಳೆಯ ಭವಿಷ್ಯ ಇಂದಿನ ಅಡಿಪಾಯವನ್ನು ಅವಲಂಬಿಸಿದೆ. ಅದಕ್ಕಾಗಿ ವಿಶ್ವಾಸಾರ್ಹವಾದ ಯುವ ನಾಯಕರ ನಿರ್ಮಾಣ ಇಂದಿನ ಆಧ್ಯತೆ ಆಗಬೇಕು.
•    ಯುವಕರು ಪರಸ್ಪರ ಸಾಮಾಜಿಕ ಜಾಲಗಳನ್ನು ಸೃಷ್ಟಿಸಿಕೊಂಡು ನೈತಿಕ ವಿಷಯಗಳ ಬಗ್ಗೆ ಚರ್ಚಿಸುತ್ತಾ ತಮ್ಮನ್ನು ತಾವೇ ಪ್ರೋತ್ಸಾಹಿಸಿಕೊಳ್ಳಬೇಕು. ಆ ಮೂಲಕ ಸಾಂಸ್ಥಿಕವಾದ ಮತ್ತು ಬದುಕಲು ಅರ್ಹವಾದ ನೈತಿಕತೆಯನ್ನು ಸ್ಥಾಪಿಸಿಕೊಳ್ಳಬಹುದು.

ಉದ್ಯೋಗಕ್ಕಾಗಿ ಶಿಕ್ಷಣ ಎನ್ನುವ ವ್ಯವಸ್ಥೆಯಿಂದ ಮೌಲ್ಯಗಳು ನಾಶವಾಗುತ್ತಿವೆ. ಡಿಜಿಟಲ್ ತಂತ್ರಜ್ಞಾನದಿಂದ ಪಾರಂಪರಿಕ ಸಂಬಂಧಗಳು ಮತ್ತು ಸಂಸ್ಕøತಿ ಹದಗೆಡುತ್ತಿದೆ. ಎಲ್ಲಿಯವರೆಗೆ ಶಿಕ್ಷಣದಿಂದ ಬದುಕುವ ದಾರಿಯನ್ನು ಹೇಳಿಕೊಡಲಾಗುತ್ತಿಲ್ಲವೋ ಅಲ್ಲಿಯವರೆಗೆ ಮೌಲ್ಯಗಳು ಬೆಳೆಯಲು ಸಾಧ್ಯವಿಲ್ಲ. ಮೌಲ್ಯಗಳನ್ನು ಬೆಳೆಸಿಕೊಳ್ಳಲು ಯಾವುದೇ ಪದವಿಯ ಅಗತ್ಯವಿಲ್ಲ.  
                   ಡಾ//ಸತೀಶ್ ಪಾಟೀಲ್. ಉಪನ್ಯಾಸಕರು
                   ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು                 
                   ಹಗರಿಬೊಮ್ಮನಹಳ್ಳಿ












ಸುಸ್ಥಿರ ಅಭಿವೃದ್ದಿಗಾಗಿ ನೈತಿಕ ಮೌಲ್ಯಗಳ ಜೊತೆಗೆ ಸಂವಿಧಾನಾತ್ಮಕ ಮೌಲ್ಯಗಳಾದ ಸಮಾನತೆ, ಭಾತೃತ್ವ, ಸಾರ್ವಭೌಮತೆ, ಪ್ರಜಾಸತ್ತಾತ್ಮಕತೆ ಮುಂತಾದ  ಮೌಲ್ಯಗಳನ್ನು ಬೆಳೆಸಿಕೊಳ್ಳಬೇಕು. ಇವು ಕೇಲವ ತಾತ್ವಿಕ ಮೌಲ್ಯಗಳಾಗದೇ ಕುಟುಂಬದಿಂದಲೇ ಪ್ರಾಯೋಗಿಕವಾಗಿ ಅಳವಡಿಕೆಯಾಗಬೇಕು.
               ಎಂ.ಲೋಕೇಶ್.ಹೊಳಗುಂದಿ.
             ಸಂಪನ್ಮೂಲ ವ್ಯಕ್ತಿ ಹಾಗೂ ಸಂವಹನಕಾರರು
         ಅಬ್ದುಲ್ ನಜೀರ್‍ಸಾಬ್ ಗ್ರಾಮೀಣಾಭಿವೃದ್ದಿ ಸಂಸ್ಥೆ ಮೈಸೂರು.

                                                                                                                         ಆರ್.ಬಿ.ಗುರುಬಸವರಾಜ

ಕಹಳೆ: ಕನ್ನಡ ಬಂಟರ ಬಂಟ - ಚಂದ್ರಶೇಖರ ಶಾಸ್ತ್ರಿ

ಕಹಳೆ: ಕನ್ನಡ ಬಂಟರ ಬಂಟ - ಚಂದ್ರಶೇಖರ ಶಾಸ್ತ್ರಿ: ಒಬ್ಬ ವ್ಯಕ್ತಿ ಹೆಚ್ಚೆಂದರೆ ಆತನ 70-80ನೇ ವಯಸ್ಸಿನಲ್ಲೂ ಸಾಹಿತ್ಯ ಸಮ್ಮೇಳನಗಳಿಗೆ ಭಾಗವಹಿಸಬಹುದು. ಅನಂತರದ ವಯಸ್ಸಿನಲ್ಲಿ ದೇಹ ವಯೋಸಹಜವಾಗಿ ಸ್ಪಂದಿಸದ ಕಾರಣ ಭಾಗವಹಿ...

