ಗ್ರೀಟಿಂಗ್ ಕಾರ್ನರ್

ಕ್ಲಾಸ್ ರೂಂನಲ್ಲೊಂದು ಗ್ರೀಟಿಂಗ್ ಕಾರ್ನರ್

ಜನವರಿ ಬಂತೆಂದರೆ ಸಾಕು ಎಲ್ಲಾ ಅಂಗಡಿಗಳಲ್ಲೂ ಗ್ರೀಟಿಂಗ್ ಕಾರ್ಡಗಳದ್ದೇ ಕಾರುಬಾರು. ಹೊಸವರ್ಷ ಹಾಗೂ ಸಂಕ್ರಾಂತಿಯ ಶುಭಾಶಯಗಳನ್ನು ತಿಳಿಸಲು ಗ್ರೀಟಿಂಗ್ಸ್‍ಗಳಿಗೆ ಮೊರೆ ಹೋಗುವುದು ವಾಡಿಕೆ.

ಇಂತಹ ಗ್ರೀಟಿಂಗ್ ಕಾರ್ಡಗಳನ್ನು ಮಾರುಕಟ್ಟೆಯಲ್ಲಿ ಖರೀದಿಸುವ ಬದಲು ತಾವೇ ತಯಾರಿಸುವಂತಾದರೆ ಉತ್ತಮವಲ್ಲವೇ? ಅದರಲ್ಲೂ ಶಾಲೆಯಲ್ಲಿ ಇಂತದ್ದೊಂದು ಕಲಿಕೆ ಇದ್ದರೆ ಇನ್ನೂ ಅನುಕೂಲವಲ್ಲವೇ?

ಸರ್ವೇ ಸಾಮಾನ್ಯವಾಗಿ ಮಕ್ಕಳಿಗೆ ಪಠ್ಯೇತರ ಚಟಿವಟಿಕೆಗಳಲ್ಲಿ ಆಸಕ್ತಿ ಹೆಚ್ಚು. ಇಂತಹ ಪಠ್ಯೇತರ ಕಲಿಕೆಯನ್ನು ಪಠ್ಯ ಕಲಿಕೆಗೆ ಅನ್ವಯಿಸಿಕೊಳ್ಳಬೇಕೆಂಬುದು ಎನ್.ಸಿ.ಎಫ್-2005 ರ ಆಶಯ. ಅಂದರೆ ಕಲಿಕೆಯನ್ನು ಸುಮನೋಹರಗೊಳಿಸಿ, ತಮ್ಮೊಳಗೆ ತಾವೇ ಸಂತೋಷಿಸುವ, ತೃಪ್ತಿ ಪಡುವ ಕಲೆಯನ್ನು ಮಕ್ಕಳು ಕರಗತ ಮಾಡಿಕೊಳ್ಳಬೇಕು. ಅಂದಾಗ ಮಾತ್ರ ಆ ಕಲಿಕೆಗೆ ಒಂದು ಗಟ್ಟಿಯಾದ ನೆಲೆಗಟ್ಟು ದೊರೆಯುತ್ತದೆ. ತರಗತಿಯಲ್ಲಿ ಗ್ರೀಟಿಂಗ್ ಕಾರ್ಡ ತಯಾರಿಕೆಯಿಂದ ಮಕ್ಕಳಲ್ಲಿ ಕಲಾಸಕ್ತಿ ಮೂಡುತ್ತದೆ. ಅಲ್ಲದೇ ಸೃಜನಾತ್ಮಕ ಕಲೆ ಸಿದ್ದಿಸುತ್ತದೆ. ಇಂತಹ ಒಂದು ಪ್ರಯತ್ನಕ್ಕೆ ಸಾಕ್ಷಿಯಾದವರು ಬಳ್ಳಾರಿ ಜಿಲ್ಲಾ ಹಗರಿಬೊಮ್ಮನಹಳ್ಳಿ ತಾಲೂಕಿನ ಬನ್ನಿಕಲ್ಲು ಗ್ರಾಮದ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಶಿಕ್ಷಕರು ಮತ್ತು ಮಕ್ಕಳು. ಈಗ ನೀವೂ ಪ್ರಯತ್ನಿಸಿ.

