ಬೆಳಕೆಂದು ಬಾಳಿಗೆ

ಬೆಳಕೆಂದು ಬಾಳಿಗೆ

ಚಿಂದಿ ಬಟ್ಟೆಯ ಜೊತೆಗೆ ಸಾಗಿದೆ
ಚಿಂದಿ ಆಯುವ ಬದುಕು
ನೆತ್ತಿಯ ಮೇಲೆ ಸೂರ್ಯನ ಬಿಸಿಬೆಂಕಿ
ಒಡಲೊಳಗೆ ಹಸಿವಿನ ಕಿಚ್ಚು
ಬಿಸಿಲಿಗೆ ಬಳಲಿ ಬೆಂಡಾದ
ಒಣ ಕೊರಡಿನಂತಹ ದೇಹ
ದಾಹ  ಇಂಗಬಲ್ಲದೇ
ಬೆವರಿನ ಹನಿಗಳಿಂದ
ಹುಡುಕುತಲಿವೆ ಕಣ್ಣುಗಳು
ಅನಾವಶ್ಯಕ ವಸ್ತುಗಳಲ್ಲಿನ
ಅವಶ್ಯಕ ಗುಣವನ್ನು
ಇವರಿಗೆ ಹೇಳಿಕೊಟ್ಟವರು ಯಾರು?
ಸಾಮಾಜಿಕ ಉಪಯುಕ್ತ ಉತ್ಪಾದನಾ ಕಾರ್ಯವ
ಇವರಿಗಿಲ್ಲವೇ ಮುಕ್ತಿ
ಚಿಂದಿ ಆಯುವ ಕಾಯಕದಿಂದ
ತರಬಲ್ಲನೇ ಸುಡುವ ಸೂರ್ಯ
ಇಂತಹವರ ಬಾಳಿನಲ್ಲಿ ಬೆಳಕನ್ನು!