'ಕೊಸಿಮೊ' ಪುಸ್ತಕ ಪರಿಚಯ

ಅಕ್ಟೋಬರ್ 2015 ರ "ಟೀಚರ್" ಮಾಸಪತ್ರಿಕೆಯಲ್ಲಿ ಪ್ರಕಟವಾದ 'ಕೊಸಿಮೊ' ಪುಸ್ತಕ ಪರಿಚಯ

‘ಕೊಸಿಮೊ’ ಎಂಬ ಮರದ ಮೇಲಿನ ಪ್ರಪಂಚ

    ಸಮಕಾಲಿನ ತಲ್ಲಣಗಳನ್ನು ವಾಸ್ತವವಾದಿ ನೆಲೆಗಟ್ಟಿನ ಮೇಲೆ ರೂಪಿಸಿ, ಅಕ್ಷರ ರೂಪು ನೀಡುವುದು ಬಹು ಕಷ್ಟದ ಕೆಲಸ. ಆದಾಗ್ಯೂ ಕೆಲ ಲೇಖಕರು ಅಂತಹ ಸಾಹಸಕ್ಕೆ ಕೈ ಹಾಕುವುದುಂಟು. ಅಂತಹ ಸಾಹಸಿಗ ಲೇಖಕರ ಸಾಲಿನಲ್ಲಿ ನಿಲ್ಲುವ ಲೇಖಕರೆಂದರೆ ಇಟಲಿಯ ‘ಇಟಾಲೊ ಕಾಲ್ವಿನೊ’ ಅವರು.
    ಇಟಾಲೊ ಕಾಲ್ವಿನೊ ಎಂತಹ ಬರಹಗಾರರು ಎಂಬುದನ್ನು ನಿರ್ಧರಿಸಲು ಅವರ ‘ಬ್ಯಾರೆನ್ ಇನ್ ದಿ ಟ್ರೀಸ್’(ಕೊಸಿಮೊ) ಕೃತಿಯೊಂದೇ ಸಾಕು. ಅವರ ಇಡೀ ಪರಿಶ್ರಮವನ್ನು ಶಬ್ದಗಳ ಲಯಗಾರಿಕೆಯನ್ನು ಪಾತ್ರಗಳ ಮೂಲಕ ನೀಡುವ ಅವರ ತುಡಿತ-ಮಿಡಿತಗಳನ್ನು ಎಂತಹವರೂ ಅರ್ಥಮಾಡಿಕೊಳ್ಳಬಹುದು.
    ಕೊಸಿಮೊ ಅವರ ಅದ್ಬುತ ಕಾದಂಬರಿಗಳಲ್ಲಿ ಒಂದು. ಪ್ರಸ್ತುತ ಕಾದಂಬರಿಯ ಕಥಾವಸ್ತು ವಿಭಿನ್ನವೂ ವಿಶೇಷವೂ ಆಗಿದೆ. ಬಹುತೇಕ ಲೇಖಕರು ನೆಲದ ಮೇಲಿನ ಮಾನವನ ಕುರಿತು ಕಥೆ ಕಾದದಂಬರಿ ರಚಿಸಿದರೆ ಕಾಲ್ವಿನೊ ಅವರು ಮರದ ಮೇಲಿನ ಮಾನವನ ಕುರಿತು ಕಾದಂಬರಿ ರಚಿಸಿರುವುದೇ ಇದರ ವಿಶೇಷತೆ.
    ಇಲ್ಲಿ ರಮ್ಯತೆ ಇದೆ, ವಾಸ್ತವಿಕತೆ ಇದೆ, ರಂಜನೀಯತೆ ಇದೆ, ಸೃಜನಶೀಲತೆ ಇದೆ. ಜೊತೆಗೆ ಪರಿಸರ ಕಾಳಜಿಯೂ ಕೂಡಾ ಇದೆ. ಇಲ್ಲಿ ಏನಿದೆ? ಎನ್ನುವುದಕ್ಕಿಂತ ಏನಿಲ್ಲ? ಎಂದು ಓದುಗ ಹುಡುಕ ಹೊರಟರೆ ಅವನೊಬ್ಬ ಸಾಹಿತ್ಯ ಸಂಶೋಧಕನಾಗುತ್ತಾನೆ.
    ಕಾದಂಬರಿಯು 1767 ರ ನಿರ್ದಿಷ್ಟ ದಿನಾಂಕದೊಂದಿಗೆ ಪ್ರಾರಂಭವಾಗುತ್ತದೆಯಾದರೂ ಅದು ಸಮಕಾಲಿನ ಸಮಾಜಿಕ ಪರಿಸರವನ್ನೇ ಬಿಚ್ಚಿಡುತ್ತದೆ. ಇಡೀ ಕಾದಂಬರಿ ಒಂದು ಇಟಾಲಿಯನ್ ಬ್ಯಾರನ್ ಕುಟುಂಬದ ಸುತ್ತ ಗಿರಕಿ ಹೊಡೆದರೂ, ಆ ಗಿರಕಿಯಲ್ಲೇ ಇಡೀ ಪ್ರಪಂಚದ ವಿದ್ಯಮಾನಗಳನ್ನು ಬಿಂಬಿಸುವ ಪ್ರಯತ್ನ ನಡೆದಿದೆ.
    ಕಾದಂಬರಿಯ ಪ್ರಾರಂಭದಲ್ಲೇ ಒಂದು ಊಟದ ಪ್ರಸಂಗಕ್ಕಾಗಿ ಮನೆಯವರ ವಿರುದ್ದ ಬಂಡೆದ್ದು ಮನೆಬಿಟ್ಟು ಮರವೇರಿದ 12 ವರ್ಷದ ಬಾಲಕ ಕೊಸಿಮೊ , ಉಪನಯನವನ್ನು ದಿಕ್ಕರಿಸಿ ಮನೆತೊರೆದ ಕ್ರಾಂತಿಕಾರಿ ಬಸವಣ್ಣನ ನೆನಪು ತರುತ್ತಾನೆ. ಹಾಗೆ ಮರವೇರಿದ ಕೊಸಿಮೊ ತನ್ನ ಜೀವಿತಾವಧಿಯಲ್ಲಿ ಒಮ್ಮೆಯೂ ನೆಲಕ್ಕೆ ಕಾಲಿಡದೇ ಬದುಕಿದ ಅವನ ರೀತಿ ರೋಮಾಂಚನ ಎನಿಸಿದರೂ ಹೀಗೂ ಬದುಕಬಹುದು ಎಂಬುದನ್ನು ಕಲಿಸುತ್ತದೆ.