ಗ್ರಿಟಿಂಗ್ಸ್ ತಯಾರಿಕೆಯಲ್ಲಿರುವ ಮಕ್ಕಳು

ತಯಾರಿ ಹೀಗಿರಲಿ : ಹಳೆಯ ಆಮಂತ್ರಣ ಪತ್ರಿಕೆಗಳಲ್ಲಿನ ಸಣ್ಣ ಸಣ್ಣ ಚಿತ್ರಗಳು, ವೃತ್ತ ಪತ್ರಿಕೆಗಳಲ್ಲಿನ ಆಕರ್ಷಕ ಚಿತ್ರಗಳು,  ಸ್ವಾತಂತ್ರ ಹೋರಾಟಗಾರರು, ಕವಿಗಳು, ಸಾಹಿತಿಗಳು, ವಿಜ್ಞಾನಿಗಳು, ಸಂತರು, ದಾಸರು, ವಚನಕಾರರು, ಕ್ರೀಡಾಪಟುಗಳು ಹೀಗೆ ವಿವಿಧ ಕ್ಷೇತ್ರಗಳ ಸಾಧಕರ ಭಾವಚಿತ್ರಗಳು ಹಾಗೂ ಅವರ ಹಿತನುಡಿಗಳನ್ನು ಮಕ್ಕಳೇ ಸಂಗ್ರಹಿಸಿ ಕತ್ತರಿಸಿ ಇಟ್ಟುಕೊಳ್ಳುವುದು. ಅಗತ್ಯವಾದಷ್ಟು ವಾಟರ್ ಕಲರ್ಸ್, ಸ್ಕೆಚ್ ಪೆನ್‍ಗಳು, ಡ್ರಾಯಿಂಗ್ ಹಾಳೆ, ಬಣ್ಣ ಬಣ್ಣದ ಕಾಗದಗಳು, ಡಿಸೈನ್ ಪೇಪರ್ಸ್, ಗ್ಲಾಸ್ ಪೇಪರ್ಸ್ ಇತ್ಯಾದಿ ಸಾಮಗ್ರಿಗಳನ್ನು ಜೋಡಿಸಿಟ್ಟುಕೊಳ್ಳಲು ತಿಳಿಸಿ.

ಭಾವನೆಗಳಿಗೆ ಬಣ್ಣ ಹಚ್ಚಿ : ಮಕ್ಕಳು ಸಂಗ್ರಹಿಸಿದ ಸಾಮಗ್ರಿಗಳನ್ನು ಬಳಸಿಕೊಂಡು ಡ್ರಾಯಿಂಗ್ ಹಾಳೆಯಲ್ಲಿ ಗ್ರೀಟಿಂಗ್ಸ್ ತಯಾರಿಸಲು ಮಾರ್ಗದರ್ಶನ ನೀಡಿ. ಮಕ್ಕಳಿಗೆ ಬೆರಳು ತೋರಿಸಿದರೆ ಹಸ್ತವನ್ನೇ ನುಂಗುತ್ತಾರೆ. ಅಂದರೆ ಶಿಕ್ಷಕರು ನೀಡಿದ ಮಾರ್ಗದರ್ಶನದಿಂದ ಅತ್ಯಾಕರ್ಷಕವಾದ ಗ್ರೀಟಿಂಗ್ ಕಾರ್ಡಗಳನ್ನು ತಯಾರಿಸುತ್ತಾರೆ. ಅದರಲ್ಲಿ ಆಯಾ ದಿನ(ಹೊಸವರ್ಷ, ಸಂಕ್ರಾತಿ, ಯುಗಾದಿ, ಅಂತರರಾಷ್ಟ್ರೀಯ ಮಹಿಳಾ ದಿನ, ವಿಶ್ವ ಪರಿಸರ ದಿನ, ಸ್ವಾತಂತ್ರ ದಿನ , ಗಣರಾಜೋತ್ಸವ ಇತ್ಯಾದಿ)ಕ್ಕೆ ಅನುಕೂಲವಾಗುವಂತಹ ಸಂದೇಶದ ಸಾರಾಂಶಗಳನ್ನು ಮಕ್ಕಳು ತಮ್ಮ ಹಸ್ತಾಕ್ಷರಗಳಲ್ಲೇ ಬರೆಯಲಿ. ಹೀಗೆ ತಯಾರಾದ ಗ್ರೀಟಿಂಗ್ ಕಾರ್ಡಗಳನ್ನು ತರಗತಿ ಕೋಣೆಯಲ್ಲಿ ನೇತುಹಾಕಿ. ಇದರಿಂದ ಮಕ್ಕಳಲ್ಲಿ ಕಲಿಕೆಯ ಬಗ್ಗೆ ಆಸಕ್ತಿ ಮತ್ತು ಸ್ಪೂರ್ತಿ ಮೂಡುತ್ತದೆ.

ಮಕ್ಕಳು ರಚಿಸಿದ ಗ್ರೀಟಿಂಗ್ಸ್

ಮೌಲ್ಯಗಳ ಸಂವರ್ಧನೆ : ಇಂತಹ ಸೃಜನಾತ್ಮಕ ಚಟುವಟಿಕೆಗಳಿಂದ ಮಕ್ಕಳಲ್ಲಿ ಸೌಂದರ್ಯ ಪ್ರಜ್ಞೆಯ ಜೊತೆಜೊತೆಗೆ ಆತ್ಮಗೌರವ ಹಾಗೂ ವ್ಯಕ್ತಿಗೌರವಗಳಂತಹ ಮೌಲ್ಯಗಳು ಬೆಳೆಯುತ್ತವೆ. ಅಲ್ಲದೇ ಅವರಲ್ಲಿ ಪರಸ್ಪರ ಸಹಕಾರ, ಸೇವಾಮನೋಭಾವ, ಇತರರ ಕಾರ್ಯವನ್ನು ಮೆಚ್ಚುವ ಹಾಗೂ ವಿಭಿನ್ನತೆಗೆ ತಮ್ಮನ್ನು ಒಡ್ಡಿಕೊಳ್ಳುವ ಗುಣಗಳು ಬೆಳೆಯುತ್ತವೆ. ಮೌಲ್ಯಗಳ ಅಳವಡಿಕೆಗೆ ಸೃಜನಾತ್ಮಕ ಕಲಿಕೆ ರಹದಾರಿಯಾಗುತ್ತದೆ. ಇಂತಹ ಸೃಜನಶೀಲತೆಯನ್ನು ಪ್ರಾಥಮಿಕ ಹಂತದಿಂದಲೇ ಬೆಳೆಸಿದರೆ ಮಗುವಿನ ಸರ್ವಾಂಗೀಣ ಅಭಿವೃದ್ದಿಗೆ ಪೂರಕ ವಾತಾವರಣ ದೊರೆಯುತ್ತದೆ ಹಾಗೂ ಮಗುವನ್ನು ನಿರಂತರ ಮತ್ತು ವ್ಯಾಪಕ ಮೌಲ್ಯಮಾಪನ( ಸಿ.ಸಿ.ಇ)ಕ್ಕೆ ಒಳಪಡಿಸಲು ಸಹಕಾರಿಯಾಗುತ್ತದೆ.

ಪತ್ರಸಂದೇಶ : ಗ್ರೀಟಿಂಗ್ ಕಾರ್ಡ ತಯಾರಿಸಲು ಡ್ರಾಯಿಂಗ್ ಹಾಳೆಯ ಬದಲು ಅಂಚೆ ಇಲಾಖೆಯ 50 ಪೈಸೆ ಮುಖಬೆಲೆಯ ಪತ್ರಗಳನ್ನು ಬಳಸಿದರೆ ಇನ್ನೂ ಉತ್ತಮ. ಇದರಲ್ಲಿಯ ಮುಖಪುಟದಲ್ಲಿ ಮಕ್ಕಳು ತಮ್ಮಿಚ್ಛೆಯ ಗ್ರೀಟಿಂಗ್ ರಚಿಸಲಿ. ಇನ್ನೊಂದು ಬದಿಯ ಪುಟದಲ್ಲಿ ತಮ್ಮ ಹೆಸರು, ತರಗತಿ, ಶಾಲಾ ವಿಳಾಸ ಬರೆಯಲಿ. ಇದನ್ನು ತಮ್ಮ ಬಂಧುಗಳಿಗೆ, ಸ್ನೇಹಿತರಿಗೆ, ಸಾಹಿತಿಗಳಿಗೆ, ಕವಿಗಳಿಗೆ, ಕಲಾಭಿಮಾನಿಗಳಿಗೆ ವಿವಿಧ ಕ್ಷೇತ್ರಗಳ ಸಾಧಕರಿಗೆ ಅಥವಾ ಇಲಾಖಾ ಅಧಿಕಾರಿಗಳಿಗೆ ಕಳಿಸಲಿ. ಖಂಡಿತ ಅವರಿಂದ ಉತ್ತಮವಾದ ಪ್ರತಿಕ್ರಿಯೆ ಬಂದೇ ಬರುತ್ತದೆ. ಇದರಿಂದ ಮಕ್ಕಳಿಗೆ ವಿವಿಧ ಕ್ಷೇತ್ರಗಳ ಸಾಧಕರ ಪರಿಚಯ ಹಾಗೂ ಸಂಪರ್ಕ ದೊರೆಯುತ್ತದೆ. ಪಠ್ಯ ಕಲಿಕೆಗೆ ಉತ್ಸಾಹ ಬರುತ್ತದೆ.

ಮಕ್ಕಳ ಗ್ರೀಟಿಂಗ್ಸ್ ವೀಕ್ಷಿಸುತ್ತಿರುವ ಶಿಕ್ಷಕರು

ಶಿಕ್ಷಣವೆಂದರೆ ಕೇವಲ ಬೌದ್ದಿಕ ಬೆಳವಣಿಗೆಯ ಕಸರತ್ತು ಅಲ್ಲ. ಅದು ಬೆಳೆಯುತ್ತಿರುವ ಮಗುವಿನ ಭಾವನಾ ಸಮುಚ್ಛಯವನ್ನು ಆರೋಗ್ಯಕರವಾಗಿ ಬೆಳೆಯಲು ಮುಕ್ತ ಅವಕಾಶ ಕೊಡುವಂತಿರಬೇಕು ಅಲ್ಲವೇ?

                                                                                    - ಆರ್.ಬಿ.ಗುರುಬಸವರಾಜ.