    ಕಾದಂಬರಿಯ ಮುಖ್ಯ ಪಾತ್ರಧಾರಿ ಕೊಸಿಮೊ ಕೇವಲ ಒಬ್ಬ  ವ್ಯಕ್ತಿಯಲ್ಲ. ಅವನೇ ಒಂದು ಪ್ರಪಂಚ. ಅವನ ಈ ಪ್ರಪಂಚದಲ್ಲಿ ಪರಿಸರದೊಂದಿಗಿನ ಹೊಂದಾಣಿಕೆ, ಭವಾಭಾವದ ನಡುವೆಯೂ ಉತ್ಕøಷ್ಟತೆಯನ್ನು ಸಾಧಿಸಿ, ಶ್ರೇಷ್ಠತೆ ಪಡೆದ ಬಗೆಯನ್ನು ಕಾಲ್ವಿನೊ ಸುಂದರವಾಗಿ ರೂಪಿಸಿದ್ದಾರೆ.
    ಎಲ್ಲವನ್ನೂ ತ್ಯಜಿಸಿ ಏನೂ ಇಲ್ಲಗಳ ಮಧ್ಯೆ ಮರದ ಮೇಲೆಯೇ ಎಲ್ಲವನ್ನೂ ಸೃಷ್ಟಿಸಿಕೊಂಡು ಬದುಕುವ ಕೊಸಿಮೊ ಅಪ್ರತಿಮ ಸೃಷ್ಟಿಕರ್ತನಾಗಿ ಗೋಚರಿಸುತ್ತಾನೆ. ಪೋಲಿಯಾಗಿ ನೆಲದ ಮೇಲೆ ಓಡಾಡಬೇಕಾದ ವಯಸ್ಸಿನಲ್ಲಿ ಕೋತಿಯಂತೆ ಮರದಲ್ಲೇ ಓಡಾಡುವ, ಜೋಲಾಡುವ ಆ ಮೂಲಕ ಇಡೀ ಊರಿನ ಜನರ ಬಾಯಿಗೆ ಚರ್ಚೆಯ ವಿಷಯವಾಗುವ ಕೊಸಿಮೊನ ಪಾತ್ರ ಓದುಗರ ಅವಧಾನವನ್ನು ಹಿಡಿದಿಡುತ್ತಲೇ ರಮ್ಯತೆಯ ಲೋಕದಲ್ಲಿ ತೇಲಾಡಿಸುತ್ತದೆ.
    ಪಕ್ಕದ ಮನೆಯ ಶ್ರೀಮಂತ ಹುಡುಗಿ ವಯೋಲಾಳೊಂದಿಗಿನ ಸ್ನೇಹ, ಮೋಹ, ಪ್ರೇಮ, ಕಾಮ, ದ್ವೇಷ, ಮತ್ಸರ, ವಿರಹಗಳೆಲ್ಲವೂ ಕೊಸಿಮೊನನ್ನು ಒಬ್ಬ ಸಮಕಾಲೀನ ಪಡ್ಡೆ ಹುಡುಗ ಎಂಬಂತೆ ಬಿಂಬಿಸಿದರೆ  ರೈತರ ಬೆಳೆಗಳ ಕೀಟ ಆರಿಸುವ, ಕಳೆಕೀಳುವ, ಪ್ರಾಣಿ ಪಕ್ಷಿಗಳಿಂದ ಬೆಳೆಗಳನ್ನು ರಕ್ಷಿಸುವ ಮೂಲಕ ರೈತರ ಏಳಿಗೆಯನ್ನು ಬಯಸುವ ಸಮಾಜೋದ್ದಾರಕನನ್ನಾಗಿ, ಕಾಡ್ಗಿಚ್ಚನ್ನು ನಂದಿಸುವ ಅರಣ್ಯಪಾಲಕನನ್ನಾಗಿಯೂ ಬಿಂಬಿಸಿವೆ.
    ತಂದೆಯ ಮಾತಿಗೆ ಗೌರವ ಕೊಡುವ ಆಜ್ಞಾಪಾಲಕನಾಗಿ ವಿದ್ಯಾರ್ಜನೆಗೆ ಮುಂದಾದ ಕೊಸಿಮೊ ತನ್ನ ಗುರುಗಳಿಗೇ ಗುರುವಾಗಿ ಪರಿವರ್ತನೆ ಹೊಂದುವ ಪರಿ ಓದಿನ ಮಹತ್ವವನ್ನು ತಿಳಿಸುತ್ತದೆ. ‘ಪುಸ್ತಕ ಓದುವ ಹವ್ಯಾಸವುಳ್ಳವರು ಎಲ್ಲಿದ್ದರೂ ಹೇಗಿದ್ದರೂ ಸುಖವಾಗಿರಬಲ್ಲರು’ ಎಂಬುದನ್ನು ಸಾಬೀತುಪಡಿಸಲು ಇಲ್ಲಿ ಅನೇಕ ಸಾಕ್ಷ್ಯಾಧಾರಗಳಿವೆ. ಅವುಗಳಲ್ಲಿ ಮುಖ್ಯವಾದದ್ದು ಎಂದರೆ, ಸಣ್ಣಪುಟ್ಟ ಕಳ್ಳತನಗಳಿಂದ ಢಾಕುವಾಗಿ ಬೆಳೆದಿದ್ದ ಬ್ರೂಗಿ ಎಂಬ ಕ್ರೂರಪ್ರಾಣಿಗೆ ಓದುವ ಹುಚ್ಚನ್ನು ಹಚ್ಚುವ ಮೂಲಕ ರಾಬರಿಗಳನ್ನು ನಿಯಂತ್ರಿಸಲು ಪ್ರಯತ್ನಿಸಿದ್ದು ಕೊಸಿಮೊನ ಟ್ಯಾಲೆಂಟೆಡ್ ಬ್ರೈನ್.
    ಟ್ರೀ ವಲ್ರ್ಡ್‍ನಲ್ಲಿದ್ದುಕೊಂಡು ಅಂಡರ್‍ವಲ್ರ್ಡ್ ಪಾತಕಿಗಳನ್ನು ಮಟ್ಟ ಹಾಕಲು ಪ್ರಯತ್ನಿಸುವ ಕೊಸಿಮೊ ಒಬ್ಬ ದಕ್ಷ ಪೋಲೀಸ್ ಅಧಿಕಾರಿಯಾಗಿ ಗೋಚರಿಸುತ್ತಾನೆ. ಕಾದಂಬರಿಯ ಅಂತ್ಯಕ್ಕೆ ಗೋವಿನ ಹಾಡು ಪದ್ಯದ ‘ಕೊಟ್ಟ ಮಾತಿಗೆ ತಪ್ಪಲಾರೆನು ಕೆಟ್ಟ ಯೋಚನೆ ಮಾಡಲಾರೆನು’ ಎಂಬ ಸಾಲುಗಳು ನೆನಪಾಗುತ್ತವೆ. ಕೊಸಿಮೊ ತನ್ನ ಗೆಳತಿ ವಯೋಲಾಳಿಗೆ ನೀಡಿದ ವಚನಕ್ಕೆ ಬದ್ದನಾಗಿ ನೆಲದ ಮಣ್ಣನ್ನು ಸೊಂಕಿಸಿಕೊಳ್ಳದೇ ಮರಣಹೊಂದಿ ಅಂತಧ್ರ್ಯಾನ ಹೊಂದುವ ಪರಿ ಓದಿಗನ ಕಣ್ಣಂಚಿನ ತೇವವನ್ನು ಹೆಚ್ಚಿಸುತ್ತದೆ. ಆ ಮೂಲಕ ಕೌತುಕಗಳನ್ನು, ಪ್ರಶ್ನೆಗಳನ್ನೂ ಉಳಿಸುತ್ತದೆ.
    ಕೊಸಿಮೊ ಕೇವಲ ಒಂದು ಕಾದಂಬರಿ ಅಲ್ಲ. ಇದು ನಮ್ಮೊಳಗಿನ ನಮ್ಮನ್ನು ಹುಡುಕುವ ಪ್ರಯತ್ನ. ಸಾಧಿಸಲು ಅನೇಕ ಮಾರ್ಗಗಳಿವೆ ಎಂಬುದನ್ನು ಸಾಬೀತು ಪಡಿಸುವ ಪ್ರೇರೇಪಣಾ ಕೃತಿ. ಮಾನವರಾದ ನಾವು ಮಾಡಬೇಕಾದ ಮತ್ತು ಮಾಡಬಾರದ ಕೆಲಸಗಳನ್ನು ಕುರಿತು ಮಾರ್ಗದರ್ಶನ ನೀಡುವ ಮಾರ್ಗದರ್ಶಿ, ವೈಚಾರಿಕತೆಯನ್ನು ಬೆಳೆಸುವ ವಿಚಾರ ಪ್ರಚೋದಕ ನಾಗಿ, ಪರಿಸರದೊಂದಿಗಿನ ಮಾನವನ ಅವಿನಾಭಾವ  ಸಂಬಂಧಗಳನ್ನು ಗಟ್ಟಿಗೊಳಿಸುವ, ಜಾಗತೀಕರಣದ ಪ್ರಭಾವದಿಂದಾಗುವ ಅನಾಹುತಗಳ ವಿರುದ್ದ ನಮ್ಮನ್ನು ಎಚ್ಚರಿಸುವ ಆಪ್ತಸಮಾಲೋಚಕನಾಗಿ ಈ ಕೃತಿ ಪ್ರಾಮುಖ್ಯ ಎನಿಸುತ್ತದೆ.
    ಇದನ್ನು ಓದುತ್ತಾ ಹೋದಂತೆಲ್ಲಾ ಪಾತ್ರಗಳು ನಮ್ಮ ಮನಸ್ಸಿನ ಕ್ಯಾನ್ವಾಸ್ ಮೇಲೆ ರಂಗುರಂಗಿನ ಸ್ಥರ ಚಿತ್ರಗಳನ್ನಾಗಿ,  ಆ ಸ್ಥಿರ ಚಿತ್ರಗಳು ವಿಡಿಯೋ ಚಿತ್ರಣಗಳಾಗಿ ದಾರಾವಾಹಿ ಅಥವಾ ಸಿನೆಮಾ ರೂಪದಲ್ಲಿ ಕಣ್ಣಮುಂದೆ ಸಾಗಿ ಹೋಗುತ್ತವೆ.
    ಪರಿಸರ ಪ್ರಿಯರೂ, ಸಾಹಿತ್ಯ ಶೋಧಕರೂ ಆದ ಕೆ.ಪಿ.ಸುರೇಶ ಅವರ ಅನುವಾದ ಆಪ್ಯಾಯಮಾನ ಎನಿಸುತ್ತದೆ. ಇದು ಅನುವಾದಿತ ಕೃತಿ ಅಂತ ಅನಿಸುವುದೇ ಇಲ್ಲ. ಥೇಟ್ ಕನ್ನಡದ ಕೃತಿ ಎಂಬಂತೆ ಭಾಸವಾಗುತ್ತದೆ. ಆದ್ದರಿಂದ ಪ್ರತಿಯೊಬ್ಬ ಓದುಗನೂ ಓದಲೇಬೇಕಾದ ಕೃತಿ ‘ಕೊಸಿಮೊ’.
ಪುಸ್ತಕ ಪರಿಚಯ
ಕೃತಿಯ ಹೆಸರು : ಕೊಸಿಮೊ(ಕಾದಂಬರಿ)
ಮೂಲ ಲೇಖಕರು: ಇಟಾಲೊ ಕಾಲ್ವಿನೊ
ಕನ್ನಡಾನುವಾದ : ಕೆ.ಪಿ.ಸುರೇಶ
ಪ್ರಕಾಶಕರು : ಅಭಿನವ ಪ್ರಕಾಶನ. ಬೆಂಗಳೂರು
ಬೆಲೆ : 100 ರೂಪಾಯಿಗಳು

                                                                                                        ಆರ್.ಬಿ.ಗುರುಬಸವರಾಜ

‘ಟೀಚರ್’ ಅಕ್ಟೋಬರ್ 2015

ಆಡಿಯೋ ಬುಕ್ಸ್ AUDIO BOOKS

 ದಿನಾಂಕ 30-09-2015ರ 'ವಿಜಯವಾಣಿ'ಯಲ್ಲಿ ಪ್ರಕಟವಾದ ನನ್ನ ಲೇಖನ.

ಯುವ ಟ್ರೆಂಡಿನ

ಆಡಿಯೋ ಬುಕ್ಸ್

    ಇತ್ತೀಚೆಗ ಕೆ.ಎ.ಎಸ್ ಮುಖ್ಯ ಪರೀಕ್ಷೆಗೆ ತಯಾರಿ ನಡೆಸಿರುವ ವಿರುಪಾಕ್ಷ ನಮ್ಮ ಮನೆಗೆ ಭೇಟಿ ನೀಡಿ ಕೆಲವು ಪುಸ್ತಕಗಳ ಬಗ್ಗೆ ಚರ್ಚಿಸುತ್ತಿದ್ದ. ನಿಗದಿತ ಪಠ್ಯವನ್ನು ಹೇಗೆ ಓದಬೇಕು ಎಂಬ ಬಗ್ಗೆ ಚರ್ಚೆ ಸಾಗಿತ್ತು. ಪುಸ್ತಕಗಳನ್ನು ಓದುವ ಬದಲು ಕೇಳುವಂತಿದ್ದರೆ ತುಂಬಾ ಆಸಕ್ತಿದಾಯವಾಗಿರುತ್ತಿತ್ತು ಎಂದು ತನ್ನ ಅಳಲು ತೋಡಿಕೊಂಡ. ಒಂದು ಕ್ಷಣ ಅವನ ಮಾತು ಸತ್ಯ ಎನಿಸಿತು. ಆಗ ವಿಷಯದ ಬಗ್ಗೆ ಹೆಚ್ಚು ಮಾಹಿತಿ ಕಲೆಹಾಕಿದಾಗ ದೊರೆತ ಪುಸ್ತಕಗಳೇ ಆಡಿಯೋ ಪುಸ್ತಕಗಳು.
    ಏನಿದು ಆಡಿಯೋ ಪುಸ್ತಕ? : ರೆಕಾರ್ಡೆಡ್ ಸ್ವರೂಪದಲ್ಲಿನ ಕೇಳಬಹುದಾದ ಪುಸ್ತಕಗಳೇ ಆಡಿಯೋ ಪುಸ್ತಕಗಳು. ಅಂದರೆ ಮೂಲ ಮುದ್ರಿತ ಪುಸ್ತಕದ ಸಂಕ್ಷೇಪಿತವಲ್ಲದ ಧ್ವನಿಮುದ್ರಿತ ಪುಸ್ತಕಗಳು. ಈ ಪುಸ್ತಕಗಳನ್ನು ಪ್ರಯಾಣದ ವೇಳೆ ಹಾಗೂ ಇನ್ನಿತರೇ ಕೆಲಸಗಳ ಜೊತೆಜೊತೆಗೆ ಕೇಳುವ ಮೂಲಕ ಪುಸ್ತಕಗಳಲ್ಲಿನ ಮಾಹಿತಿಯನ್ನು ಆಸ್ವಾದಿಸಬಹುದು. ಹರಿಯದ ಮುರಿಯದ ಈ ಪುಸ್ತಕಗಳನ್ನು ಸುಲಭವಾಗಿ ಎಲ್ಲೆಂದರಲ್ಲಿ ಕೊಂಡೊಯ್ಯಬಹುದು.
    ಪುಸ್ತಕಗಳನ್ನು ಓದಬೇಕೆಂದರೆ ಮಳಿಗೆಗೆ ಹೋಗಿ ಖರೀದಿಸಬೇಕು ಅಥವಾ ಗ್ರಂಥಾಲಯಗಳಿಗೆ ಹೋಗಿ ಎರವಲು ಪಡೆದು ಓದಬೇಕೆಂಬ ಪ್ರಸಂಗವೇ ಈಗ ಇಲ್ಲ. ಬಿಡುಗಡೆಯಾದ ಎಲ್ಲಾ ಹೊಸ ಪುಸ್ತಕಗಳು ಆನ್‍ಲೈನ್‍ನಲ್ಲಿ ಲಭ್ಯ ಇರುತ್ತವೆ. ಸುಲಭ ವಿಧಾನಗಳಿಂದ ಡೌನ್‍ಲೋಡ್ ಮಾಡಿಕೊಂಡು ನೆಚ್ಚಿನ ಪುಸ್ತಕಗಳನ್ನು ನೀವಿದ್ದಲ್ಲಿಯೇ ಕೇಳಬಹುದು.
    ಇಲ್ಲಿ ಕತೆ, ಕಾದಂಬರಿ, ನಾಟಕ, ಜೀವನ ಚರಿತ್ರೆ, ಕಲೆ, ಸಾಹಿತ್ಯ, ವಿಮರ್ಶೆ, ಆರೋಗ್ಯ, ಉಧ್ಯಮ, ವಿದೇಶಿ ಭಾಷಾ ಅಧ್ಯಯನ, ಇತಿಹಾಸ, ಮನೋರಂಜನೆ, ಹಾಸ್ಯ, ವಿಡಂಬನೆ, ಧಾರ್ಮಿಕ, ಆದ್ಯಾತ್ಮಿಕ ಹೀಗೆ ಎಲ್ಲಾ ಪ್ರಕಾರಗಳ ಸಾಹಿತ್ಯ ಪುಸ್ತಕಗಳು ಆಡಿಯೋ ರೂಪದಲ್ಲಿ ಲಭ್ಯ ಇವೆ. ಹೆಚ್ಚುತ್ತಿರುವ ನಗರೀಕರಣದ ಪ್ರಭಾವ ಮತ್ತು ಸುಧಾರಿತ ಜೀವನ ಶೈಲಿಯಿಂದಾಗಿ ಪುಸ್ತಕ ಓದುವವರ ಸಂಖ್ಯೆ ಕಡಿಮೆ ಆಗುತ್ತಿದೆ. ಆದ್ದರಿಂದ ಇಂದಿನ ಯುವ ಪೀಳಿಗೆಗೆ ಮತ್ತು ಓದಲು ಅಸಾಧ್ಯ ಎನ್ನುವವರಿಗೆ ಆಡಿಯೋ ಪುಸ್ತಕಗಳು ಆಪ್ಯಾಯಮಾನ ಎನಿಸಿವೆ.
    ಬೆಳೆದು ಬಂದ ಹಾದಿ : ಆಡಿಯೋ ಪುಸ್ತಕಗಳ ಬೆಳವಣಿಗೆಯ ಜಾಡು ಹಿಡಿದು ಹೊರಟರೆ ನಮಗೆ ಸಿಗವ ಮೊದಲ ಹೆಜ್ಜೆ ಎಂದರೆ 1877ರಲ್ಲಿ. ಥಾಮಸ್ ಅಲ್ವಾ ಎಡಿಸನ್ ಫೋನೋಗ್ರಾಮ್ ಕಂಡುಹಿಡಿದ ನಂತರ ಸ್ಪೋಕನ್ ರೆಕಾರ್ಡಿಂಗ್ ಸಾಧ್ಯವಾಯಿತು. ಫೋನೋಗ್ರಾಮ್ ಬಳಸಿ ಮುದ್ರಿಸಿದ ಮೊದಲ ಆಡಿಯೋ ಪುಸ್ತಕ ಎಂದರೆ ಎಡಿಸನ್‍ರವರ ‘ಮೇರಿ ಹ್ಯಾಡ್ ಎ ಲಿಟ್ಲ್ ಲ್ಯಾಂಬ್’. ಇದು ಕೇವಲ ನಾಲ್ಕು ನಿಮಿಷದ ಪುಸ್ತಕ. 4 ನಿಮಿಷಗಳಿಂದ ಶುರುವಾದ ಪ್ರಯೋಗಗಳು 1930ರಲ್ಲಿ 20 ನಿಮಿಷಗಳ ಪುಸ್ತಕಗಳಾಗಿ ಮಾರ್ಪಟ್ಟಿದ್ದು ಮತ್ತೊಂದು ಮೈಲಿಗಲ್ಲು. 1930 ರಿಂದ 1950 ರವರೆಗೆ ಅನೇಕ ಪ್ರಾಯೋಗಿಕ ಆಡಿಯೋ ಪುಸ್ತಕಗಳು ಬಿಡುಗಡೆಯಾದವು. 1952ರಲ್ಲಿ ಮ್ಯಾಕ್‍ಡೋನಾಲ್ಡ್‍ರವರು ಯುನೈಟೆಡ್ ಸ್ಟೇಟ್ಸ್‍ನಲ್ಲಿ ಮೊದಲ ಧ್ವನಿಮುದ್ರಣ ಸ್ಟುಡಿಯೋ ಪ್ರಾರಂಭಿಸಿದರು. ಇದು ಆಡಿಯೋ ಪುಸ್ತಕಗಳ ಬೆಳವಣಿಗೆಯ ವೇಗವನ್ನು ಹೆಚ್ಚಿಸಿತು.
    1963 ರ ನಂತರ ಕ್ಯಾಸೆಟ್ ಟೇಪ್ ಮಾರುಕಟ್ಟೆ ಪ್ರವೇಶಿಸಿದವು. ಆಗ ವಿನೈಲ್ ಫಾಮ್ರ್ಯಾಟ್‍ನಲ್ಲಿ ಧ್ವನಿ ಮುದ್ರಿತ ಪುಸ್ತಕಗಳು ಹೆಚ್ಚು ಪ್ರಚಲಿತಗೊಂಡವು. ವಾಕ್‍ಮನ್ ಆವಿಷ್ಕಾರದ ನಂತರ ಆಡಿಯೋ ಪುಸ್ತಕಗಳ ಮುದ್ರಣ ಮತ್ತು ಮಾರಾಟ ಹೆಚ್ಚು ತೀವ್ರಗೊಂಡಿತು. ಸಿ.ಡಿ.ಗಳ ಬಳಕೆಯ ನಂತರ ಆಡಿಯೋ ಪುಸ್ತಕಗಳ ಬಳಕೆ ಮತ್ತು ಬೇಡಿಕೆ ಹೆಚ್ಚಿತು.
    1990-2000 ದ ಅವಧಿಯಲ್ಲಿ ಹಗುರ ಆಡಿಯೋ ಸಾಧನಗಳ ಜೊತೆಗೆ ಆಡಿಯೋ ಪುಸ್ತಕಗಳ ಜನಪ್ರಿಯತೆ ಹೆಚ್ಚಿತು. 1998ರಲ್ಲಿ Audible.com ಎನ್ನುವ ಆಡಿಯೋ ಪುಸ್ತಕಗಳ ಮೊದಲ ವೆಬ್‍ಸೈಟ್ ಪ್ರಾರಂಭವಾಯಿತು. ಅದು ಆನ್‍ಲೈನ್ ಲೈಬ್ರರಿಗಳ ಬೆಳವಣಿಗೆಯ ಮಹತ್ತರ ಮೈಲಿಗಲ್ಲಾಯಿತು.
    ಬಳಕೆ ಸುಲಭ : ಈಗೀಗಂತೂ ಬಹುತೇಕರ ಬಳಿ ಸ್ಮಾರ್ಟ್‍ಫೋನ್, ಐಫೋನ್, ಐಪಾಡ್, ಟ್ಯಾಬ್ಲೆಟ್, ಲ್ಯಾಪ್‍ಟಾಪ್, ಕಂಪ್ಯೂಟರ್‍ಗಳು ಸಾಮಾನ್ಯವಾಗಿವೆ. ಇವುಗಳ ಸಹಾಯದಿಂದ ಆಡಿಯೋ ಪುಸ್ತಕಗಳನ್ನು ಸುಲಭವಾಗಿ ಕೇಳಬಹುದು. ಅಲ್ಲದೇ ಇತ್ತೀಚೆಗೆ ಗೂಗಲ್ ಪ್ಲೇಸ್ಟೋರ್‍ನಲ್ಲಿ ಅಡಿಬಲ್, ಲಿಬ್ರಿವೊಕ್ಸ್, ಅಕಿಮ್ಬೋ ಮುಂತಾದ ಪ್ಲೇಯರ್ ಅಪ್ಲಿಕೇಶನ್‍ಗಳು ಲಭ್ಯವಿದ್ದು, ಆಡಿಯೋ ಪುಸ್ತಕಗಳನ್ನು ಕೇಳಲು ಉಪಯುಕ್ತವಾಗಿವೆ.
    ಪ್ರಯೋಜನಗಳು :
•    ಪರಿಚಯವಿಲ್ಲದ ಭಾಷಾ ರೂಪಗಳ ಸ್ಪಷ್ಟ ಉಚ್ಛಾರಣೆ ತಿಳಿಯುತ್ತದೆ.
•    ಹೊಸ ಪದಗಳ ಸ್ಪಷ್ಟ ಉಚ್ಛಾರದೊಂದಿಗೆ ಧ್ವನಿ ಏರಿಳಿತದ ಅನುಭವ ದೊರೆಯುತ್ತದೆ.
•    ಮುದ್ರಿತ ಪುಸ್ತಕ ಓದಿದಾಗ ದೊರೆಯುವ ಅನುಭವಕ್ಕಿಂತ ವಿಶೇಷವಾದ ಆಸಕ್ತಿ ಮತ್ತು ಕುತೂಹಲ ಮೂಡುತ್ತದೆ.
•    ಆರಾಮದಾಯಕವಾಗಿ ಹೆಚ್ಚು ಶ್ರಮ ಇಲ್ಲದೇ ಪುಸ್ತಕಗಳನ್ನು ಆಲಿಸಬಹುದು.
•    ಉತ್ತಮವಾದ ವಿವರಣಾತ್ಮಕ ಕೌಶಲ್ಯದ ಅನುಭವ ದೊರೆಯುತ್ತದೆ.
•    ರಜೆ ಹಾಗೂ ಪ್ರವಾಸದ ವೇಳೆ ಕಾಲಕಳೆಯಲು  ಉತ್ತಮ ಸಂಗಾತಿ.
•    ಪ್ರಾದೇಶಿಕ ಭಾಷಾ ಸೊಗಡಿನ ಪರಿಚಯವಾಗುತ್ತದೆ.
•    ಇತರೆ ಕೆಲಸಗಳ ಜೊತೆಜೊತೆಗೆ ಕೇಳುವ ಮೂಲಕ ಜ್ಞಾನ ಪಡೆಯಬಹುದು.
•    ಸಂಗ್ರಹಣೆ ಮತ್ತು ಸಾಗಣೆ ತುಂಬಾ ಸುಲಭ.
   
    ಭಾರತದಲ್ಲಿ ಆಡಿಯೋ ಪುಸ್ತಕಗಳು : ವಿಶ್ವದ ವೇಗಕ್ಕೆ ಹೋಲಿಸಿದರೆ ಭಾರತದಲ್ಲಿ ಆಡಿಯೋ ಪುಸ್ತಗಳ ಬಳಕೆ ನಿಧಾನವಾಗಿದೆ. 2010 ರ ನಂತರ ಮಾತ್ರ ಭಾರತದಲ್ಲಿ ಇಂಗ್ಲೀಷ್ ಆಡಿಯೋ ಪುಸ್ತಕಗಳ ಬಳಕೆ ಪ್ರಾರಂಭವಾಯಿತು. ಆಡಿಯೋ ಮುದ್ರಕರು ಮತ್ತು ಪ್ರಕಾಶಕರ ಸಂಘಟಿತ ಪ್ರಯತ್ನಗಳ ಕೊರತೆಯಿಂದ  ಭಾರತದಲ್ಲಿ ಆಡಿಯೋ ಪುಸ್ತಕಗಳು ಅಷ್ಟೊಂದು ಜನಪ್ರಿಯವಾಗಿಲ್ಲ. ಭಾರತದಲ್ಲಿ ಉತ್ತಮ ಸಾಹಿತ್ಯಕ್ಕೆ ಕೊರತೆಯಿಲ್ಲ. ವೈವಿಧ್ಯಮಯವಾದ ಪ್ರಾದೇಶಿಕ ಹಿನ್ನಲೆಯ ಅನೇಕ ಪುಸ್ತಕಗಳು ಇಡೀ ವಿಶ್ವದ ಗಮನ ಸೆಳೆದಿವೆ. ಈ ಎಲ್ಲಾ ಪುಸ್ತಕಗಳು ಆಡಿಯೋ ಸ್ವರೂಪ ಪಡೆದುಕೊಂಡರೆ ಭಾರತ ಸಾಹಿತ್ಯದ ಪರಾಕಾಷ್ಟತೆಯನ್ನು ಇಡೀ ಜಗತ್ತಿಗೆ ತಿಳಿಸಬಹುದು. ಈ ಬಗ್ಗೆ ಇಂದಿನ ಯುವಕರು ಮತ್ತು ಆಡಿಯೋ ಧ್ವನಿಮುದ್ರಕರು ಮನಸ್ಸು ಮಾಡಬೇಕಷ್ಟೇ? ಅಲ್ಲವೇ?

ಆಡಿಯೋ ಪುಸ್ತಕಗಳ ಕೆಲವು ಜಾಲತಾಣಗಳು:
www.audible.com
www.audiobooks.com
www.openculture.com/freeaudiobooks
https://librivox.org
www.amazon.com/Audiobooks-Books
www.webcrawler.com
www.techsupportalert.com/free-books-audio
www.loyalbooks.com
www.digitaltrends.com
https://www.overdrive.com

                                                                                                  ಆರ್.ಬಿ.ಗುರುಬಸವರಾಜ.